ფრჩხილების კვნეტა, მოწევა - ალბათ, ეს არის, რაც პირველ რიგში მოგდის თავში, როცა "მავნე ჩვევებზე" ლაპარაკობ. ჩვენი "მეორე მეს" წინა პლანზე წამოწევა, რა თქმა უნდა, ყველაზე დიდ საფრთხეს ჩვენს კანს უქმნის.
ელემენტარულად, საღეჭი რეზინის რეგულარულად გამოყენებასაც კი შეუძლია ნაადრევი დაბერება გამოიწვიოს. მაკიაჟის ჩამოსაშორებელი სპონჟის გაურეცხაობამ კი შესაძლოა, ისეთი ინფექცია დაგვმართოს, რომ კანზე მთელი ცხოვრება იარები დაგვიტოვოს... და მერე ვეღარც ძვირფასი კრემები გვიშველის და ვერც ძვირიანი კოსმეტიკური პროცედურები.
კითხვებზე, რომელი მავნე ჩვევა ვნებს კანს და როგორ გავთავისუფლდეთ მისგან, ექსპერტები გვიპასუხებენ:
1. საღეჭი რეზინი
სარეკლამო რგოლებს თუ დავუჯერებთ, საღეჭი რეზინი აღადგენს მჟავა-ტუტოვან ბალანსს და გვიცავს კარიესისგან. ასევე, როგორც ბრიტანელმა მეცნიერებმა დაადგინეს, "ბაბლ-გამის" მუდმივად ღეჭვა აზროვნებას აუმჯობესებს.
თუმცა ევროპელმა პლასტიკურმა ქირურგებმა და კოსმეტოლოგებმა შიშის ზარი დაგვცეს: ისინი თვლიან, რომ სწორედ საღეჭი რეზინის გამუდმებით მოხმარება აჩენს ნაადრევ მიმიკურ ნაოჭებს.
გამოსავალი: მხოლოდ ერთია - საღეჭი რეზინის ნაცვლად, გამოიყენეთ საწუწნი ყინულები.
2. ტელეფონი სახესთან ახლოს
ბევრ ჩვენგანს არ უყვარს მობილური ტელეფონის სპეციალურ შალითაში ჩადება. ვაშინგტონის უნივერსიტეტის მეცნიერებმა დაადგინეს, რომ მობილურ ტელეფონზე ერთ დღეში იმაზე მეტი ბაქტერია გროვდება, ვიდრე ჩვენს ხელებზე. სპეციალისტები გვაფრთხილებენ, რომ ეს ბაქტერიები შემდგომ კანზე ხვდება.
გამოსავალი: იმისათვის, რომ თავი აარიდოთ ამ უსიამოვნებას, რეგულარულად წმინდეთ ტელეფონები ანტიბაქტერიული ხელსახოცებით. ან მოათავსეთ ტელეფონი სპეციალურ შალითაში.
3.კოქტეილის ჩხირით დალევა, მოწევა - შესანიშნავი საშუალებაა ადრეული ნაოჭების გასაჩენად.
"საქმე ისაა, რომ ამ დროს ადამიანი გამუდმებით პრუწავს ტუჩებს, რის შედეგადაც დროთა განმავლობაში ჩნდება ნაოჭები" - ამტკიცებენ კოსმეტოლოგები.
გამოსავალი: რა თქმა უნდა, მოწევისთვის თავის დანებებაა, რაც არა მხოლოდ ადრეულ ნაოჭებს აგაცილებთ თავიდან, არამედ ჯანმრთელობასაც შეგინარჩუნებთ. შეეცადეთ, კოქტეილის ჩხირითაც იშვიათად მიირთვათ სხვადასხვა სასმელი.
4. ცხელი აბაზანის მიღება
არაფერია იმაზე კარგი, ვიდრე დამქანცველი დღის შემდეგ ცხელი აბაზანის მიღება. თუმცა, სამწუხაროდ, განტვირთვის ამ სახეობამ შესაძლოა ზიანი მიაყენოს თქვენს კანს.
ცხელი აბაზანის, შხაპის სისტემატური მიღება აშრობს კანს იმდენად, რომ შესაძლოა გამოიწვიოს ისეთი რთული დაავადებები, როგორებიც არის ეგზემა, ფსორიაზი, დერმატიტი - ამბობენ სპეციალისტები.
გამოსავალი: წყლის ტემპერატურა არ უნდა აჭარბებდეს 37-40 გრადუსს. თუ სუსტი კაპილარები და ვენები გაქვთ, სააბაზანო პროცედურები ცივი შხაპით დაასრულეთ.
