ზოგიერთი ადამიანი ბუნებრივად ფოტოგენური არ არის და სურათის გადაღებისას ერთგვარ დისკომფორტს განიცდის ამის გამო. ხან ღიმილი არ მოსწონს თავისი, ხან მხრების პოზიცია, ხანაც ვერ გაუგია თავი საით და რამდენი გრადუსით გადახაროს. ცოტა ნარცისულად კი ჟღერს, მაგრამ მაინც მინდა გირჩიოთ, რომ ივარჯიშოთ სარკესთან. გთავაზობთ 5 მარტივ ხერხს, რათა უფრო მეტად ფოტოგენური გახდეთ და სურათის გადაღების დროს თავი კომფორტულად იგრძნოთ.
1. სარკის წინ
დადექით სარკის წინ, მოეშვით და ნუ იქნებით დაძაბული. წარმოიდგინეთ, რომ ვიღაც სურათს გიღებთ ან თქვენი აპარატი ტაიმერზე დააყენეთ. ივარჯიშეთ და გადაიღეთ სურათები მანამ, სანამ საკუთარი თავით და სურათზე გამოსახულებით კმაყოფილი არ დარჩებით.
2. იცოდე შენი კუთხე
ადამიანების უმეტესობას არ აქვს სრულყოფილად სიმეტრიული სახე. დააკვირდით რომელი მხრიდან გადაღებული სურათი გამოდის თქვენი უფრო ეფექტური, შეიძლება სახის მარცხენა მხარე უფრო ლამაზი გაქვთ, ვიდრე მარჯვენა, ამიტომ პოზირების დროს ეს კუთხე დატვირთეთ.
3. გაემზადეთ
თუ იცით, რომ სურათებს გიღებენ, ცოტა შელამაზდით. განიახლეთ ან გაიკეთეთ მსუბუქი მაკიაჟი. თვალის შავი ლაინერი და ღია ვარდისფერი პომადა შესანიშნავი დუეტია ამ დროს. სურათის გადაღების მომენტში წარმოიდგინეთ, რომ ობიექტივს კი არა, საყვარელ ადამიანს უღიმით. ეს ბუნებრივს გამოგაჩენთ,ზედმეტი პოზების დაჭერა და უხერხული მიმიკების გამოხატვა აღარ მოგიწევთ.
4. გამოხატეთ რამე ემოცია
სიხარული, აღფრთოვანება, შიში, სიბრაზე…ემოციების მეტი რა გვაქვს. თუმცა სანამ ფოტო-აპარატის წინ დაიწყებთ ექსპერიმენტებს, უმჯობესია წინასწარ იცოდეთ რომელი ემოცია უფრო უხდება თქვენს სახეს.
5. მართეთ სხეულიც
თუ პირადობის მოწმობისთვის არ იღებთ სურათს, გაჭიმული ნუ დადგებით კამერის წინ. თმა, მხრები, ხელები, თეძოები, ფეხები უამრავი ვარიაციის საშუალებას იძლევა და თქვენც მართეთ ისინი.
წყარო: life.mediamall.ge
5 რჩევა როგორ გახდეთ უფრო ფოტოგენური
⏱️ 1 წთ.
👁️ 2 811
100%