საშობაოდ სავედრებელი ყოველთა ქართველთა და ოცნება წმიდად ქართული: ლოცვა XXI ასწლეულისა



ქალი უცხოეთში გახიზვნას არიდე, კაცს საბერძნეთ-იტალიიდან ცოლის გამოგზავნილი ფულით ნაყიდი არაყი და ღვინო, ყანწი და სასმისი ხელიდან გააგდებინე და გუთანი და წიგნი მოაძებნინე...

ბეთლემსა შინა შობილო, განკაცებულო იესო ტკბილო!

მუხლმოდრეკილი და ცრემლიანი გავედრებ ჩემს ტანჯულ-წამებულ ერსა და მამულს — ჩვენგან დაუცველსა და უპატრონოს. გავედრებ ჩვენგან წაბილწულ მშობლიურ ენასა და შეგინებულ მშობელს, საფიცარს ჩვენსას — დედას.



ნუ მოაკლებ გზას აცდენილსა და ჭამა-სმას გადაყოლილთ დედაშვილობის მადლს, შეაყვარე ყოველ ქართველს საკუთარი მშობელი და აღადგინე დანგრეული ბუდეები — ქართული ოჯახები.

არსთა გამრიგეო, შეგვაძლებინე განკითხვის გარეშე ცხოვრება; მოგვანიჭე სიმდაბლე, სინანული და სიყვარული — გზა ცხონებისა.

მოეც სიბრძნე და კეთილგონიერება ჩემს ობოლ, „გათითოკაცებულ, საშოვარს გადაგებულ“ ერს; აკმარე ჭირი, მონობა, ტანჯვა, ბედშაობა, დარდიმანდობა და სიძულვილი. აშორე შური, ცრემლი, ურჯულობა, ცინიზმი, აგრესია და დაუნდობლობა-სისატიკე.

ღმერთო ძლიერო, შენ მაინც მოხედე და უპატრონე ჩვენს მიტოვებულ სოფლებს მთასა და ბარში; გაათბე ქართველი კაცის კერა, ხელი მოუმართე ყველა მოხუცს, მარტოსულსა და შვილის სითბო-სიყვარულს დანატრებულს; დაუბრუნე ქართველ გლეხკაცს მიწის სიყვარული.

ბეთლემის ბაგაში მწოლარეო უფალო, მოხედე ჩვენს სამოციქულო მართლმადიდებელ ეკლესიას; ჩააცხრე ფარული თუ აშკარა დაპირისპირება, გახადე უფრო უბრალო, უფრო მოწყალე, უპოვართა და არრისმქონეთა განმკითხველი, ცოდვასთან მებრძოლი, მაგრამ ცოდვილის შემბრალებელი და მოყვარული. განგვარიდე სექტები. გვაღირსე უჯიპო, კეთილმსახური, მდაბალი და განსწავლული სასულიერი პირები; გვაშორე სკამებით მორბენალი მოწესენი. ჯერ ძველი, დანგრეული და მოუვლელი ეკლესიები აღგვადგენინე და ახლის შენებას მერეც მოვასწრებთ. გვიმრავლე მონასტრებში მოღვაწე დედანი და მამანი, ოღონდ მათ მაინც მოარიდე „ფეისბუქი“.

გვაღირსე, ნაზარეველო, მრევლი, როგორც ერთიანი ორგანიზმი ეკლესიისა — გონიერი, მშვიდი, მოწყალე და სულგრძელი. გვაპატიე წირვა-ლოცვაზე მობილურების წკარუნი, სასულიერო პირებთან წრეგადასული მეგობრობა, „მარიაჟი” და სულწასულობა.

შეგვინდე ამაოდმეტყველება, უტიფრობა, ფარისევლობა და გულგრილობა; მოაქციე შენგან განდგომილნი, ეკლესიის მგმობელნი და სასულიერო დასთა მებრძოლი მოძულენი.

უფალო, ჩააცხრე პოლიტიკოსთა აგრესია, ვნებები, ამბიციები, გაუნელე სიძულვილი და გაუჩინე ქვეყანას პატრონი, რათა უპატრონოს ეშმაკები არ დაეპატრონონ!

ღმერთო მოწყალეო! ერთმანეთისგან გაგვარჩევინე კეთილი და ბოროტი, მართალი და ფარისეველი. მიმადლე უპოვარს თავშესაფარი, მშიერს — საჭმელი, მწყურვალს — წყალი, საპყრობილეში გამოკეტილებს — გამძლეობა, სნეულებს — კურნება.

გვაშორე ხარბი და გაუმაძღარი, უმადური და თავნება; მოგვიმრავლე ღირსეული ქართველები, რაინდები, მამულიშვილები; ქალი ქალს დაამსგავსე, უცხოეთში გახიზვნას არიდე; კაცს ოჯახის მარჩენალის ფუნქცია აღუდგინე; დომინო, კარტი და ნარდი, საბერძნეთ-იტალიიდან ცოლის გამოგზავნილი ფულით ნაყიდი არაყი და ღვინო, ყანწი და სასმისი ხელიდან გააგდებინე და გუთანი და წიგნი მოაძებნინე.

ჯვარცმულო მაცხოვარო, ერთმანეთის მოსმენა, ხმადაბლა საუბარი, დუმილისა და იდუმალების ესთეტიკა დაგვიბრუნე.

ყველა დაუსაქმებელი დაასაქმე ისე, რომ ყოველ დილით, უთენია, 6 საათზე სამსახურში გარბოდეს. დაგვიბრუნე რიგით კაცად ცხოვრების კულტურა და გვასწავლე თავისუფლების ფასი.

ქართული ოცნების ახდენას შენ გავედრებ, ზეციერო!

საშობაოდ სავედრებელი ყოველთა ქართველთა და ოცნება წმიდად ქართული: ლოცვა XXI ასწლეულისა


ისე ნუ გაგვიყვან ამ ქვეყნიდან, რომ არ მოგვასწრო საქართველოს ერთიანს, ძლიერსა და ღონიერს, დაბინავებულს წიგნითა და სახნისით.

გვაღირსე ერთმანეთზე შეყვარებული და ერთმანეთის ერთგული, საკუთარ მამულს გადაგებული ქართველობა!

www.sputnik-georgia.com
































ტექსტის სანახავად გაიარეთ რეგისტრაცია.