“როცა ჰარი შეხვდა სალის”
მართალია მთელი ფილმი შემოდგომის სეზონზე არაა გადაღებული, მაგრამ მთავარი და განსაკუთრებული ეპიზოდები სწორედ რომ გადაყვითლებულ “ცენტრალ-პარკშია” გადაღებული. შესაბამისად, სანამ ზამთარი დადგებოდეს, შეარჩიეთ ერთი სუსხიანი, წითელ-ყვითელი ფოთლებით სავსე დღე, სახლში თბილად მოკალათდით, ჩაი მოიდუღეთ და უყურეთ ჰარის, რომელიც ხვდება სალის : )
“სახლი ტბის პირას”
თუ გაინტერესებთ, როგორია წარმატებული რომანტიკული ფილმის ფორმულა, ახლავე გაგიმხელთ: კიანუ რივზი, სანდრა ბალოკი, ლამაზი სახლი ტბის პირას, შემოდგომის ფერები და ჯადოსნური ფოსტის ყუთი. თუ ეს ფილმი არ გინახავთ, მაშინ ზამთრის დადგომას არ დაელოდოთ და შესაფერის სეზონზე უყურეთ.
“რაშმორი”
მაქს ფიშერი ამბიციური და მეამბოხე ბიჭია, რომელიც საკუთარ მასწავლებელზეა შეყვარებული. მთელი ამბავი კი შემოდგომის სემესტრში ვითარდება. შესაბამისად, თავისუფლად შეგიძლიათ, არჩევანი სწორედ “რაშმორზე” შეაჩეროთ.
“ელმოს ცეცხლი”
დემი მური, ჯუდ ნელსონი, ემილიო ესტევეზი და რობ ლოუი კოლეჯელი მეგობრები არიან, რომლებსაც ერთად უწევთ, შეეჯახონ იმ დაბრკოლებებსა და პრობლემებს, რომლებიც ზრდასრულობასთან ერთად ჩნდება. ეს ნამდვილად შემოდგომური ფილმია, განსაკუთრებით კი იმ ნაწილში, როცა სამეგობრო ჯორჯტაუნის ფოთლებით დაფარულ ქუჩებში დასეირნობს.
“რუდი”
შონ ასტინი დანიელის, იგივე რუდის როლს ასრულებს. ეს არის ნიჭიერი ახალგაზრდა, რომელიც ნოტრ-დამში ფეხბურთის თამაშზე ოცნებობს. ფილმი არა მხოლოდ შემოდგომის ულამაზესი კადრებითა და თბილი განწყობითაა სავსე, არამედ მაყურებელს აგრძნობინებს, როგორი სულისკვეთება და შემართება აქვს მთავარ გმირს და რისი მიღწევა შეიძლება ოცნებისა და მოქმედების ერთობლიობის შემთხვევაში.
“კარგი უილ ჰანტინგი”
როცა ოქტომბერი დგება, რამდენიმე ჩრდილოამერიკული ქალაქი ყველა დანარჩენ ადგილზე ლამაზი ხდება. ეს ადგილები კი მრავლადაა ნაჩვენები ფილმში, რომელიც ახალგაზრდა გენიოსზე მოგვითხრობს, რომელიც პირად პრობლემებსა და დაბრკოლებებზე თავის თერაპევტს ერთ ლამაზ, ჭრელი ფოთლებით სავსე პარკში ესაუბრება. დაგვიჯერეთ, ამის ნახვა და მათი მოსმენა ნამდვილად ღირს!
“მკვდარი პოეტების საზოგადოება”
სიუჟეტი ჯერ კიდევ სკოლის პერიოდში ვითარდება. ყველაფერი მოკლედ რომ გადმოვცეთ, გეტყვით, რომ ამ სკოლის ერთ-ერთი მასწავლებელი რობინ უილიამსის პერსონაჟია და ის ყველაფერს აკეთებს იმისათვის, რომ ნიჭიერი ბავშვები აღმოაჩინოს. დასასრულს საიდუმლოდ დავტოვებთ. სეზონს კი, ალბათ, მიხვდით – ყველაფერი შემოდგომაზე ხდება : )
“ჰანა და მისი დები”
გაზაფხული თუ განახლების სეზონია, შემოდგომა ცვლილებების პერიოდი ხდება! ცვლილებებში, რა თქმა უნდა, კარგიც იგულისხმება და ცუდიც. მოკლედ, ჰანას მოუსმინეთ – ის ყველაფერს მოგიყვებათ : )
“ბაღების შტატი”
ზაფხული დამთავრდა და ენდრიუ ბრუნდება ნიუ-ჯერსიში, სადაც ნატალი პორტმანის პერსონაჟს ხვდება და მასთან საოცარ სულიერ სიმშვიდეს პოულობს, რაც ეხმარება, წარსულს დაემშვიდობოს და მომავლის იმედი იქონიოს. რა თქმა უნდა, მსგავს შეხვედრას კიდევ უფრო რომანტიკულს ხდის ირგვლივ არსებული შემოდგომა, რომელიც ნატალი პორტმანთან ერთად კიდევ უფრო ლამაზი და სასიამოვნოა.
“შემოდგომა ნიუ-იორკში”
თითქოს, სათაურიდანვე ყველაფერი ნათელია, მაგრამ ეს ფილმი ხომ გაცილებით მეტია, ვიდრე უბრალოდ შემოდგომა ნიუ-იორკში. ვაინონა რაიდერი და რიჩარდ გირი შესანიშნავად ახერხებენ, თავიანთი პერსონაჟების სიყვარულის ისტორია შემოდგომასავით ლამაზად გაგვიმხილონ და თანამონაწილე გაგვხადონ მოვლენებისა, რომლებსაც კიდევ უფრო ამშვენებს სეზონი დარაბებს მიღმა : )
რა თქმა უნდა, სია არასრულია და სიამოვნებით მივიღებთ თქვენს შემოთავაზებებსაც : )
წყარო: allmovies.ge