სიარულის დროს ხელების ქნევა
ადამიანი, რომელიც სიარულის დროს იქნევს ხელებს, როგორც წესი, გახსნილი და უშუალოა, არასდროს მალავს საკუთარ ფიქრებსა და ემოციებს. ამასთან ერთად, ის ხშირად თავად იტანჯება საკუთარი გულწრფელობით და მუდამ ხალისიანი განწყობით, რადგან გარშემომყოფებს უჭირთ მისი სერიოზულად აღქმა და მას ზედმეტად ზედაპირულ და თავქარიან ადამიანად მიიჩნევენ.
ფხანის ჩვეულება საჯარო გამოსვლების დროს
ხშირად ის, ვისაც საზოგადოება საკმაოდ არტისტულ და მჭერმეტყველ პერსონად მიიჩნევს, საჯარო გამოსვლების დროს იფხანს ხელებს, სახეს, ჯდომის დროს კი – ფეხებს, რაც იმაზე მეტყველებს, რომ ასეთი ადამიანი არაა საკუთარ თავში დარწმუნებული და მას გარკვეული ძალისხმევა ჭირდება საკუთარი გრძნობების დასამალად, ბევრ ენერგიას ხარჯავს ემოციებთან ბრძოლაზე და კარგავს კონტროლს უნებლიე მოძრაობებზე. მიუხედავად ამისა, ასეთი ადამიანი არასდროს ემორჩილება საკუთარ შიშებს და მუდმივ ბრძოლაშია მათთან, ამიტომ ხშირად აიძულებს საკუთარ თავს აკეთოს ის, რაც ძალიან არ უნდა. ასეთი პიროვნება მთელი ცხოვრება ბარიერების გადალახვაშია და სწორედ ამიტომ აღწევეს უმაღლეს პოზიციას კარიერასა და სოციუმში.
ღამით ჭამა
ის, ვინც ღამე იღვიძებს და თავს ესხმის მაცივარს, როგორც წესი, სტრესის მდგომარეობაშია და რაც უფრო ხშირია “ღამეული წახემსება”, მით უფრო სერიოზულია მისი ნერვული სისტემის პრობლემები. გარდა ამისა, ის იშვიათად უფიქრდება საკუთარ მდგომარეობას და უარს ამბობს მიიღოს ნერვული გამოფიტვის ფაქტი, ღამის შიმშილს უძილობას აბრალებს და არ ცდილობს მოძებნოს პრობლემის პირველწყარო. როგორც წესი, ასეთი ადამიანი ყოველთვის უპასუხისმგებლოდ ეკიდება საკუთარ ჯანმრთელობას, საქმეებს და ცხოვრებასაც კი.
ლოგინის არ დალაგება
ის, ვინც დილას თავს არ იწუხებს საკუთარი ლოგინის მოწესრიგებით, როგორც წესი, ზარმაცი და არაორგანიზებულია, არ შეუძლია საქმეების სწორად დაგეგმვა და ყოველთვის არა საკუთარი თავის, არამედ სხვების იმედზეა. ასეთ ადამიანს ყოველთვის სჯერა, რომ მას დიდი აღმოჩენები ელოდება წინ და არასდროს აქცევს ყურადღებას წვრილმანებს.
სარკეში ხშირად ყურება
ვიღაცას შესაძლოა მოეჩვენოს, რომ ის, ვინც ხშირად იყურება სარკეში, საკუთარი თავის ტკბობითაა გატაცებული. სინამდვილეში ამგვარი ჩვევა აბსოლუტურად საპირისპიროზე მიანიშნებს – ასეთ ადამიანს როგორც წესი, სერიოზული პრობლემები აქვს თვითრწმენასთან და მუდმივად ამოწმებს როგორ გამოიყურება, რადგან ძალიან ეშინია, არ გახდეს სხვების დაცინვის ობიექტი. ხშირად ასეთი ჩვევა ადვილად აგზნებად ადამიანებს ახასიათებთ და ერთგვარ რიტუალად იქცევა, რაც ეხმარება მათ შეინარჩუნონ შინაგანი სიმშვიდე.
