ყოველი წლის ოქტომბრის პირველ პარასკევს მთელ მსოფლიოში ღიმილის დღეს აღნიშნავენ. დღესასწაულს საფუძველი ამერიკელმა მხატვრმა, ჰარვი ბელმა დაუდო. მე-20 საუკუნის მხატვრის ნამუშევრები დიდი ნიჭიერებით არ გამოირჩეოდა და რომ არა ერთი იღბლიანი შემთხვევა, დღეს ბელი არავის ემახსოვრებოდა.
1963 წელს ბელს სადაზღვევო კომპანიის State Mutual Life Assurance Company of America-ს წარმომადგენლებმა სთხოვეს, მათი კომპანიისთვის თვალისმომჭრელი ლოგო შეექმნა.
ჰარვის დიდხანს არ უფიქრია, მან ყვითელ რგოლში მომღიმარი შავი პირი და თვალები ჩახატა. ინტერნეტსივრცეში ეს ლოგო "სმაილის" სახელით არის ცნობილი.
დამკვეთებს მხატვრის ნამუშევარი მოეწონათ და ბელს 50 აშშ დოლარი გადაუხადეს. რამდენიმე თვეში "სმაილი" მთელ აშშ-ს მოედო.
მას მაისურებზე, კონვერტებზე, ასანთის კოლოფებსა და ღია ბარათებზე გამოსახავდნენ. აშშ-ის ფოსტამ კი "სმაილის" გამოსახულებიანი მარკაც გამოუშვა.
ღიმილის საერთაშორისო დღე პირველად 1999 წელს აღნიშნეს. მხატვარს მიაჩნდა, რომ ამ დღეს ადამიანები დადებით განწყობაზე უნდა იყვნენ და რაც შეიძლება ხშირად გაიღიმონ.
ღიმილის ენა
დიახ, ასეთი ენაც არსებობს... ენა, რომელმაც ერთნაირად შეიძლება გამოხატოს სრულიად განსხვავებული გრძნობები - სიყვარულიც, ბედნიერებაც, სიამაყეც, ზიზღიც, სირცხვილიც და ა.შ. ერთი შეხედვით, ეს თითქოს უბრალო ფიზიკური მოქმედებაა, სახის კუნთების მოძრაობა, მაგრამ... რეალურად, სწორედ ამ ქმედებითაა შესაძლებელი მთელი შენი შინაგანი სამყაროს სიდიადის, განწყობის, კონკრეტული პიროვნების ან მოვლენის მიმართ გაჩენილი ემოციის გადმოცემა და ახსნა ნებისმიერი ეროვნების და ნებისმიერ ენაზე მოსაუბრე ადამიანისთვის.
დიახ, არ შეცდით, ეს საყოველთაო, ადვილად აღსაქმელი, უნიკალური საკომუნიკაციო ენა ღიმილია.
სწორედ ამ ენის შესწავლა და გათავისება გაგვიჭირდა ყველაზე მეტად მუდმივად სწავლამოწყურებულ ქართველებს. უფრო მეტიც, როგორც ჩანს, ღიმილი ანბანის დონეზეც კი დაავიწყდა ხალხს თურმე. ამის მიზეზებად კი ხან მძიმე პოლიტიკურ ვითარებას, ხან ოჯახური ყოფის სიმძიმეს, ხან სოციალურ სიდუხჭირეს და ხანაც უბრალოდ ამინდის გავლენას ასახელებენ. ჩვენს ქვეყანაში რთულია მოძებნო მომღიმარი მძღოლი ან გამყიდველი, ან თუნდაც უბრალო მოქალაქე. შეიძლება ითქვას , რომ ჩვენს "გაყინულ" სახეებს მსოფლიოც კი ამჩნევს. მაგ. 2009-2011 წლების გამოკითხვით, რომელშიც 150 ქვეყანა იყო ჩართული, ყველაზე მომღიმარი, ბედნიერი და პოზიტიური ქვეყნების სია დაადგინეს. საქართველომ კი მეორე ადგილი ყველაზე "არამომღიმარ" ქვეყნებს შორის დაიკავა. ( წყარო: http://www.livescience.com/24962-most-emotional-countries.html)
ღიმილი ბიზნესში
ალბათ გაგიგიათ გამოთქმა "service with a smile" ანუ ღიმილი ბიზნესში. ეს არის გამოცდილი მეთოდი, რომელიც ამერიკაში დაიბადა და თავის თავში "ღიმილიან" მომსახურებას გულისხმობს. ამერიკელები ამ სერვისს განსაკუთრებულ ყურადღებას აქცევენ. ისინი გიღიმიან ყოველთის, - როდესაც გემსახურებიან ან როდესაც მომსახურებას გთავაზობენ, გარკვეული მიზეზით თუ უმეზეზოდ, მისალმებისას თუ დამშვიდობებისას, ასევე თვალებით კონტაქტისას.
