უფლის წყალობა
ყველა საქმე და უსაქმურობა ადამიანზე უფლის ნებით ხდება. ადამიანს კი აქვს გონი, რომლითაც უნდა გაარჩიოს, რაოდენ საჭიროა მისთვის კეთილგონიერი და უფლისმოშიში ცხოვრება.
„უფალი გიგზავნის თავის მოსაგებელს, არა მისი მსახურების, ღირსების ან სისუსტის შესაბამისად, არამედ შენი განწყობის მიხედვით“ - წმინდა იოანე ოქროპირი.
ამისთვის საჭიროა, ჭეშმარიტ მორწმუნეს ჰყავდეს მოძღვარი, რომელიც გაჭირვებასა და დალხინებაში დაარიგებს და სწორ გზაზე დააყენებს.
საეკლესიო მოძღვრების მთავარი არსი ადამიანის რწმენაა, რომელსაც ამტკიცებს მოძღვარი, უფალი კი აძლევს ძალას, რომ მცდარი ნაბიჯებისგან თავის არიდება მოახერხოს.
უმეცრება და ცოდვა
ხშირად ადამიანი თავისი უმეცრებით და სინანულის არქონით, დიდ ცოდვაში ვარდება.
ამის თავიდან ასაცილებლად აუცილებელია სასულიერო წიგნების კითხვა და ეკლესიაში სიარული.
ამ დროს მორწმუნე უფლის ყველა მადლს სრულყოფილად მიიღებს და მისი შეწევნით სულიერი ბედნიერების ნეტარებას შეიგრძნობს.
პრობლემების ძირითადი ნაწილი სწორედ უმეცრების გამო ხდება, თუმცა ამის მიუხედავად, ადამიანი არ ცდილობს, უფლის სიახლოვეში ეძებოს ხსნა და იწყებს მარტივი და ჯოჯოხეთური გზების ძიებას.
ხშირად ქალები (ასევე, კაცებიც) ბედის გახსნისთვის მიმართავენ მოლებს, მკითხავებს. სამაგიეროდ იღებენ სიტყვიერ დაპირებებს და ეშმაკის მორჩილებაში ხვდებიან.
ეს დამამძიმებელი ცოდვაა, რაც უფლისთვის ზურგის შექცევას ნიშნავს.
საჭიროა სწორად დაისვას კითხვა, ნუთუ არსებობს რაიმე ღმერთზე ძლიერი?
მაშინ რატომ ეძებს გზააბნეული კაცი სხვაგან ხსნას. იმიტომ, რომ ჭაობში შესვლა ყოველთვის ადვილია, სამაგიეროდ გამოსვლაა რთული.
თუ ადამიანი შეცდა, მაშინ მისი რწმენა საეჭვოა და არც ჭეშმარიტი მორწმუნე ყოფილა. მას ღმერთთან საერთო არაფერი აქვს და არც ზიარებას იმსახურებს. იგი ეშმაკმა ეკლესიას მოსწყვიტა.
გამოსავალი კი მხოლოდ ერთია: სინანული, სინანული და ლოცვა.
მსახურება დაოჯახებისა და ბედის გახსნისთვის
ეკლესიაში ტარდება ორმოცი ლოცვა-წირვა, რომლის შეწევნითაც მორწმუნეები ქმნიან ბედნიერ ოჯახებს და მიეცემათ შვილები.
ეს ადამიანები მიდიან მოძღვართან და ხშირად თითოეულ მათგანზე ინდივიდუალურად და შეკვეთით ტარდება მსახურება.
ორმოცი ლოცვა-წირვის ჩასატარებლად აუცილებელია, ადამიანი იყოს ჭეშმარიტი ქრისტიანი და საღვთო სჯულის წესების მიმყოლი.
ასეთ ადამიანს უფლის შეწევნა გააძლიერებს და ბედნიერ, მორწმუნე ოჯახს შეაქმნევინებს.
ასევე, მორწმუნეს შეუძლია, სახლშიც წაიკითხოს ბედის გახსნის, დაოჯახების და დანგრეული ოჯახების აღდგენის კანონიკური ლოცვები.
გასათვალისწინებელია ის ფაქტი, რომ ეკლესიაში ლოცვისას მლოცველს დიდი მადლი ეძლევა, რომელსაც სახლში ლოცვისას ვერ მიიღებს.
ასევე, მოძღვარი მის ლოცვას სწორ მიმართულებასა და ძალას ანიჭებს. ამიტომ სახლში ლოცვების პარალელურად, აუცილებელია ეკლესიასთან მჭიდრო კონტაქტი.
სამწუხაროდ, დღევანდელ რეალობაში ქალები უფრო ხშირად მიდიან მოძღვართან და ბედის გახსნის ლოცვის ჩატარებას სთხოვენ.
მამაკაცები უფრო შეკრულები არიან, რადგან კაცის გუნებაა ასე მოწყობილი, იგი ძნელად შედის სარწმუნოებაში.
საქართველოში ქალის რწმენაზეა დამოკიდებული ყველაფერი და თუ ამ ქვეყანაში ქართველობა და ქრისტიანობა არსებობს, ეს ქალის დიდი რწმენის შედეგია.
ქალწულის ლოცვა ღმრთივსათნო მეუღლის მიმადლებისთვის
ჰოი, უფალო მრავალმოწყალეო, არაი მოლტოლვილ ვარ სხვისა მიმართ მკურნალისა
და არცა განმიმარტებიან ხელნი ჩემნი ღმრთისა მიმართ უცხოისა,
არამედ შენისა სახიერებისა მიმართ,
რამეთუ შენ ხარ უფალი ღმერთი, რომელსა გაქუს ხელმწიფებაი ყოველთა სულთაი
და არა განაგდებ ვედრებასა შენდამი მოლტოლვილთასა.
