თაფლის ნიღბები ყველანაირი სახის კანისთვის ( სახის მოვლა )



ლოსიონი
ყოველდღიურად კანის გასაწმენდად ადვილი მოსამზადებელია თაფლის ლოსიონი. მას ერთი კვირის სამყოფს ამზადებენ და მინის ჭურჭელში ინახავენ.

თაფლის წყალი მზადდება ერთი სუფრის კოვზის თაფლისა და ორი ჭიქა წყლისაგან. ეს ნარევი კარგად წმენდს კანს და მას ხავერდოვანს ხდის.

თაფლის ლოსიონი. საჭიროა: ერთი ჩაის კოვზი თაფლი, ერთი ჩაის კოვზი გლიცერინი, ერთი სუფრის კოვზი არაყი, 0,2 ჩაის კოვზი ბორაკი და 0,5 ჭიქა წყალი. ჯერ თაფლი შეურიეთ გლიცერინში, შემდეგ წყალი დაუმატეთ, რომელშიც წინასწარ იქნება გახსნილი ბორაკი. არაყი ბოლოს ჩაასხით. ლოსიონი წმენდს და არბილებს კანს.

ნიღბები ნორმალური კანისთვის

აიღეთ ერთი სუფრის კოვზი თაფლი, 7-10 ლიმონის წვეთი და ცოტა შვრიის ფქვილი. ყველაფერი აურიეთ და ფაფა სახეზე დაიდეთ. 20 წუთის შემდეგ ცივი წყლით ჩამოიბანეთ. ნიღაბი აუმჯობესებს სახის ფერს, კანს კარგად კვებავს, გლუვსა და ნაზს ხდის.

ორი საშუალო ზომის კარტოფილი გახეხეთ, შეურიეთ ერთი ჩაის კოვზი თაფლი, 15-20 წუთი გაიჩერეთ სახეზე და შემდეგ თბილი წყლით ჩამოიბანეთ. კანს აცოცხლებს.

პრობლემური კანისთვის

ერთი ჩაის კოვზი ყვითელგულას ნაყენი გახსენით 1 ჭიქა ადუღებულ წყალში. დაუმატეთ ერთი ჩაის კოვზი თაფლი და კარგად აურიეთ. გამოიყენეთ ფერისმჭამელების დროს.

ორი სუფრის კოვზი თაფლი გახსენით 50 მლ გვირილის ნაყენში. გამოიყენეთ გამწმენდი ნიღბის სახით კანზე ანთებითი პროცესებისა და ფერისმჭამელების დროს. ნიღაბი კვირაში ერთხელ გაიკეთეთ. ოცი წუთის შემდეგ ჩამოიბანეთ.

მშრალი კანისთვის

30 გრამი ხორბლის ფქვილი, 50 გ თაფლი და 20 გ წყალი ერთმანეთში კარგად აურიეთ. მარლის ტამპონით სახეზე დაიდეთ. 15-20 წუთის შემდეგ ოთახის ტემპერატურის წყლით ჩამოიბანეთ.

ცხიმიანი კანისთვის

ერთი კვერცხის ცილა ათქვიფეთ, დაუმატეთ ერთი ჩაის კოვზი თაფლი, ერთი ჩაის კოვზი რძე, ერთი ჩაის კოვზი ლიმონის წვენი. მარლის ტამპონით სახეზე 20 წუთი დაიდეთ. ჩამოიბანეთ თბილი წყლით. გადაივლეთ გვირილის ნაყენი.

შერეული კანისთვის

ერთი ნაჭერი შავი პურის გული 30 მლ ცხელ რძეში დაალბეთ, გასრისეთ, დაუმატეთ 1 სუფრის კოვზი თაფლი და ერთი სუფრის კოვზი ზეითუნის ზეთი. სახის მშრალ ადგილებზე მკვებავი კრემი წაისვით და შემდეგ მთელ სახეზე ნიღაბი დაიდეთ. 15-20 წუთის შემდეგ ჩამოიბანეთ.

მათეთრებელი ნიღაბი

ნახევარი ჩაის კოვზი თაფლი, ერთი ჩაის კოვზი ახალი ხაჭო და ერთი ჩაის კოვზი კეფირი (ან რძე) ერთმანეთში აურიეთ. კარგად დასრისეთ. სახეზე 30-40 წუთი გაიჩერეთ, შემდეგ თბილი წყლით ჩამოიბანეთ. ნიღაბი კარგია მოდუნებული, დანაოჭებული, მშრალი და მოყვითალო ფერის კანისთვის.

სამი ჩაის კოვზი ხაჭო ერთი ჩაის კოვზ თაფლში აურიეთ და სახეზე დაიდეთ. 20-25 წუთის შემდეგ თბილი წყლით ჩამოიბანეთ. ნიღაბი ათეთრებს და კვებავს კანს.

კრემი ხელებისთვის

ერთი სუფრის კოვზ ყვითელგულას, გვირილის, ორკბილასა და მრავალძარღვას ერთი ჭიქა ადუღებული წყალი დაასხით. 5-7 საათი გააჩერეთ. დოლბანდში გაწურეთ.

შემდეგ 50 გრამი ნაღების კარაქი გაადნეთ, ერთი ჩაის კოვზი თაფლი და 50 გრამი ბალახის ნაყენი დაუმატეთ. ერთმანეთში კარგად აურიეთ. მიღებული კრემი ხელზე წასასმელად გამოიყენეთ. ის კანს ელასტიკურსა და რბილს ხდის.
































ტექსტის სანახავად გაიარეთ რეგისტრაცია.