ამბავი, რომლის შესახებაც მინდა გიამბოთ, გულგრილს ვერავის დატოვებს.
სიყვარულის ისტორია, რომელსაც ძალიან მძიმე ფინალი აქვს, თბილისის ერთ-ერთ სკოლაში განვითარდა. ორ ახალგაზრდას - ნიკას და ემას (სახელები შეცვლილია) ერთმანეთი უზომოდ შეუყვარდათ. ნიკა საყვარელ ადამიანს სიურპრიზებით, საჩუქრებით ანებივრებდა, უზომო სიყვარულს არაერთი გიჟური ქმედებით უმტკიცებდა, უნდოდა, მისი სახე მუდამ ბედნიერი და გაცისკროვნებული ენახა. ემა მაშინ მეცხრე კლასის მოსწავლე იყო, თუმცა მცირე ასაკს სიყვარულისთვის პრობლემად არ თვლიდა. საპირისპიროს აზრზე იყვნენ მისი მშობლები, რომლებიც ამ ურთიერთობის კატეგორიული წინააღმდეგნი იყვნენ. ემას დედამ კლასის დამრიგებელს და ამავდროულად, ფსიქოლოგს უმორჩილესი თხოვნითაც კი მიმართა, რომ ის შვილის „გამოფხიზლებაში“ დახმარებოდა, რომელიც, დედის აზრით, გამოუსწორებელ შეცდომას სჩადიოდა. თუმცა ემას მშობლებისთვის შვილის ასაკი წინააღმდეგობის ერთადერთი მიზეზი არ იყო - მათთვის მეტად საგანგაშო ნიკას ნაკლებად განათლებული, ერუდირებული და შეძლებული ოჯახი აღმოჩნდა.
უამრავი დაბრკოლების მიუხედავად, ნიკა და ემა მაინც დაოჯახდნენ, თუმცა... სამწლიანი ოჯახური თანაცხოვრება ცოტა ხანში ნამდვილ ჯოჯოხეთად იქცა. ემას ოჯახის მიერ წყვილის ცხოვრებაში უხეშმა ჩარევამ მათ ურთიერთობას ბზარი გაუჩინა. ემას დედამ ყველაფერი გააკეთა, ყველა არსებული საშუალება გამოიყენა, რომ მისი შვილი ფეხმძიმედ არ დარჩენილიყო. გოგოს მუდმივად ჩასჩიჩინებდნენ, რომ ნიკა მას „არ შეეფერებოდა“, რომ ის გაცილებით უკეთეს ცხოვრებას იმსახურებდა, რომ ეს ურთიერთობა შეცდომა იყო და ემას ამისთვის წერტილი უნდა დაესვა.
„კეთილისმსურველთა“ თავგამოდებულმა მცდელობამ შედეგი გამოიღო. ერთ დღეს ცოლმა ნიკას დასასვენებლად წასვლა მოსთხოვა. ბიჭმა უპასუხა, რომ მას მატერიალური შესაძლებლობა ამის საშუალებას არ აძლევდა... ემამ მასზე უზომოდ შეყვარებული ადამიანი მიატოვა... ცოტა ხანში ის ბათუმში მამიდასთან ერთად გაემგზავრა. ემაზე უზომოდ შეყვარებულმა ნიკამ ცოლს ჩააკითხა და დაბრუნება სთხოვა. გოგოს კატეგორიული უარით გულმოკლული ბიჭი სასოწარკვეთილებამ შეიპყრო, გონებაარეული მივიდა დაღუპული ოთხი წლის ძმის საფლავთან, ყელის არეში ორლულიანი თოფი მიიბჯინა და თავი მოიკლა. მას გულზე ცრემლებით დანამული საყვარელი ადამიანის, ემას, ფოტო ჰქონდა მიმაგრებული...
შვილის დაღუპვით სასოწარკვეთილი ნიკას დედა ემას ცხედართან არ უშვებდა, მაგრამ მოგვიანებით ერთმა საოცარმა ფაქტმა მას აზრის შეცვლა აიძულა - სასოწარკვეთილმა დედამ შეამჩნია, რომ მიცვალებული ტიროდა. დედამ ჩათვალა, რომ ამით მისმა შვილმა უკანასკნელი სურვილი გამოხატა - უნდოდა მისთვის ყველაზე საყვარელ ადამიანს გამომშვიდობებოდა.
ამ შემზარავი ტრაგედიიდან ორმოცი დღე ახლახან გავიდა.
დღეს ემა ძალიან მძიმე სულიერ ტკივილებს განიცდის. გოგოს ოჯახსაც არანაკლები სატანჯველი აქვს - მშობლისთვის შვილის უბედურებაზე დიდი სასჯელი არაფერია.
მსგავსი ფაქტები ჩვენს რეალობაში არცთუ ისე იშვიათია. ხშირად მშობლები, გააზრებულად თუ გაუაზრებლად, შვილების ცხოვრებაში უხეშად ჩარევით, მათ ბედნიერების შესაძლებლობას ართმევენ. ბუნებრივია, ყველა მშობლის მიზანი შვილის კეთილდღეობაა, მაგრამ ...
წყარო: sazogadoeba.ge
რატომ ატირდა მიცვალებული? - ბავშვური სიყვარულის ტრაგიკული დასასრული
⏱️ 1 წთ.
👁️ 1 386
100%