შენ სთქუ, უფალო, ითხოვდით და მოგეცეს თქუენ.
ნუ განმიშორებ ვედრებასა ჩემსა, სახიერო, შემიწყალე მე, უფალო, ისმინე სახიერებისა შენისათვის. ზეგარდამომივლინე მადლი შენი მხევალსა ამას შენსა და დამიფარე ამპარტავნებისა და ცუდმეტყუელებისაგან;
დაე გონიერებაი, თავმდაბლობაი, მოკრძალება და უბიწოებაი მამშუენებდეს მე, რაითა წმიდითა გულითა და მეცნიერებით აღვასრულებდე წმიდათა მცნებათა შენთა,
რამეთუ შენ ხარ, რომელმან დასაბამსა შეჰქმენ მამაკაცი და დედაკაცი და მიანიჭე ბეჭედი მეუღლეობისაი,
ოდეს სთქუ: „არა კეთილ არს ყოფად კაცი მარტო. უქმნეთ მას შემწე მისებრი“
და მოიღე-რაი ერთი გუერდი ადამისი, აღაშენე ცოლად მისა და მიიყუანე მისდა.
და ვითარცა დალოცე და აკურთხე ისინი, და დაუდგინე განმრავლებაი და იყუნენ ორნივე ერთ-ხორც, ეგრეთვე შეისმინე ღაღადებაი ჩემი, ქალწულებრივი გულიდან აღმოქუმული შენდა მომართ:
ჰოჲ, მეუფეო ყოვლადწმიდაო, მომეც მე მეუღლე პატიოსანი და ღმრთისმოსავი, რაითა არა ვნებითა და მანკიერებითა, არამედ კრძალულებითა და მორჩილებით გავსწიო უღელი ტვირთმძიმე მეუღლეობისაი.
უფალო ღმერთო ჩუენო, რომელი საკრველითა სიყუარულისაითა შეჰკრავ განუხსნელად,
ერთობაი ჩუენი განუშორებელად დაამტკიცე და მოგუმადლე კეთილშვილიერებითი სიცოცხლეი,
რაითა სიყუარულითა და თანხმობით ვმადლობდეთ ყოვლადწმიდასა სახელსა შენსა,
მამისა, და ძისა, და წმიდისა სულისა, აწ და მარადის, და უკუნითი უკუნისამდე,
ამინ.
ლოცვა მოციქულ სვიმონ კანანელისადმი ბედნიერი ქორწინებისთვის
წმიდაო დიდებულო და ყოვლადქებულო მოციქულო ქრისტესო სვიმონ,
რომელი ღირს-იქმენ მიღებად სახლსა შინა შენსა კანას გალილეასა უფლისა ჩუენისა იესუ ქრისტესა
და ყოვლადწმიდისა დედისა მისისა, დედუფლისა ჩუენისა ღმრთისმშობელისა,
და თუალითა შენითა მხილველ-იქმენ ყოვლადდიდებულისა სასწაულისა ქრისტესსა, ქორწილსა შინა შენსა აღსრულებულსა, წყლისა ღვინოდ გარდაქცევისა!
გვედრით შენ სარწმუნოებითა და სიყვარულითა:
ევედრე ქრისტესა უფალსა, რათა სულნი ჩუენნი ცოდვისმოყვარული გარდააქციოს ღვთისმოყვარულად;
დაგვიცვენ და დაგვიფარენ ჩუენ ლოცვითა შენითა განსაცდელთაგან საეშმაკოთა და დაცემათაგან ცოდვისათა და გარდამოგვივლინე ჩუენ ზეგარდამო შეწევნაი მოწყენილობათა შინა ჩუენთა და უძლურებათა, რათა არა შემიბრკუნეს სვლანი ლოდსა ზედა საცთურისასა, არამედ უცვალებელად ვიარებოდეთ მაცხოვნებელსა გზასა მცნებათა ქრისტესთა, ვიდრეღარა მივიწეოდეთ ნეტართა მათ სავანეთა სამოთხისათა, სადაცა შენ განსვენებულხარ და სიხარულსა ეძლევი.
ჰოი, მოციქულო მაცხოვრისაო!
ნუ გუარცხვენ ჩუენ, რომელთა სასოებაი მტკიცე დაგვიძს შენზედა,
არამედ შემწე და მფარველ გუექმენ ჩუენ ყოველთა დღეთა ცხოვრებისა ჩუენისათა,
რათა ღმრთისმოსაობასა და ღმრთისსათნომყოფელობასა შინა განვლოთ საწუთროი ცხორებაი ესე, კეთილსა და მშვიდობითსა ქრისტიანულსა აღსასრულსა მივემთხვივნეთ და
წრფელსა პასუხის-გებასა ღირს-ვიქმნეთ საშინელსა სამსჯავროსა ქრისტესსა;
განრომითა საზვერეთა ჰაერისმცუელთასა და ხელმწიფებისაგან ბოროტისა ამის სოფლისა თავადისათა, დავიმკვიდროთ სასუფეველი ცათაი და ვადიდებდეთ დიდადშუენიერსა სახელსა
მამისა და ძისა და სულისა წმიდისასა უკუნითი უკუნისამდე.
ამინ.
ავტორი: ლევან გველესიანი
www. funtime.ge