გამოცდილი „კონსტრუქტორი“

ჩამოვთვალოთ სათამაშო კონსტრუქტორების ღირსებები? – ავითარებს ბავშვის ხატოვან და ლოგიკურ აზროვნებას, მოტორიკას, სივრცულ წარმოსახვას და მეხსიერებასაც ავარჯიშებს. კონსტრუქტორით თამაში ბავშვს ეხმარება აითვისოს ისეთი მნიშვნელოვანი ცნებები, როგორიცაა „ფორმა“, „ზომა“, „ფერი“, წარმოდგენას უქმნის გარემომცველ სამყაროზე. აბა, სხვა რომელი სათამაშო დაიკვეხნის ღირსებების ასეთი გრძელი ჩამონათვალით? თან კიდევ კონსტრუქტორის ნებისმიერი ნაკრები უნივერსალურია, რადგან ერთნაირად ხიბლავს და იტაცებს როგორც ბიჭებს, ისე გოგონებს. ერთი სიტყვით, გასაკვირი არაა ის ამბავი, რომ კონსტრუქტორმა ნამდვილი საერთაშორისო აღიარება მოიპოვა.

დღეს სათამაშოების მაღაზიებში ისეთი რაოდენობის ასაწყობ მოდელებს გთავაზობენ, რომ თვალი აგიჭრელდება, გული აგიჩქარდება და შენდაუნებურად აღმოგხდება: “მე ამისგან გავაკეთებ!..“

მოკლედ, ხის თუ პლასტმასის, მაგარი გინდა თუ რბილი, ფიჭური, ბლოკებიანი, ქაღალდის და რა ვიცი კიდევ რამდენნაირი ასაწყობია, რა გინდა სულო და გულო.

თქვენ რომ არ დაიბნეთ მთელ ამ „ორომტრიალში“, სანამ შვილს ასაწყობ სათამაშოს შეუძენთ, ჩემი, როგორც გამოცდილი „კონსტრუქტორი“ მამიკოს რეკომენდაციები იქნებ გაითვალისწინოთ.

მოგეხსენებათ, ბავშვის ზრდასთან ერთად მისი ურთიერთობა კონსტრუქტორთან არ სრულდება, იმიტომ რომ გარემომცველი სამყაროს შეცვლა ვირტუალურადაც შეიძლება.

პაწაწინა აგურები, პლატფორმები, ბორბლები, შენობების მოდელები, უფ, ეს რაა, – შეიძლება მზა ობიექტების გადაადგილებაც და გადატრიალებაც. ვერაფერს იტყვი – მომხიბვლელია!

ჩემი ვაჟის და ალბათ თქვენი ბავშვების პირველი კონსტრუქტორი ჩვეულებრივი ასაწყობი პირამიდა იყო. ამ სათამაშოს ნამდვილად უხდება კონსტრუქტორის განსაზღვრება, როგორც დეტალების ნაკრები, რომელიც განკუთვნილია სხვადასხვა კონსტრუქციების ასაწყობად.

ჰოდა, ერთი წლის ბალღი თავიდან, რა თქმა უნდა, პირამიდას გამოუცნობ ობიექტად აქცევს. როცა ჩემი შვილი მის აწყობას ცდილობდა, ვხედავდი, რომ მოხდენილი პირამიდის ნაცვლად „შამფურზე“ ფერად –ფერად „მწვადებს“აცმევდა. მას კი ეს ძალიან მოსწონდა. თავიდან მეც, მაგრამ მერე ცოტა ნერვები მეშლებოდა. რა არი და რით ვერ გამოგვივიდა ეს პირამიდა. ზოგი ჩვენი მეზობლის ბავშვი ისე ოსტატურად წამოასხამდა რგოლებს სიმაღლის მიხედვით... თუმცა ნორჩ შემოქმედებით ტიპებსაც კი ვიცნობდი, იატაკზე ფერად რგოლებს ლამაზად რომ ალაგებდნენ, მომავალ ავტომრბოლელებსაც, მაგალითად 9 თვის ნოდარიკოს, რგოლი ჯოხზე ჩამოსაცმელად არ ემეტებოდა, საჭედ უფრო კარგად იყენებდა. ვიცი, პირამიდა პატარას ძალიან ართობს, მაგრამ გარდა ამისა დიდი სარგებლობაც მოაქვს თურმე – ავითარებს პაწაწინა თითების მოხერხებულობას და მოთმინების უნარს: რამდენიმე წუთის გატარება ერთი საქმის კეთებაში, იმ დროს, როცა ირგვლივ ამდენი საინტერესო რამ ხდება – ნამდვილი მიღწევაა.

