სად ჯობს დასვენება
აგვისტოში, თბილი ტემპერატურული რეჟიმი უკვე ჩამოყალიბებულია, არ არის დიდი რაოდენობით ნალექები და შესაბამისად, ბავშვს შეუძლია მთელი დღის მანძილზე გარეთ იყოს და მაქსიმალურად გამოიყენოს კურორტული ფაქტორი. ბავშვებისათვის, დასვენება მთის კურორტებიდან უნდა დავიწყოთ, რადგანაც მთის კლიმატი მათთვის იმუნიტეტის გასაუმჯობესებლად ყველაზე კარგია. უმჯობესია, თუ ბავშვი მთის კურორტზე 1 თვე მაინც იქნება. შემდეგ კი 10-14 დღე ზღვის კურორტზე დავასვენოთ.
ბორჯომის საკურორტო ზონა: ბაკურიანი, წაღვერი, დიდი და პატარა ცემი, ბორჯომი.
სუნთქვის ორგანოთა არატუბერკულოზური დაავადებები, სისხლნაკლებობა, ნევრასთენია, ლიმფადენიტი – ამ პრობლემების მქონე ადამიანებს და არა მარტო, გირჩევთ დაისვენოთ ბახმაროში. აქ ზღვისა და მთის ჰაერის მასები ერთმანეთს ერწყმის, სწორედ ამიტომაა, რომ ბახმარო ყველა ასაკის ადამიანში პოპულარობით სარგებლობს.
თუ შორს გამგზავრებას ვერ ახერხებთ, ჩვენ თბილისთან ახლოს მდებარე კურორტებს გირჩევთ. ესენია: კოჯორი, კიკეთი, წავკისი, წყნეთი.
იმ შემთხვევაში, თუ ბავშვი ალერგიულია უმჯობესია დაისვენოთ შემდეგ კურორტებზე: სურამი, ცემი, კეჩხობი, შოვი.
ისევე როგორც ბავშვისათვის, ასევე უფროსისთვის, ერთკვირიანი ინტერვალებით სხვადასხვა რაიონში ჰაერის გამოცვლა თითქმის არ ითვლება დასვენებად. ადამიანს სჭირდება ადაპტაციის, ანუ მიჩვევის პერიოდი 10-14 დღე. წარმოიდგინეთ, ბავშვი 1 კვირაში მიეჩვია გარემოს, ჩვენ კი ამ დროს გადაგვყავს მეორე გარემოში, სხვა კლიმატურ ზონაში, ეს მისთვის თავისთავად დამტვირთველია და ვერ ჩავთვლით, რომ მან დაისვენა.
საგულდაგულოდ მოემზადეთ მგზავრობისათვის და თან იქონიეთ სამედიცინო ჩანთა:
ბამბა, დოლბანდი, ლეიკოპლასტირი, ფურაცილინის ხსნარი, ბრილიანტის მწვანე, სიცხის დამწევი და ტკივილგამაყუჩებელი საშუალებები, ფხვნილი ელექტროლიტების ხსნარის მოსამზადებლად, ანტიჰისტამინური საშუალებები, თერმომეტრი.
გაითვალისწინეთ, ხანგრძლივი მგზავრობისას უმჯობესია ბავშვს გზაში ნაყიდი არაფერი აჭამოთ და დაალევინოთ. თან წაიღეთ წყლით სავსე ბოთლი და შინ მომზადებული საკვები.
ბედნიერ დასვენებას გისურვებთ!
თამთა კოპლატაძე
medfm.ge