1) ნუ აქცევთ გათხოვების სურვილს აკვიატებულ იდეად
როცა ქალი გათხოვებას ცხოვრების მთავარ მიზნად აქცევს, ეს მის ხასიათზე და ქმედებებზე მკვეთრად აისახება და მამაკაცებში უკურეაქციას იწვევს. მამაკაცს ხომ ქვეცნობიერად ეშინია დამოუკიდებლობის დაკარგვის. ასეთ ქალებთან ურთიერთობისას კაცები იძაბებიან და ქალის მიმართ ყურადღებას კარგავენ.
გამოსავალი: გათავისუფლდით აკვიატებული აზრებისგან, რომ „წელს აუცილებლად უნდა გათხოვდეთ“ და პირველივე პაემანზე ნუ დაიწყებთ იმის მოყოლას, როგორ ოცნებობთ ქმარზე და შვილებზე, გამეტებით ნუ უმტკიცებთ მამაკაცს, რომ თქვენ მხოლოდ და მხოლოდ სერიოზული ურთიერთობები გაინტერესებთ.
2) ნუ ეძებთ იდეალურ მამაკაცს
ქალების დიდი ნაწილი ისეთ მამაკაცს ეძებს, რომელიც მზადაა მის გამო რაიმე გმირული საქციელი ჩაიდინოს. იდეალის ძებნაში კი წლები მალე გადის. რეალურ ცხოვრებაში კი „გმირი“ ჭუჭყიან წინდებს იატაკზე ყრის, ცხვირწინ დადებულ ნივთს დიდხანს ეძებს და ნათურის შეცვლას ერთი კვირა უნდება.
გამოსავალი: ნუ ელით თქვენზე შეყვარებული მამაკაცისგან რაიმე განსაკუთრებულ საქციელს, ნურც იმის იმედი გექნებათ, რომ საყვარელი მამაკაცის თავიდან აღზრდას და მის გადაკეთებას შეძლებთ.
3) ნუ შეიქმნით საკუთარ თავზე გადამეტებულ წარმოდგენას
სინამდვილეში მამაკაცებს მართლაც ეშინიათ ლამაზი, ჭკვიანი და მეტისმეტად კეთილშობილი ქალების. მათი აზრით, როცა ქალი ასეთად აჩვენებს თავს, ის თამაშობს და მომავალში ბრჭყალებს აუცილებლად გამოაჩენს.
გამოსავალი: კაცის გულის მოგება რომ შეძლოთ, თავდაჯერებული უნდა იყოთ, თუმცა არ არის საჭირო მთელი თქვენი ცოდნა, უპირატესობები და ძლიერი მხარეები მალევე გამოამჟღავნოთ. მამაკაცს სურს, თავად იყოს ძლიერი და საყვარელ ქალს მფარველობდეს, ასე რომ, დროდადრო „ქალურად“ მოიქეცით და მამაკაცს თავისი სიძლიერის გამოვლენის საშუალება მიეცით.
4) ნუ იქნებით მეტისმეტად ხელმისაწვდომი
მამაკაცი საკუთარი ბუნებით მონადირე არსებაა და მისთვის „მონადირების“ პროცესი ძალიან მნიშვნელოვანია. ნუ აგრძნობინებთ, რომ მისთვის მხოლოდ გასართობი თოჯინა ხართ.
გამოსავალი: რჩეული მამაკაცის ყოველ დარეკვაზე ნუ მიაგდებთ საქმეებს და თავქუდმოგლეჯილი ნუ გაიქცევით პაემანზე. ხანდახან უთხარით, რომ დაკავებული ხართ და სანამ მიხვდებით, რომ საქმე უკვე სერიოზულადაა, მანამდე მსუბუქი ფლირტით შემოიფარგლეთ.
5) ნუ შეუზღუდავთ თავისუფლებას
ყველაზე მეტად მამაკაცს, როგორც წესი, საკუთარი თავისუფლების დათმობა უჭირს. ეშინია იმის, რომ საკუთარ ტერიტორიაზე „ვიღაც“ უნდა შემოუშვას, რომელიც „იქ“ თავის წესებს დაამკვიდრებს. ამიტომ ნუ იქნებით ზედმეტად აქტიური და ნუ ეცდებით მისი ცხოვრების ყველა წუთი გააკონტროლოთ.
გამოსავალი: ნუ დაუშლით თავის მეგობრებთან ერთად შეკრებას და დროის გატარებას. ნუ მოსთხოვთ, ყველა თავისუფალი წუთი თქვენთან ერთად გაატაროს ან თუ თქვენთან არ არის, ყოველი ნაბიჯის შესახებ მოგახსენოთ.
6) ნუ ჩაეძიებით წარსულს
მამაკაცს არც ის უყვარს, როცა ქალი წარსულზე უწყობს დაკითხვას და არც ის, როცა ქალი თავისი წარსულის ყველა ნიუანსს დეტალურად უყვება. მამაკაცი საყვარელ ქალში ყოველთვის პოზიტივს, ბედნიერ წუთებს და სულიერ სიმშვიდეს ეძებს და არ არის საჭირო მის დატვირთვა ქალური პრობლემებით.
გამოსავალი: იყავით თავისუფალი, ლაღი და მხიარული. მეტი დრო დაუთმეთ მომავალ გეგმებზე საუბარს, მაგრამ პირდაპირ მომავალი ერთობლივი ცხოვრების დაგეგმვას კი ნუ შეუდგებით, ქალურად, მოქნილად განიხილეთ მომავალი შვებულება, უახლოესი შაბათ-კვირა. ასეთი შეხვედრები და ქალაქგარეთ გასვლები საყვარელ მამაკაცთან უფრო დაგაახლოვებთ, და რაც მთავარია, არ დაივიწყოთ პოზიტიური განწყობა.
7) ნუ გააბამთ რომანს ცოლიან მამაკაცთან
შესაძლოა პირველ ეტაპზე ეს კავშირი დამაინტრიგებელი და საინტერესო მოგეჩვენოთ, მაგრამ ის აუცილებლად გექცევათ დიდ პრობლემად. როდესაც ადამიანს შეეჩვევით, ეჭვიანობას, წყენას ვერ გაექცევით და სულ იმის მოლოდინში იქნებით, როდის გაშორდება თქვენი რჩეული ცოლს.
გამოსავალი: ცოლიანი კაცის საყვარლის როლი მარტოობას ვერ დაგაძლევინებთ, თქვენი ოცნება მყუდრო ოჯახზე ისევ ოცნებად დარჩება. თუ ასეთ მამაკაცს შეხვდებით და მასთან ახლო ურთიერთობას გადაწყვეტთ, მალევე დაფიქრდით, გჭირდებათ კი ეს მამაკაცი? სიყვარულია ეს თუ გატაცება? და თუ შეძლებთ საკუთარ თავს გამოუტყდეთ, რომ ეს მხოლოდ გატაცებაა, რაც შეიძლება სწრაფად დაასრულეთ ეს ურთიერთობა.
წყარო: etanews.ge
7 შეცდომა, რომელიც ქალებს გათხოვებაში უშლის ხელს
⏱️ 1 წთ.
👁️ 6 441
100%