ფოტოგრაფი მძიმე დაავადებების მქონე ბავშვებს ოცნებების ასრულებაში ეხმარება (+ფოტოები)

არ არსებობს ალბათ, ქვეყანაზე იმაზე უფრო დიდი ბედნიერება, ბავშვებს, მით უფრო, ჯანმრთელობის პრობლემების მქონე პატარებს, ოცნებების ასრულებაში რომ ეხმარები.
კანადელი ფოტოგრაფი შონ ვან დელი სწორედ მძიმე დაავადებების მქონე ბავშვების ოცნებებს ასხამს ფრთებს და მათ ყოველდღიურ ცხოვრებას ულამაზესი ფერებით რთავს.
შონ ვან დელი გამოჯანმრთელებაზე მეოცნებე ბავშვების ნახატების მიხედვით ჯადოსნურ ფოტოებს ქმნის, რომლებშიც მთავარ როლში სწორედ მეოცნებე პატარები არიან.
ფოტოგრაფი მიიჩნევს, რომ ეს ყველაფერი ბავშვსაც და მის ოჯახსაც სიცოცხლისთვის ბრძოლაში ძალებს ჰმატებს და ალბათ, ეს მართლაც ასე იქნება.

- ბავშებს ყოველთვის ვამხნევებ და ვეუბნები, რომ იმედი არასოდეს დაკარგონ, რომ შეუძლებელი არაფერია! - ამბობს კანადელი ფოტოგრაფი...





7 თვის იყო რაილი, როცა გულის გადანერგვის უმძიმესი ოპერაცია ჩაუტარდა. დღეს იგი ინტერნეტ-რეესტრის მონაწილეა, რომელიც დონორებს ეძებს...







დევიდს გულის მარცხენა ნაწილები დაბადებიდან განუვითარებელი აქვს, რის გამოც უკვე ჩაუტარდა 3 უმძიმესი ოპერაცია. მართალია, დევიდს გულის გადანერგვა ესაჭიროება და სიტუაცია საკმაოდ მძიმეა, მაგრამ პატარამ იცის, რომ ყველა ოცნება აუცილებლად აუსრულდება!..







2011 წლის ივნისში ჩენსის მწვავე ლიმფობლასტური ლეიკოზის დიაგნოზი დაუსვეს. ქიმიოთერაპია მას 2014 წლის ოქტომბრამდე უნდა ჩაუტარდეს, რომელიც რა შედეგს გამოიღებს, რთული სათქმელია... და მაინც, სიცოცხლის წყურვილი ჩენსისაც, მის ოჯახსაც და გარშემომყოფებსაც ბედთან შეგუების უფლებას არ აძლევს!







ეს უმშვენიერესი პატარა სულ რაღაც 1 თვის იყო, როცა ღვიძლზე უმძიმესი ქირურგიული პროცედურა ჩაუტარეს, თუმცა უშედეგოდ - 3 თვის შემდეგ აღმოჩნდა, რომ აუცილებელია გადანერგვა. საბედნიეროდ, ორგანოს შოვნა 8 დღეში მოხერხდა და ალექსანდრიას სიცოცხლეს დონორის წყალობით აღარაფერი ემუქრება.







დოუსონს მენინგიტი 2 თვის ასაკში განუვითარდა, რასაც ტვინში სისხლის ჩაქცევა მოჰყვა. ინფექცია გავრცელდა თირკმლებსა და შარდის ბუშტშიც. არაერთ სნეულებასთან ბრძოლაში პატარამ თავისი სიცოცხლის პირველი წლები საავადმყოფოში გაატარა.
დღეს დოუსონი დროის უმეტეს ნაწილს ინვალიდის სავარძელზე მიჯაჭვული ატარებს, მაგრამ ოცნებაზე უარს მაინც არ ამბობს!!! მას სჯერა, რომ ერთხელაც ყველაფერი მისთვის სასიკეთოდ დასრულდება...







დააკვირდით ამ პატარას ბედნიერებით გაცისკროვნებულ სახეს - მას სიცოცხლე უყვარს, მას სიცოცხლე სწყურია და თავისი უმაკო ღიმილით აუცილებლად ყველაფერს დაამარცხებს!!!

სედის ზუსტი დაავადების სახელწოდება და სიმპტომები უცნობია. შეგვიძლია მხოლოდ იმის თქმა, რომ ბავშვი პრაქტიკულად, მუდმივად სახლშია და მთელ დროს სიბნელეში ატარებს, რადგან მზის სხივები მასზე დამღუპველად ზემოქმედებას ახდენს.