ნახატები უბის წიგნაკში
ის, ვინც ყოველდღიური გეგმების შესადგენად უბის წიგნაკით სარგებლობს და საკუთარ ჩანაწერებს ნახატებით და ორნამენტებით აფორმებს, როგორც წესი, არაორგანიზებული ადამიანია, ცუდი მეხსიერება აქვს და არ ენდობა საკუთარ თავს. სწორედ ამიტომ ადგენს საქმეების ნუსხას და რაც მთავარია, ყოველთვის ვერ ახერხებს მათ შესრულებას. ხშირად ასეთი ადამიანი მილიონობით მიზეზს პოულობს, რათა არ შეასრულოს საკუთარ თავზე აღებული ვალდებულებები და ყოველთვის პოულობს გამართლებას, თუ რატომ არ გააკეთა ის, რასაც საკუთარ თავს ან სხვებს შეპირდა.
ხატვა ტელეფონზე საუბრის დროს
ტელეფონზე საუბრის დროს ხატვის ჩვევვა როგორც წესი, ეგოისტური ბუნების ადამიანს ახასიათებს, რომელსაც არ აინტერესებს მოსაუბრე, აბსოლუტურად არ სცემს პატივს მას და აძლევს საკუთარ თავს უფლებას, სხვა რამეზე გადაიტანოს ყურადღება. ასეთი ადამიანი მხოლოდ საკუთარ პერსონაზე და ინტერესებზეა კონცენტრირებული, საკუთარ სურვილებს და მოთხოვნილებებს კი, ყველაფერზე მაღლა აყენებს. თუმცა, მას შეუძლია იყოს რომანტიკული და სენტიმენტალური, მელანქოლიური და ლირიული და გული აუჩუყოს გარშემომყოფებს.
ჭამა სიარულის დროს
ადამიანი, რომელიც სიარულის დროსაა ჭამას მიჩვეული, არა მარტო ცოტა დრო აქვს, არამედ საკუთარ ჯანმრთელობასაც არ უფრთხილდება. გარდა ამისა, ამგვარი ჩვევა მას ახასიათებს, ვისაც საკმაოდ გადატვირთული რეჟიმი აქვს და გასტრონომიული სიამოვნება უკანასკნელ ადგილს იკავებს მის ცხოვრებაში. ტემპერამენტით ასეთი ადამიანები ძირითადად ქოლერიკები და იმპულსურები, ადვილად გაღიზიანებადი და გაუწონასწორებელი პიროვნებები არიან.
აკვიატებული სიტყვების გამოყენება
საუბრის დროს პარაზიტი სიტყვების (“აი”, “ანუ”, “ისა” და ა.შ.) მუდმივად გამოყენება მიანიშნებს, რომ ადამიანი ან საკუთარ აზრებს ვერ ეწევა ან პირიქით არ იცის რა თქვას. საინტერესოა, რომ ასეთი ჩვეულება ხშირად საჯარო პროფესიის ადამიანებს ახასიათებთ. ისინი მიჩვეული არიან ყოველთვის მომზადებული ტექსტით გამოსვლას და ჩვეულებრივი საუბრის დროს, ერთგვარი “სუფლიორის” გარეშე თავს საკმაოდ არაკომფორტულად გრძნობენ. გარდა ამისა, პარაზიტი სიტყვები ნაკლები ინტელექტის მანიშნებელიცაა.
საჯაროდ ხმამაღლა სიცილი
ადამიანი, რომელიც ხაზგასმულად ხმამაღლა იცინის, როგორც წესი, ყურადღების მიქცევას ცდილობს, რადგან ძალიან სიამოვნებს, როცა გარშემომყოფები განსაკუთრებულ ინტერსესს იჩენენ მის მიმართ. თუმცა, აღსანიშნავია, რომ ასე სწორედ ის იქცევა, ვისაც სინამდვილეში არაფერი აქვს სათქმელი და საჩვენებელი საზოგადოებისთვის, ის ვისაც არ შეუძლია დაიკვეხნოს მაღალი თანამდებობით, სერიოზული მიღწევებით და საკუთარი თავის რწმენით.
