გოგრის ნიღაბი (სახის მოვლა)

გოგრა სასარგებლო კოსმეტიკური პროდუქტია. გოგრის თესლის ზეთი აფერხებს კანის დაბერებას და წვრილი ნაოჭების წარმოქმნის პროცესს, რაც მასში შემავალი A და E ვიტამინების მაღალი შემცველობის დამსახურებაა.
100 გრამი გოგრის რბილობი გახეხეთ და ადუღეთ 5 წუთის განმავლობაში, თან 1-2 სადილის კოვზი რძე დაუმატეთ. გადმოდგით, გააგრილეთ ოთახის ტემპერატურამდე და 1 უმი კვერცხის გული შეურიეთ.

მიღებული მასა წინასწარ გასუფთავებულ სახესა და ყელზე წაისვით. გაიჩერეთ 10-15 წუთს და თბილი წყლით ჩამოიბანეთ.

ცხიმიანი და კომბინირებული კანისთვის: 100 გრამი გოგრა წვრილ სახეხზე გახეხეთ, დაუმატეთ 1 ჩაის კოვზი თაფლი და კარგად აურიეთ. თუ ძალიან თხელი გამოვიდა, შესასქელებლად 1 ჩაის კოვზი ფქვილი, სახამებელი ან რძის ფხვნილი დაუმატეთ.

მიღებული მასა წინასწარ გასუფთავებულ სახეზე მსუბუქი მასაჟისებური მოძრაობებით შეიზილეთ. ცხადია, თვალების ზონას უნდა მოერიდოთ. 10-15 წუთის შემდეგ თბილი წყლით ჩამოიბანეთ.

გამაახალგაზრდავებელი ნიღაბი: 100 გრამი გოგრის რბილობი გახეხეთ, ადუღეთ 5 წუთის განმავლობაში, თან 1-2 სადილის კოვზი რძე დაამატეთ. გადმოდგით ქურიდან, გააგრილეთ ისე, რომ ოდნავ თბილი იყოს, შეურიეთ 1 ჩაის კოვზი მშრალი საფუარი, 1 ჩაის კოვზი ზეითუნის ზეთი და რამდენიმე წვეთი გოგრის თესლის ზეთი. დააყოვნეთ 5-10 წუთის განმავლობაში და წაისვით სახესა და ყელზე, 15-20 წუთის შემდეგ კი თბილი წყლით ჩამოიბანეთ