გეთანხმებით, სადავიდარაბო კითხვებია, მაგრამ ადამის ბიოგრაფებს მართლაც სასწაულად გაუმართლა - ვატიკანის ბიბლიოთეკის ერთ ბნელ კუნჭულში ისინი გადააწყდნენ ხის რამდენიმე კოპიტულას, რომლებზეც ადამიანის ფიგურები იყო ამოტვიფრული. ერთ-ერთი ფიგურა ადამს განასახიერებდა და თან ყოვლად შეუვალი წარწერაც ახლდა:
„მე ვარ ადამი, მამა ყოველი სწავლულობისა“.
ესეც არაფერი - უცნობ სკულპტორს იქვე ანბანიც ამოეჩუქურთმებინა და თან განმარტებაც დაერთო - „ესე არს ანი და ბანი ძველსამოთხური ენისა“. ადამური სიბრძნის თაყვანისმცემლებს მეტიც არ უნდოდათ: მთელ დედამიწას მაშინვე აცნობეს, რომ აღმოჩენილი იყო უუძველესი დამწერლობა, რომლითაც უეჭველად სარგებლობდა თვით ადამი. რასაკვირველია, ასოებიც გადმოიხატეს და გამოაქვეყნეს. ამ აღმოჩენის კვლევაზე სამი სახელოვანი მეცნიერი მუშაობდა: იტალიელი ანჯელო როკა, ინგლისელი ჯეიმს ჰეპბერნი და გერმანელი ლაურენციო შრადერი - პრუსიის მეფე ფერდინანდის კარის მრჩეველი.
თუმცა, ამ პატივცემულ მეცნიერებს ერთი იაღლიში მაინც მოუვიდათ - მათ მიერ გადმოხატული ანბანის ასოების მოხაზულობა ერთმანეთს არ ემთხვეოდა. ასე რომ, საეჭვოა, იმ მისტიური ანბანის საიდუმლოს ამოხსნა მეცნიერებამ ათასი წლის შემდეგაც მოახერხოს.
მას მერე, რაც ვატიკანის ბიბლიოთეკის ბნელ ხვეულებში ნაპოვნმა უძველესმა ანბანმა მზის სინათლე იხილა, ძნელი აღარ იყო იმის დადგენა, რაზე წერდა ადამი თავის სამეცნიერო ნაშრომებს - თურმე, ჩვენს ყოვლისმცოდნე და ყოვლისშემძლე დიდ წინაპარს ცხოველის ტყავისგან პერგამენტი დაუმზადებია, მელანი და კალამიც გამოუგონია და ასე დამჯდარა წერად ნაშრომებისა.
მალე გამოჩნდა ვინმე მეცნიერი ერიკუსი, რომელიც მიღწეულით არ დაკმაყოფილდა და მიზნად დაისახა, რადაც არ უნდა დაჯდომოდა, გაერკვია, როგორ გამოიგონა ადამმა თვითეული ასოს მოხაზულობა. მისი აღმოჩენებიდან აქ მხოლოდ ორიოდეს მოგახსენებთ.
როცა ღვთისგან გაჩენილმა ადამმა პირველად თვალი გაახილა და სამოთხე იხილა, მისი მშვენიერებით მოხიბლულს პირველად ეს აღმოხდა - „OOO“! რა თქმა უნდა, ამ წამოძახილისას მისი ტუჩები მოიკუმა და მომრგვალდა. ამის შემდეგ ამ ბგერის გამომთქმელი მომრგვალებული ფორმის ტუჩების ჩახატვა ძნელი არ უნდა ყოფილიყო. ასე შეიქმნა ასო „O“.
მეორე ასო იყო „U“. ეს მაშინ მოხდაო, გვარწმუნებს ავტორი, როცა ადამმა ევა პირველად იხილაო - ადამი მომავალ მეუღლეს მიუახლოვდა, დაყნოსა და ფრიად ნასიამოვნებს აღმოხდა ბგერა, რომელიც ერთდროულად ტუჩებისა და ცხვირის ნესტოების დაჭიმვას მოითხოვდა. კაცობრიობის დიდ პაპას სწორედ ამ შემთხვევამ უკარნახა მომდევნო ასოს მოხაზულობაო, გვამცნობს მეცნიერი.
მთარგმნელის შენიშვნა: ალბათ, ძალიან საინტერესო იქნებოდა იმის კვლევა, თუ ვინ უკარნახა ქართული ასოების მოხაზულობა ნეტარხსენებულ მესროპ მაშტოცის.
წყარო: funtime.ge