ვიბრომასაჟი - მასაჟის მეთოდი



ვიბრომასაჟი სპეციალური აპარატის მეშვეობით კეთდება. მისი არსი იმაში მდგომარეობს, რომ სხეულის დასამუშავებელ ნაწილზე ვიბრაციული აპარატიდან გადასცემენ სხვადასხვა სიხშირისა და ამპლიტუდის რხევით მოძრაობებს. ორგანიზმზე აპარატიდან გადაცემული ვიბრაციის ზემოქმედების ხარისხი დამოკიდებულია რხევის სიხშირესა და ამპლიტუდაზე, ასევე – ზემოქმედების ხანგრძლივობაზე. ვიბრომასაჟი ზემოქმედებას ახდენს ნერვულ სისტემაზე. ვიბრაცია აღაგზნებს ნერვებს, რომლებმაც თავიანთი ფუნქციის შესრულება შეწყვიტეს. გარდა ამისა, ვიბრაცია აწყნარებს ზედმეტად გაღიზიანებულ ნერვებს. სუსტი ვიბრაცია ნერვული მოქმედების სტიმულირებას ახდენს, ძლიერი კი ინარჩუნებს მას.

ვიბრომასაჟი დადებით გავლენას ახდენს სისხლძარღვთა სისტემაზე, აუმჯობესებს სისხლის მიმოქცევას და არეგულირებს გულსისხლძარღვთა ფუნქციონირებას. დამტკიცებულია, რომ დაბალი რხევითი სიხშირე (50 ჰერცამდე) იწვევს არტერიული წნევის შემცირებას, მაღალი სიხშირის რხევა (100 ჰერცამდე), პირიქით, არტერიულ წნევას ზრდის, აგრეთვე ზრდის გულის შეკუმშვათა რიცხვს.

აპარატის ვიბრაცია აუმჯობესებს სუნთქვის ორგანოთა მუშაობას, ააქტიურებს ორგანიზმში მიმოცვლით პროცესებს. ვიბრომასაჟი ეფექტურ ზეგავლენას ახდენს ნერვულ-კუნთოვან აპარატზე. მას შეუძლია დაღლილი კუნთების შრომისუნარიანობის ამაღლება, რადგან დადებით რეაქციას ახდენს ნერვულ სისტემაზე. აუმჯობესებს კუნთებში სისხლის მიმოქცევას და მჟანგველ-აღდგენით პროცესებს კუნთოვან ქსოვილებში.

მეცნიერულად დამტკიცებულია, რომ ვიბრომასაჟის ყოველდღიური გამოყენება ხანგრძლივი დროის განმავლობაში ამაღლებს ადამიანის შრომისუნარიანობას. ვიბრომასაჟი მატონიზირებელ ზეგავლენას ახდენს ქსოვილზე; მას ესევე გააჩნია ანთების საწინააღმდეგო და ტკივილგამაყუჩებელი ეფექტი. მაქსიმალური ეფექტის მისაღწევად, საჭიროა ვიბრომასაჟი ბიოლოგიურად აქტიურ წერტილებსა და სეგმენტურ-რეფლექსურ ზონებში ჩავიტაროთ.

აპარატის ვიბრაცია გამოიყენება: საყრდენ-მამოძრავებელი აპარატის, მოტეხილობებისა და ტრავმების, ბრონქიტებისა და ბრონქიალური ასთმების, რადიკულიტების, ოსტეოქონდროზის, ცენტრალური ნერვული სისტემის დაავადებათა სამკურნალოდ.

ვიბრომასაჟი რეკომენდებული არაა: ხერხემლის ტრავმის, ოსტეოპოროზის, ენდარტერიტისა და ქვედა კიდურების ათეროსკლეროზის, ტრომბოფლებიტის, ტროპიკული წყლულების, რეინოს ავადმყოფობისა და სხვა დაავადებების შემთხვევაში. ასევე სასურველი არაა ვიბრომასაჟის ჩატარება ძილის წინ.

აპარატის ვიბრაცია ფართოდ გამოიყენება სპორტსმენებისთვის, ვარჯიშის წინ და მის შემდეგ.

ის აპარატები, რომლებიც ვიბრომასაჟისთვის გამოიყენება, შეიძლება დაიყოს ორ კატეგორიად: 1) ლოკალური მასაჟის და 2) საერთოდ მასაჟისთვის განკუთვნილ აპარატებად.

მასაჟის პრაქტიკაში დიდი გამოყენება ჰპოვა ნ. ვასილიევის ვიბრაციულმა აპარატმა, რომლის მეშვეობითაც 0-დან 30 ჰერცამდე სიხშირის ვიბრაციას იყენებენ მასაჟის პროცედურებისთვის. ამ აპარატის საფუძველზე სხვა აპარატებიც შეიქმნა, რომელთაც ვიბრათოდების რამდენადმე განსხვავებული კონსტრუქცია და უფრო მძლავრი ძრავა გააჩნიათ. ეს აპარატები განკუთვნილია არა მარტო სხეულის ვიბრაციისთვის, არამედ მისი დაზელისთვისაც.

ელექტროძრავაზე მუშაობს პ. ბერსენევის აპარატი. იგი ვიბრაციის სიხშირის შეცვლის საშუალებას იძლევა.

ფართოდ გამოიყენება გადასატანი სავიბრაციო აპარატი – ვმპ-1, რომელიც ცვალებად დენზე მუშაობს და რამდენიმე ვიბრათოდი გააჩნია.