დღიურის წერა
ის, ვინც მუდმივად და მრავალი წლის მანძილზე ხელით წერს დღიურს (ან წერს კომპიუტერში, მაგრამ არასდროს აქვეყნებს), როგორც წესი, საკუთრ თავში ჩაკეტილი ადამიანია, არავის ენდობა და რთული ურთიერთობა აქვს გარე სამყაროსთან, ცოტა მეგობარი ჰყავს და ვერ პოულობს საერთო ენას ახლობლებთან. ასეთ ადამიანს ძალიან უჭირს საკუთარი ფიქრების და გრძნობების სხვებისთვის გაზიარება, რადგან თვლის, რომ ყველაფერი, რაც მის ცხოვრებაში ხდება, სინამდვილეში არავის აინტერესებს. ხშირად ასეთი ჩვევა ემოციონალური ტრავმის ან სერიოზული რყევის შედეგია, რომელიც არა მარტო რეალობას ცვლის, არამედ ადამიანის ხასიათსაც და მაშინ დღიური ერთადერთი მოსაუბრე ხდება, რომელიც ეხმარება მას გადარჩეს და არ დაიღუპოს.
მუდამ გარეცხილი ჭურჭელი
ის, ვინც არასდროს ტოვებს ბინძურ ჭურჭელს დილამდე პასუხისმგებლი და ენერგიული ადამიანია, რომელიც ყველაფერს წინასწარ გეგმავს და თვითდისციპლინაც წესრიგში აქვს. მას თავისუფლად შეუძლია თქვას უარი სიამოვნებაზე, დასახული მიზნის ან თუნდაც ყოველდღიური მოვალეობების ღირსეულად შესრულების სასარგებლოდ. გარდა ამისა, ასეთი ადამიანი სიხარულით ხვდება ხვალინდელ დღეს, რადგან დარწმუნებულია, რომ ახალ დღეს ყოველთვის ახალი თავგადასავლები და აღმოჩენები მოაქვს, ამიტომ არ უყვარს, როცა “გუშინდელი” საქმეები მის “ხვალინდელში” იჭრება.
გაურეცხავი ჭურჭელი
ის, ვინც მშვიდად ტოვებს მოუწესრიგებელ სამზარეულოს და მიდის დასაძინებლად, როგორც წესი, არაა მიჩვეული პრობლემების დროულად გადაწყვეტას. მას ყველაფრის მომავლისთვის გადადება ახასიათებს და იმედი აქვს, რომ პრობლემები თავისით მოგვარდება. ასეთი ადამიანი, ყოველთვის საკუთარ სურვილებსაა აყოლილი, მაშინაც კი, თუ მისი კაპრიზები ზიანს აყენებენ მის სამუშაოს ან ხელს უშლიან მიზნის მიღწევაში.
ბანქოს პასეანსის გაშლა
ის, ვინც ყოველდღე ბანქოს (ან კომპიუტერის) ერთიდაიგივე პასეანსს შლის და ამას ერთგვარ რიტუალად მიიჩნევს, ცდილობს მოაწესრიგოს საკუთარი ცხოვრება. მისთვის ძალიან მნიშვნელოვანია სტაბილურობა და გარკვეული დეტალების უცვლელად შენარჩუნება. გარდა ამისა, მას ქვეცნობიერად სურს მიიღოს ერთგვარი მტკიცებულება, რომ ყველაფერი კარგად იქნება. ასეთ ადამიანს, როგორც წესი, ხანგრძლივი ფიქრი და ფილოსოფიურობა ახასიათებს, ყველაფერს კარგად თვლის და სხვებზე მბრძანებლობისკენაა მიდრეკილი.
fortuna.ge