ღიმილი ბიზნესის უმნიშვნელოვანესი ნაწილია. მის გარეშე შეუძლებელია ადამიანის კარგი განწყობის მოპოვება. ღიმილი ზრდის გაყიდვებს. დადგენილია, რომ კლიენტთა უმეტესობა ბრუნდება იმ დაწესებულებაში (კაფეში, რესტორანში, სასტუმროსა თუ მაღაზიაში), სადაც იყო კარგი მომსახურება და მომღიმარი მომსახურე პერსონალი, პროდუქტის ხარისხის მიუხედავადაც კი (იქნება ეს საკვები თუ ტანსაცმელი).
ბიზნესში წარმატების მისაღწევად სპეციალურ ტრენინგებსაც კი ატარებენ ღიმილის და კეთილგანწყობის მოპოვების სწავლების მიზნით. ამისთვის ხშირად ჩვენთვის უცნაურ ხერხებსაც კი მიმართავენ. მაგალითად, ჩინეთში ბორტგამცილებლებს ღიმილს სპეციალური საჭმლის ჩხირებით (chopsticks) ასწავლიან.
რა ხდება ამ მხრივ საქართველოში?
შედიხარ მაღაზიაში პურის საყიდლად და... დაახლოებით ასეთი შინაარსის დიალოგის მონაწილე ხდები:
- გამარჯობა! -
პასუხად გესმის მაცივრების ზუზუნი.
- ერთი პური თუ შეიძლება - ისევ მაცივრების ზუზუნი
- რამდენი მოგართვათ?
- ოთხმოცი თეთრი - ხურდის ჩხრიალი
- მადლობა, ნახვამდის - კარის ჭრიალი
ყოველდღიურად უამრავი ადამიანი აი ასე, მოკლე და ერთფეროვანი საუბრების შედეგად, ყიდულობს საჭირო პროდუქტს თბილისის მაღაზიებში.
სიყვარული გაკლიათ? მიიღეთ ერთი აბი ღიმილი
ღიმილი ყურადღების მიპყრობის საუკეთესო საშუალებაა. ის უნივერსალურია ურთიერთობებში, მეგობრობასა და სიყვარულშიც. პირადად მე, ადამიანთან შეხვედრისას, მჭირდება სულ რაღაც 3-7 წამი იმისათვის, რომ მასზე გარკვეული შთაბეჭდილება შემექმნას (თუნდაც არასწორი). მართალია, გაუაზრებლად, მაგრამ... ყველა ჩვენგანი ადამიანს პირველი რამდენიმე წამის განმავლობაში აფასებს. და რა გზით შეიძლება წარმოდგენის შექმნა ამ მცირე დროში? რა შეიძლება მოასწროს ადამიანმა რამდენიმე წამის განმავლობაში? ბიოგრაფიის მოყოლა? სიყვარულის ახსნა? სესხის აღება? რა თქმა უნდა, არა... ვინც ჯერ კიდევ ვერ მიხვდა, მოვფენ ინტერნეტსივრცეს ნათელს და ვიტყვი - ღიმილი.
საინტერესო ფაქტი:
ქალები მამაკაცებზე მეტს იღიმიან. ფორმულა ასეთია - მათი ღიმილის სიხშირე საპირისპირო სქესის ყურადღების მიპყრობის პროპორციულად იზრდება.
რა სარგებლობა მოაქვს ღიმილს?
დამტკიცებულია, რომ ღიმილის დროს გამოიყოფა ისეთი ნივთიერებები, როგორიცაა ენდორფინი და სეროტონინი, ანუ ტკივილის ბუნებრივი მკვლელები. ისინი არიან ბუნებრივი ნარკოტიკები თქვენი ორგანიზმისთვის. ღიმილი აძლიერებს იმუნურ სისტემას, გხდით უფრო პოზიტიურს, წარმატებულს, ლამაზს და გახსნილს სამყაროსთვის და ურთიერთობებისთვის.
ასე რომ, ნუ ეძებთ მიზეზებს, დაიწყეთ დილა სასიამოვნო მუსიკით, კარგი ფიქრებით და რაც მთავარია, გაუღიმეთ თქვენს თავს სარკეში.
P.S. "არასდროს მოიშალო სახეზე ღიმილი, მაშინაც კი, როდესაც სევდიან განწყობაზე ხარ, რადგან ვინმეს შეიძლება შენი ღიმილი შეუყვარდეს". (გაბრიელ გარსია მარკესი)
წყარო: www.sazogadoeba.ge
ღიმილის დღე და საინტერესო ისტორიები
⏱️ 1 წთ.
👁️ 1 268
100%