ამას გარდა, მასაჟის პრაქტიკაში წარმატებით გამოიყენება აპარატი – ტონუსი, რომელიც აღჭურვილია სპეციალური წელის სარტყელით. იგი ახდენს მასაჟისთვის შერჩეული სხეულის უბნის ვიბრირებას. შეგვიძლია ვარეგულიროთ აპარატის მიერ წარმოქმნილი რხევის სიხშირე.

მასაჟისთვის გამოიყენება ისეთი აპარატებიც, რომლებიც, ვიბრაციის გარდა, მასირებულ ზედაპირზე სითბურ ზემოქმედებასაც ახდენს. ისინი საშუალებას იძლევა, ვცვალოთ არა მარტო რხევის სიხშირე, არამედ ვიბრათოდების ტემპერატურა.

ყველა, ზემოთ ჩამოთვლილი აპარატი მიეკუთვნება ლოკალური ვიბრაციისთვის განკუთვნილი აპარატების კატეგორიას და გამოიყენება სხეულის ცალკეული უბნების მასაჟისთვის.

ე.წ. საერთო ვიბრაცია ხორციელდება ისეთი აპარატის მეშვეობით, როგორიცაა ვიბრაციული სკამი, რომელშიც რხევითი მოძრაობა წარმოიქმნება ელექტრომოტორის მეშვეობით. ამას გარდა, მასაჟის პრაქტიკაში გამოიყენება ვიბრაციული ტახტი, ველოტრაბ გოფა, სხვადასხვა ვიბრაციული სავარძელი. სწორედ ამ ვიბრაციული ტახტისა და სავარძლის მეშვეობით ახორციელებენ ლოკალურ მასაჟს და საამისოდ რთავენ მოცემული აპარატის შესაბამის მოწყობილობას.

ვიბრომასაჟის სეანსს ზურგიდან იწყებენ. ვიბროაპარატის წინსადგამს ამოძრავებენ ლიმფატიკური კვანძების მიმართულებით (იღლიისქვეშა ფოსოებისკენ). მასაჟი კეთდება წრიული და სიგრძივი მოძრაობებით. ზურგის მასაჟი 3-5 წუთს გრძელდება. ისე კი, ზურგის ფართო კუნთების მასირება შესაძლოა ცოტა მეტხანსაც გაგრძელდეს.

ამის შემდეგ იწყება ზედა კიდურების მასაჟი. თავიდან მიმდინარეობს მხრის შიდა ზედაპირის მასირება, რაც გრძელდება წინამხარსა და იდაყვის სახსრებზე. ამის შემდეგ ხორციელდება მხრისა და წინამხრის გარე ზედაპირის მასირება. ამას მოსდევს მტევნისა და მაჯის სხივური მყესების დამუშავება. ხელის დაბოლოებათა მასაჟისთვის ორ ვიბრათოდს იყენებენ. ერთი ხელის მასაჟი 1-1,5 წუთს გრძელდება.

შემდგომი ეტაპია ზურგის სასარტყლე და მენჯის ზონების მასაჟი. მოძრაობა ხდება საზარდულის მიმართულებით.

შემდეგ მიმდინარეობს ფეხების უკანა ზედაპირის მასაჟი, რაზეც დაახლოებით 1 წუთი იხარჯება. თავიდან ახორციელებენ მუხლის სახსრისა და ბარძაყის უკანა ზედაპირის მასირებას. მუხლის მყესიდან მოძრაობა მიმართულია დუნდულის ნაკეცისკენ (ვიბრომასაჟორის გამოყენება რეკომენდებული არაა ბარძაყის შიდა ზედაპირზე). შემდეგ აუცილებელია წვივის კუნთებისა და ქუსლის მყესების მასირება. ამ დროს ვიბრომასაჟორის მოძრაობა მიმართულია ტერფიდან მუხლის სახსრისკენ. ამდენივე დრო იხარჯება ფეხების წინა ზედაპირის მასირებისთვისაც. თავიდან მუშავდება ბარძაყის ზედაპირი – მუხლის სახსრიდან ზევით; შემდეგ კეთდება მუხლის სახსრის, ასევე წვივისა და კოჭ-წვივის სახსრის მასაჟი.

ამ პროცედურის შემდეგ უნდა დამუშავდეს დიდი გულ-მკერდის კუნთები, ხერხემლის მიმართულებით.

ამას მოსდევს მუცლის ზონის მასირება.

საერთოდ, ვიბრომასაჟი იწყება და მთავრდება ისეთი ხერხის გამოყენებით, როგორიცაა ხელის გადასმა.

ვიბრომასაჟის გაკეთება 20 წუთზე მეტხანს რეკომენდებული არაა, რადგან ხანგრძლივმა ვიბრაციამ შესაძლოა გამოიწვიოს არასასურველი ზემოქმედება ორგანიზმზე, კერძოდ კი – უხალისობა და დაღლილობა, უძილობა და თავის ტკივილი.

ვიბრომასაჟის ჩატარებისას არ უნდა გამოვიყენოთ რაიმე სახის კრემი, რადგან ეს ასუსტებს მის ზემოქმედებას.

ვიბრაციის აპარატის გამოყენებისას, აუცილებელია, გულდასმით დავიცვათ შემდეგი უსაფრთხოების წესები:

ვიბრატორი სწორად უნდა გვეკავოს
არ უნდა გადავახუროთ აპარატი
აპარატში ის ძაბვა უნდა ჩავრთათ, რაც მითითებულია
სეანსის დამთავრების შემდეგ, უნდა ჩავატაროთ ვიბრატორების დეზინფექცია.
































ტექსტის სანახავად გაიარეთ რეგისტრაცია.