მამაკაცებს თავიანთი გარეგნობა ნაკლებად ანაღვლებთ. მიზეზი მათი ფსიქოლოგიური განწყობაა: მამაკაცი, ქალისგან განსხვავებით, პრაქტიკულია და ვერ გაუგია, რატომ უნდა იხადოს ვარცხნილობისთვის დიდი თანხა, როცა იმავეს გაკეთება უფრო იაფადაც შეუძლია ან რატომ უნდა წავიდეს სალონში მანიკიურის გასაკეთებლად, როცა თავადაც მშვენივრად ფლობს მაკრატელს. სინამდვილეში კი ეს არასწორი მიდგომაა და მთავარი ხელისშემშლელი ფაქტორია სასიამოვნო გარეგნული იერის შექმნის საკითხში.
რაკი საქმე გარეგნობაზე მიდგა, მამაკაცის მოდის 2009-2010 წლის ტენდენციებსაც გადავხედოთ. დავიწყოთ ფერთა გამით. შავი და რუხი ფერის ბრძოლა დომინანტობისთვის, შეიძლება ითქვას, ფრედ დასრულდა: ერთიცა და მეორეც მამაკაცის ყველა კოლექციის საფუძველია. რაც შეეხება კოსტიუმის თარგს, დიზაინერები აქცენტს აკეთებენ წელზე მომდგარი სილუეტის ერთბორტიან პიჯაკებზე. შარვლები უპირატესად საშუალო მოცულობისაა. ტანზე მომდგარი მოდელები უკვე აღარ წარმოადგენს მოდის სამყაროს პანაცეას. ზოგიერთი მოდის სახლი გალიფესაც კი გვთავაზობს - მოდელს, რომელიც წვივებზე მოტმასნილია, ხოლო ზევით ფართოვდება. თუმცა ზოგიერთმა მოდის სახლმა 2009-2010 წლის შემოდგომა-ზამთრის კოლექციებში მაინც დატოვა ტანზე მჭიდროდ მომდგარი სამოსის ტენდენცია. ასე რომ, თუ თქვენთვის უცხოა სილამაზის სალონები და ტანსაცმლის მაღაზიებსაც არც თუ ხშირად სტუმრობთ, ამ ტენდენციებს მაინც მიაქციეთ ყურადღება და ეცადეთ გარეგნულ მხარეს ცოტა მეტი ყურადღება დაუთმოთ.
წყარო: cacao.cp.ge
პრაქტიკული მამაკაცის ფსიქოლოგიური პორტრეტი
⏱️ 1 წთ.
👁️ 1 411
100%