წლინახევრის პატარა უკვე იწყებს გარკვევას მარტივ გეომეტრიულ ფორმებში. ამიტომ შესთავაზეთ მას კლასიკური კუბიკები და ნახავთ – კოშკები და ციხესიმაგრეების კედლები პირველ არქიტექტურულ შედევრებად იქცევა. სულ რაღაც ნახევარ წელიწადში ვაფართოვებთ სამშენებლო შესაძლებლობებს, კომპლექსს ვუმატებთ ცილინდრს, პრიზმას, ნახევარსფეროსა და კონუსს. ამ ფიგურების დახმარებით კი ნამდვილი ქალაქის აშენებაც შეიძლება, სადაც ყველა სათამაშოსთვის მოიძებნება ადგილი: საყვარელ მანქანას ავტოფარეხში დავაყენებთ, ცხოველები კი პატარა სახლს შეაფარებენ თავს.

ორი წლის ასაკი ნამდვილად კარგი დროა რომ ბლოკების კონსტრუქტორით თამაშს შევუდგეთ. აქ ხომ დეტალები მყარად ერთდება, ამიტომ მისი მოდელებიც უფრო მტკიცე გამოდის. რადგან ბევრი ბავშვი კვლავაც ცდილობს გემო გაუსინჯოს სათამაშოს, არ ღირს წვრილმანი დეტალებისგან შემდგარი ნაკრების ყიდვა (მოდით, ეს საქმე ერთი–ორი წლით გადავდოთ) და ჩვენი არჩევანი შევაჩეროთ მსხვილ წითელი, ყვითელი, ლურჯი და მწვანე ფერების ბლოკებზე. ვაშენებთ ჩვენს პატარასთან ერთად მონუმენტურ სახლებს, კოშკებს, კიბეებს, შეიძლება პირველი მატარებლის და სატვირთო მანქანის აწყობაც. იმ მომენტში, როცა ბავშვი ბოლო დეტალს ამაგრებს, ის აცნობიერებს თუ რამდენი რამის აღმოჩენა შეიძლება ამ ფერადფერადი ბლოკების გროვაში.

უკვე 3 წლის ასაკში ჩვენი შვილი მზად არის აითვისოს მარტივი სამგანზომილებიანი გეომეტრიული კონსტრუქტორები, ისეთი დეტალებისგან რომ შედგება, რომლებიც ერთმანეთს სპეციალური ჭრილების ადგილებში უერთდება. ასეთი სათამაშოები ბავშვებს ეხმარება აბსტრაქტული აზროვნების ჩამოყალიბებაში – ვიდრე ფიგურას ააწყობს, უნდა წარმოიდგინოს მისი სამგანზომილებიანი პროექცია. ეს მას ეხმარება კომბინატორული და შემოქმედებითი შესაძლებლობების განვითარებაში, რადგან მოდელის აწყობა შეიძლება არა მარტო მოცემული ნიმუშის მიხედვით, არამედ საკუთარი ფანტაზიითაც, თანაც ჩვენმა შვილებმა შეიძლება გაგვაოცონ გაბედული იდეებით და უჩვეულო მოდელებით. ზოგი ბავში ისეთ მანქანას და ველოსიპედს ააწყობს, რომელსაც ვერც ერთ ინსტრუქციაში ვერ ნახავთ.

4-5 წლის ასკი არის კონსტრუქტორების „ოქროს ხანა“. ახლა ბავშვს ნებისმიერი მოდელი შეგვიძლია შევთავაზოთ. ბევრი პატარა ოცნებობს ქონდეს დიდი თემატური ნაკრები უამრავი ასაწყობი დეტალით. ზოგი საათობით უნდება გზის მშენებლობას, ზოგი ციხესიმაგრეს აღმართავს, ზოგიც შორეულ მოგზაურობაში მიდის თავის მეკობრეებთან ერთად. ასეთი ასაწყობები კარგია იმით, რომ ერთდროულად შეიძლება რამდენიმე კომპლექტის გამოყენება, იმიტომ რომ დეტალები ერთმანეთს ესადაგება. თუ ბავშვს განვითარებულის აქვს აბსტრაქტული აზროვნება, მაშინ შგვიძლია შევუძინოთ მაგნიტური კონსტრუქტორიც – და ენითაღუწერელი სიამოვნება გარანტირებულია!

გზა დამილოცნია დედებო და მამებო, ვიცი, დროს გამონახავთ და თქვენს პატარებთან ერთად კონსტრუქტორს „ჩაუჯდებით“. აბა დროებით!