დედა თუ დედამთილი?!...



დღეს არავის უკვირს კონფლიქტები სიძესა და სიდედრს, რძალსა და დედამთილს შორის. ამ თემაზე ბევრი ხუმრობს კიდეც, ალბათ, მსგავსი შინაარსის ანეკდოტებისთვისაც მოგიკრავთ ყური; მაგრამ ეს კიდევ ყველაფერი არ არის.

ბოლო დროს საკმაოდ გახშირდა "ქიშპობა" დედამთილებსა და სიდედრებს შორის. ამ შემთხვევაში დაზარალებულის ამოცნობა ძნელი არ არის. ეს კონფლიქტი უარყოფითად ყველაზე მეტად თქვენსა და თქვენს მეუღლეზე მოქმედებს. ამიტომაც ერთად ვცადოთ ამ პრობლემის მოგვარება.

დაფიქრდით, სანამ რამეს იტყოდეთ...

მხოლოდ ერთი რამ გშველით, მხოლოდ ის, რომ დედათქვენი და თქვენი დედამთილი ყოველდღიურად არ ხვდებიან ერთმანეთს. ამდენად, შეიძლება ვივარაუდოთ, რომ მათ, ძირითადად, თქვენი და თქვენი მეუღლის მონათხრობის საფუძველზე ექმნებათ წარმოდგენა ერთმანეთზე.

გამოიყენეთ ეს შანსი იმისათვის, რომ აქ ორ ქალბატონს შორის არსებული დაპირისპირება გაანეიტრალოთ.

არასოდეს არაფერი ცუდი არ წამოგცდეთ დედასთან დედამთილზე. უამბეთ მას დედამთილის მხოლოდ დადებით მხარეებზე.

არავითარ შემთხვევაში არ დაიჩივლოთ მშობლებთან, რომ დედამთილი ცუდად მოგექცათ. ლოგიკურია, რომ არცერთი დედა არ განეწყობა სიმპათიით იმ ადამიანის მიმართ, რომელმაც შვილი "დაუჩაგრა". თქვენ ეს წყენა შეიძლება ძალიან ცოტახანს გაგყვეთ, მაგრამ დედათქვენს ეს ამბავი დიდხანს ემახსოვრება.

ცხადია, თქვენს მეუღლეს და მის ნათესავებსაც აქვთ უარყოფითი თვისებები, მაგრამ თუ გულის მოოხებას და თქვენი დარდის გამჟღავნებას დააპირებთ, სჯობს, მეგობარს უამბოთ თქვენი პრობლემების შესახებ. ოო, დედა კი სულ სხვაა... უამბეთ მას, თუ როგორ გიდგათ დედამთილი მხარში და როგორ გეხმარებათ.

სასურველია, თქვენმა მეუღლემაც იგივე პოლიტიკა შეიმუშავოს და დედამისთან დედათქვენზე კარგის მეტი არაფერი თქვას.

"ბრძოლა" შვილიშვილებისთვის

სიტუაცია შეიძლება უფრო რთული აღმოჩნდეს, თუ შვილები გყავთ. ბებიები ხშირად ვერ თანხმდებიან ბავშვების აღზრდის თაობაზე და მთელ ოჯახს ითრევენ კონფლიქტში. ეს სიტუაცია უარყოფითად მოქმედებს თქვენი და თქვენი მეუღლის ურთიერთობაზე, რომ არაფერი ვთქვათ ბავშვებზე. ისინი ყველაზე მეტად განიცდიან დაძაბულ ურთიერთობას ოჯახის წევრებს შორის.

თქვენ და თქვენმა მეუღლემ უნდა აუხსნათ საკუთარ დედებს, რომ ბავშვების აღზრდაზე პასუხისმგებლები მხოლოდ თქვენ ხართ. რა თქმა უნდა, რჩევები ამ საკითხზე მათაც შეიძლება მოგცენ, მაგრამ საბოლოო გადაწყვეტილებას მაინც თქვენ მიიღებთ. და თუ მაინცადამაინც რომელიმეს რჩევას გაითვალისწინებთ, ეს იმის ხარჯზე მოხდება, რომ რომელიმეს ჯიბრში ჩაუდგეთ.

და კიდევ ერთი...

თქვენ და თქვენს მეუღლეს დიდი მოთმინება გმართებთ. შეინარჩუნეთ წონასწორობა თქვენი ინტერესების, ბებიების სურვილებისა და ბავშვების კომფორტის გათვალისწინებით.

თუკი თქვენი შვილები ზაფხულის დიდ ნაწილს დედათქვენთან ატარებენ, საშემოდგომო არდადეგებზე მათზე ზრუნვა თქვენს დედამთილს მიანდეთ. ამ ბალანსის შენარჩუნება ადვილი არ იქნება, მით უმეტეს, თუ რომელიმე თქვენთან უფრო ახლოს ცხოვრობს ან მეტი თავისუფალი დრო აქვს ბავშვებთან ურთიერთობისთვის.

ნებისმიერ შემთხვევაში, თუ ორივე ბებიას ეცოდინება, რომ მისი ინტერესები უგულებელყოფილი არ იქნება, უკმაყოფილებაც თანდათან გაქრება.

იზრუნეთ ოჯახზე

რა უნდა მოიმოქმედოთ იმ შემთხვევაში, თუ თქვენი ყველა მცდელობის მიუხედავად, დედები ვერ შეარიგეთ? დაიცავით ოჯახი მათი კონფლიქტის შედეგებისგან! როგორც უნდა ვთქვათ, თქვენი მეუღლე გულის სიღრმეში დედამისის მხარეზე იქნება და თქვენც დედათქვენის ინტერესებს დაიცავთ. შეეცადეთ არ გაახმიანოთ საკუთარი პოზიციები. ამ შემთხვევაში ცხარე კამათს აიცილებთ თავიდან.

დაამშვიდეთ მეუღლე და აუხსენით, რომ მშობლები თავად უნდა მორიგდნენ. ბოლოს და ბოლოს, ისინი ხომ ზრდასრული ადამიანები არიან და არავის დაცვა არ სჭირდებათ.

ეს იმას არ ნიშნავს, რომ თქვენ საკუთარ დედას უნდა დაუპირისპირდეთ, მაგრამ მეორე მხრივ, დაფიქრდით: ჩაერეოდით დედათქვენისა და მისი კოლეგის, ან თუნდაც მისი მეგობრის ურთიერთობაში? ალბათ, არა!

თუ სიდედრის და დედამთილის ურთიერთობა ცივილური ადამიანების ურთიერთობის ფარგლებს სცდება და ისინი ერთმანეთის მიმართ დაპირისპირების სახალხოდ დამალვას ვერ ახერხებენ, აჯობებს, არ დაპატიჟოთ ისინი ერთსა და იმავე დღეს.

ეს უხერხულობას კი შეგიქმნით, მაგრამ ზეიმი მაინც შეგერგებათ და არც თქვენ იქნებით ემოციურად დაძაბული.


ჟურნალი "და ქალი"
































ტექსტის სანახავად გაიარეთ რეგისტრაცია.