დომინიკი დაუნის სინდრომითა და გულის უკმარისობით დაიბადა. უკვე ჩაუტარდა არაერთი ოპერაცია და მშობლებთან მხოლოდ მიმიკითა და ჟესტებით ურთიერთობს.
ყველაფრის მიუხედავად, მისი საოცრად მომხიბვლელი და გადამდები ღიმილი თავგადასავლებისადმი მზადყოფნას ირეკლავს...







სიცოცხლის 34-ე დღეს მარკოს გული გადაუნერგეს. 4 წლის ასაკში ახლა კიბოსთან აღმოჩნდა პირისპირ, მაგრამ ისიც გაანადგურა! მარკოსთვის ყველაფერი შესაძლებელია - ჯადოსნური ვაშლების გამოგონებაც კი...





22 თვისას, ტრევისს ნაწლავური ჩხირების გამო მუცლის ღრუს პრობლემები შეექმნა. ოპერაციის შემდეგ მსხვილი ნაწლავის 80 პროცენტის გარეშე დარჩა და მხედველობაც დაკარგა.

დღეს ტრევისი 7 წლის არის, საოცრად თავდაჯერებულია და ძიუდოში ვარჯიშობს. მას სჯერა, რომ შესაძლებელია, სამყარო ცუდი ადამიანებისგან დაიხსნას.
იმის გამო, რომ ტრევისი უსინათლოა, ვერაფერი დახატა, თუმცა შონ ვან დელს საკუთარი ოცნება სიტყვებითაც შესანიშნავად გადასცა.







კესი თანდაყოლილი რეტის სინდრომით დაიბადა - გონებრივი ჩამორჩენილობა, რომელიც მხოლოდ გოგონებში ვლინდება. 14 თვისამ სიტყვების წარმოთქმა შეწყვიტა და ახლადშეძენილი მოძრაობითი და საგნობრივ-როლისებრი (შესაძლოა, "საგნობრივ-როლისებრი" არასწორად გადათარგმნილი სიტყვები იყოს, რისთვისაც ბოდიშს გიხდით) უნარების დაკარგვა დაიწყო.

დღეს კესი 21 წლისაა და სამყაროს ღიმილითა და სიცილით ეკონტაქტება...







მაკენა შეფერხებული ფიზიკური განვითარებით დაიბადა, რის გამოც 4 თვის ასაკში სარისკო ოპერაცია გაუკეთდა - მოკვეთეს თავისქალის ნაწილი, რათა ტვინის უფრო სერიოზული დაზიანება აღარ მომხდარიყო. გარდა ამისა, მაკენას აუტიზმიც აქვს, მაგრამ სასწაულების მაინც სჯერა!..







ჯეკი ღვიძლის უიშვიათესი დაავადებით დაიბადა, რასაც ღვიძლის უკმარისობა მოჰყვა. 2 თვის შემდეგ, საბედნიეროდ, ტრანსპლანტაცია წარმატებული აღმოჩნდა.
პატარას უკვე უამრავი ოპერაცია ჩაუტარდა, უახლოეს მომავალში კი შესაძლოა, კიდევ ერთი ტრანსპლანტაციაც დასჭირდეს.







ბადურას დაზიანების გამო, კუპერი 5 წლიდან სტიკლერის სინდრომს ებრძვის, რომელიც ზემოქმედებს თვალებზე, სმენაზე, სახსრებზე, იწვევს ართრიტს. მაგრამ კუპერი სამყაროს მაინც ისეთს ხედავს, როგორიც სინამდვილეშია - საოცრებებითა და შესაძლებლოებით აღსავსე...







9 წლის იყო კაილა, როცა კრონის დაავადება გაუჩნდა - ნაწლავების ანთებითი ავადმყოფობა. ყოველდღე ის დაავადების კონტროლს ცდილობს, რათა ცხენზე დაჯდომის შესაძლებლობა არ დაკარგოს. სამწუხაროდ, თანამედროვე მედიცინას არ გააჩნია არანაირი პრეპარატი, რომელიც მოზარდს დაეხმარებოდა, თუმცა კაილას იმედი ჯერ არ დაუკარგავს!







ენერგიული ნაომი 5 წლისაა და მიტოქონდრიალური მიოპათია სჭირს. 2 წლამდე იგი პრაქტიკულად, ვერ მოძრაობდა, დღეს კი სიმღერასაც ახერხებს და ცეკვასაც.
რატომღაც, ნაომი ძალიან მალე იღლება და არავინ იცის, რამდენად მარტივი იქნება შემდეგი ვარჯიში, მაგრამ ის მაინც ყველაფერს აკეთებს იმისთვის, რათა ნებისმიერ სირთულეს გაუმკლავდეს, რათა შთააგონოს ადამიანები, რომლებიც გარს ახვევია.
თუ საკუთარი თავის გჯერა, ყველაფერს შეძლებ - პატარა პეპელასავით ფარფატსაც კი!!!

alia.ge