მას შეუძლია აზიდოს ტვირთი, რომელიც იწონის 300 კგ–ს 24 ფუტი სიმაღლეზე; იგი იყენებს ბლოკების კომპლექსურ სისტემას – უზრუნველყოფს გალიის კარების გახსნასა და ცხოველების აზიდვას ერთდროულად. ექსპერტებს დასჭირდათ დაახლოებით წელიწადნახევარი, რათა აეგოთ ეს მექანიზმი. ამასთან, მეტი დამაჯერებლობისათვის მეცნიერებმა მხოლოდ ის მასალა გამოიყენეს, რაც ძველ რომში მოიპოვებოდა. ლიფტი დარჩება კოლიზეუმში როგორც მუდმივმოქმედი ექსპონატი. „იგი ხალხს წარმოდგენას შეუქმნის თუ როგორი იყო კოლიზეუმი ძველად“, აცხადებს ფრანჩესკო პროსპერიტი, რომის კულტურული მემკვიდრეობის სამსახურის უფროსი.
ამ დანადგარის ამოქმედებას დასჭირდებოდა რვა მონა, რომელთაც ერთობლივი ძალით უნდა დაეძრათ დანადგარის შუაგულში მდებარე ხის დიდი ბუნი. ამფითეატრი წარმოადგენდა ათასობით სიკვდილის სცენას – როგორც ადამიანების, ასევე ცხოველების.
ამ პროექტზე დაიხარჯა 20 მილიონი ევრო. მასში შედის რეკონსტრუქციის შესახებ დოკუმენტური ფილმის მომზადებაც.
გარი გლასმანი, კოლიზეუმის დოკუმენტური ფილმის პროდიუსერი, ამბობს, რომ ამ ფილმის გადაღებისას, ექსპერიმენტის სახით მგელი შემოიყვანეს ამფითეატრის სცენაზე. მისი სიტვებით: „ამდენი ხნის შემდეგ პირველად მოხდა რომ კოლიზეუმის სცენაზე გარეული ცხოველი იქნა გაშვებული. მე სიამოვნებით გამოვიყენებდი ლომს, მაგრამ მაშინ უსაფრთხოების წესები უნდა გაგვეთვალისწინებინა. ბოლოს და ბოლოს მგელი ვარჩიეთ. იგი ხომ რომის სიმბოლოა. ერთ–ერთი მიზეზი, რის გამოც კოლიზეუმით დავინტერესდით, არის ის ფაქტი, რომ აქ სასტიკ ძალადობას ჰქონდა ადგილი“.
ათასობით ცხოველი დაიღუპა ამ არენაზე, რომელიც მიწისქვეშა დილეგში ბინადრობდნენ და ბრძოლისას ამოჰყავდათ ლომები, ვეფხვები, ლეოპარდები, დათვები,გარეული ტახები.
„ასეთი ლიფტების რაოდენობა აქ უფრო მეტი იყო, ვიდრე სხვა რომაულ ამფითეატრებსა და რომაულ შენობებში“, ჰყვება როსელა რეა, კოლიზეუმის დირექტორი. „ხის ლიფტი აიგო არამხოლოდ საჯარო გამოფენისთვის, არამედ ისტორიული რეკონსტრუქციისა და შესწავლის მიზნითაც. ამ დავალებას ექსპერიმენტული არქეოლოგიის წარმომადგენლებმა ბრწყინვალედ გაართვეს თავი.“
დატყვევებულ ტუსაღებში მეტი წილი ალბათ ქრისტიანები შედიოდნენ;მათ ცხოველებს აგლეჯინებდნენ. მაგრამ ბოლომდე არაა გარკვეული, ყველა ქრისტიანი იღუპებოდა კოლიზეუმში თუ არა. ისტორიკოსები მერი ბერდი და ქეით ჰოპკინსი აცხადებენ, რომ არ არსებობს ისტორიული ჩანაწერები საკუთრივ ქრისტიანები იღუპებოდნენ თუ არა ამფითეატრში. მათი აზრით, მხოლოდ მოგვიანო საუკუნეებში მოხდა ქრისტიან მწერალთა მიერ კოლიზეუმის მოწამეთა ტაძრად შერაცხვა.
alioni.info