რჩევები დიასახლისებს



ყოველმა ქალმა იცის პატარ-პატარა ხრიკები, რათა უფრო მოხერხებულად გაუძღვეს საოჯახო მეურნეობას, უკეთ შეინარჩუნოს სახლში წესრიგი და სისუფთავე, და ამ ხრიკებს სიამოვნებით ასწავლიან სხვებსაც, ყველაზე მეტ რჩევას კი მაშინ იძლევიან, როცა საქმე სამზარეულოს ეხება. საინტერესოა, რა საიდუმლოებს უზიარებენ ერთმანეთს დიასახლისები…
ნურასოდეს გამოიყენებთ ახალნაყიდ ტაფებსა და ქვაბებს სათანადო დამუშავების გარეშე. ჯერ გარეცხეთ, მერე ქვაბში წყალი წამოადუღეთ და გადაღვარეთ, ხოლო ტაფაზე – ზეთი. ამის შემდეგ ტაფა გააცივეთ და გაწმინდეთ სუფთა თეთრი ქაღალდით. ასე დამუშავებული ქვაბები და ტაფები ზიანს აღარ მიაყენებს თქვენს ჯანმრთელობას.

* * *
ლიმონი მხოლოდ ჯანმრთელობისა და სილამაზისთვის კი არ არის სასარგებლო, არამედ საოჯახო საქმიანობაშიც შეუცვლელია. გაურიეთ ლიმონის წვენში მარილი და ეს ნარევი დაადეთ ტანსაცმელზე მოხვედრილ ფლომასტერის ლაქას. გაწმინდეთ, შემდეგ ჩვეულებრივ გარეცხეთ. ლაქები გაქრება! ხილით სავსე ლარნაკში ჩადეთ ლიმონი. ის ხილს დიდხანს შეუნარჩუნებს სიქორფეს. თუ ლიმონს გვერდით მიუწყობთ უმწიფარ ბანანებს, ისინი სწრაფად დამწიფდება. მიკროტალღოვან ღუმელში უსიამოვნო სუნის გასაქრობად რამდენიმე ულუფა ლიმონი ჩადეთ წყლიან ფინჯანში, შედგით ღუმელში და ის მთელი სიმძლავრით ჩართეთ. შემდეგ ეს ლიმონიანი წყალი გააცივეთ და შედგით მაცივარში – იქაც სასიამოვნო სუნს მოაფრქვევს. მაიონეზიანი სალათა განსაკუთრებულ გემოს შეიძენს, თუ სუფრასთან მიტანამდე რამდენიმე ხნით ადრე მასში ლიმონის ქერქს ჩადებთ.


* * *
მოარული აზრის თანახმად, ჯობს, ხორცის მომზადება მამაკაცს ანდო. რა თქმა უნდა, ბევრი დიასახლისი ამ აზრს არ დაეთანხმება, რადგან თავადაც არაჩვეულებრივად ამზადებს ხორციან კერძებს, მაგრამ თუ ხორცს მამაკაცის ხელი შეეხო, კონკურენციაზე ლაპარაკიც ზედმეტია! არადა ყველაფერი ძალზე მარტივია; უბრალოდ, მამაკაცებს თავ-თავიანთი ხრიკები აქვთ:

შემწვარი საქონლის ხორცი უფრო წვნიანი გახდება, თუ შეწვამდე რამდენიმე წამით მდუღარე წყალში ჩადებთ;
ხორცი შეწვის დროს რომ არ დაიგრიხოს და არ წამოიწიოს, მჭრელი დანით მთელ სიგრძეზე დასერეთ.
ხორცი ტაფას არ მიეკრობა, თუ ცალი მხრიდან ფქვილში ამოავლებთ და ისე შეწვავთ, მერე ფქვილს მეორე მხარესაც მოაყრით, გადააბრუნებთ და მეორე მხრიდანაც შეწვავთ.
შემწვარი ფრინველის კანი გემრიელი და ტკაცუნა რომ იყოს, შეწვის დამთავრებამდე 15 წუთით ადრე ფუნჯით წაუსვით გაყინული მარილიანი წყალი.
ხორცის ფარში და მისი კატლეტები რბილი და ფუმფულა იქნება, თუ ფარშს ზელის დროს რამდენიმე ნატეხ ყინულს ჩააყოლებთ.
გულიაში მიიღებს პიკანტურ გემოს, თუ მზადების დასასრულს დაუმატებთ პიურესავით გახეხილ ნახევარ ბანანს.


* * *
მრავალ ჩვენგანს მარილის გარეშე ცხოვრება ვერ წარმოუდგენია. მარილს უმთავრესად საკვებად ვიყენებთ, მაგრამ ყველამ როდი იცის, რა შეუძლია მარილს. როგორ შევაზავოთ მარილით კერძი?

ხორცის წვნიანს მარილი უნდა დავუმატოთ ხარშვის დამთავრებამდე 30 წუთით ადრე, ხოლო თევზის წვნიანს – ხარშვის დაწყებისას; მოსახარშად გამზადებულ კარტოფილში მარილი ხარშვის დაწყებამდე უნდა ჩავყაროთ, ხოლო შესაწვავს ბოლოს მოვაყაროთ.
ბარდა და ლობიო მაშინ უნდა დავამარილოთ, როცა დარბილდება, წინააღმდეგ შემთხვევაში მარცვლები არ მოიხარშება.
გადამლაშებული წვნიანი შეიძლება საჭმელად ვარგისი გახდეს, თუ მასში ჩაუშვებთ სუფთა ნაჭერში გახვეულ მოხარშული ბრინჯის გუნდას და წამოადუღებთ: ბრინჯი ზედმეტ მარილს შეიწოვს.
იმისთვის, რომ მარილი არ დანოტივდეს, დაამატეთ მას 8-10% კარტოფილის ფქვილი. ის არც გემოს შეუცვლის, არც ფერს. ასეთივე შედეგს მიიღებთ, თუ მარილში რამდენიმე მარცვალ ბრინჯს ჩააგდებთ.
თევზის გაწმენდა გაადვილდება, თუ მას წინასწარ მარილს წაუსვამთ – ამ შემთხვევაში ის ხელიდან აღარ გაგისხლტებათ.


* * *
დღეს ბევრი იყენებს პროდუქტების შესანახად პლასტმასის კონტეინრებს. მაგრამ პლასტმასი ძლიერ იწოვს სუნს. ერთხელ გარეცხვით სუნს ვერ მოაშორებთ კონტეინერს, რომელშიც ინახებოდა თევზი, ყველი ან ხახვი. შეგიძლიათ, ასეთი კონტეინერი გარეცხოთ საჭმლის სოდით – სუნი თითქოს არც ყოფილა! გაითვალისწინეთ გამოცდილი დისახლისების რჩევები, კმაყოფილი დარჩებით
































ტექსტის სანახავად გაიარეთ რეგისტრაცია.