ორსულობა და კომპიუტერი

ორსულობა - ეს არის ორგანიზმის მდგომარეობა, რომელიც მოითხოვს ქალისაგან ყველა ძალების, როგორც მორალურის, ასევე ფიზიკურის მობილიზაციას. ასეთ დროს რასაკვირველია ძლიერდება ის ნეგატიური ზეგავლენა მხედველობაზე, რომელიც დამახასიათებელია კომპიუტერისათვის. თუკი ორსული ვერ შეძლებს თავიდან აიცილოს კომპიუტერთან მუშაობა, მან მკაცრად უნდა დაიცვას ყველა პროფილაქტიკური ღონისძიება:

• მუშაობის დროს ყოველ საათში უნდა გააკეთოთ 15-წუთიანი შესვენება. შესვენების დროს აუცილებლად ადექით ფეხზე, გაიზმორეთ, გაიარ-გამოიარეთ, შეასრულეთ რამოდენიმე მსუბუქი ხასიათის ფიზიკური ვარჯიში (თავის დახრა, მობრუნება, ვარჯიში ხელის მტევნებისათვის, გაჭიმვითი მოძრაობა). თუკი არის ამის შესაძლებლობა, შეასრულეთ ვარჯიშების სპეციალური კომპლექსი ორსულებისათვის. ძალიან სასარგებლოა შესვენების დროს შენობიდან გარეთ სუფთა ჰაერზე გასვლა;

• მუშაობის პროცესში ხშირად, ყოველ 10-15 წუთში, შეიცვალეთ პოზა, აამოძრავეთ მხრები, ფეხები, თავი;

• სახლში მოსვლის შემდეგ ნუ შეუდგებით მაშინვე საოჯახო საქმეებს, წამოწექით, დაისვენეთ 1-2 საათი. უარს ნუ ეტყვით იმ ადამიანებს (ოჯახის წევრებს, თანამშრომლებს), ვინც შემოგთავაზებთ დახმარებას და საერთოდ, გამოიყენეთ დასვენების ნებისმიერი საშუალება.

• ეცადეთ შეინარჩუნოთ კარგი გუნებ-განწყობა და სულიერი სიმშვიდე. დაიმახსოვრეთ, რომ თქვენთვის ყველაზე მთავარია ორსულობის შენარჩუნება და ჯანმრთელი ბავშვის გაჩენა.