5. გაურეცხავი ფუნჯები და სპონჟები მაკიაჟისთვის
ფუნჯებზე, სპონჟებსა და მაკიაჟის წასასმელ სხვა საშუალებებზე ყოველი პროცედურის შემდეგ კანის გარქოვანებული ნაწილაკები რჩება - იდეალური საკვები დაავადების გამომწვევი ბაქტერიებისთვის. თუ არ რეცხავთ სისტემატურად აპლიკატორებს, მასზე რჩება მიკრობები, რომლებიც კანზე ანთებით პროცესებს იწვევს.
გამოსავალი: რეცხეთ სისტემატურად, მაკიაჟის ყოველი წასმის შემდეგ თბილი წყლითა და საპნით. ასევე, შეგიძლიათ შეიძინოთ სპეციალური ანტიბაქტერიული დეზოდორანტები ან გამწმენდი ხელსახოცები.
6. გამონაყარის ხელით წვალება
მუწუკის მოშორებისას ზუსტად უნდა იცოდეთ, მომწიფებულია თუ არა ის ბოლომდე. ამის გარკვევა კი მხოლოდ სპეციალისტს შეუძლია. თუ მოუმწიფებელ მუწუკს გაიღიზიანებთ, მან შესაძლოა სიღრმეში იპოვოს გზა და ფართო მასშტაბის ანთებითი პროცესი გამოიწვიოს, რომლის მკურნალობასაც დიდი ხანი დასჭირდება.
გამოსავალი: პროფესიონალი კოსმეტოლოგი მუწუკის თეთრ თავს სპეციალური ნემსით გაგიხსნით და დაგიმუშავებთ.
სახლის პირობებში მსგავსი მანიპულაციების ჩატარებას არ გირჩევთ. თუ მაინცდამაინც ვერ ითმენთ და გინდათ მოიშოროთ ის, ან მოიწვით სპეციალური მჟავით, ან მიმართეთ კოსმეტოლოგს.
7. მაკიაჟის მთელი ღამით დატოვება
ასე, ძირითადად, ახალგაზრდები "სცოდავენ". ხშირ შემთხვევაში იმიტომ, რომ ეშინიათ, პარტნიორმა უმაკიაჟოდ არ ნახოს.
მაკიაჟის მთელი ღამით დატოვებამ შეიძლება გამოიწვიოს კანის საშინელი ალერგია, აკნე და სხვა ინფექციები. გარდა ამისა, ასე თქვენ კანს არ აძლევთ საშუალებას, რომ ისუნთქოს, რის გამოც კანი ფერმკრთალდება და არაჯანსაღ ფერს იძენს.
გამოსავალი: არ დაგეზაროთ მაკიაჟის ძილისწინ მოცილება და არასოდეს მოგერიდოთ თქვენი ბუნებრივობის ჩვენება. იქნებ თქვენს რჩეულს ასეთი უფრო მოსწონხართ?!
8. გაუთავებელი დიეტები
დიეტების გამუდმებულად დაცვა, მკვეთრად კლება წონაში თქვენს სახეზეც აისახება. დაკარგულ კილოგრამებთან ერთად კანქვეშა ცხიმოვანი უჯრედების განლევაც ხდება, რის გამოც კანი ეკიდება და ჩნდება ადრეული ნაოჭები.
გამოსავალი: უმჯობესია, ნელა დაიკლოთ წონაში, თან, ამ დროს დამატენიანებელი კრემებით ისარგებლოთ. გარკვეულ ასაკში, იმისათვის, რომ აღდგეს კანის სიგლუვე, კოსმეტოლოგები ბიორებიტალიზაციის კურსს ნიშნავენ.
9. გადატვირთული სამუშაო გრაფიკი
სამუშაოზე ჩაციკლული ადამიანები, პირველ რიგში, საკუთარი ნერვული სისტემის მოშლით რისკავენ, შემდეგ კი - სახის კანის ჯანმრთელობით. საქმე ისაა, რომ როცა ადამიანი ბევრს მუშაობს, დღის განმავლობაში იღებს უამრავ ინფორმაციას, გამუდმებულად სტრესში იმყოფება.
ამ დროს სისხლში ჰორმონი კორტიზოლი გამომუშავდება, რომელიც სისხლის მიმოქცევას ანელებს, უარესდება ჟანგბადის მიწოდება უჯრედებსა და კანის ქსოვილებში, რაც კანის ადრეულ დაბერებას იწვევს. გამუდმებული სტრესის გამო შესაძლოა კანზე გაჩნდეს ანთებითი პროცესი, გამოიწვიოს სიფერმკრთალე და კანს უსიცოცხლო ფერი მისცეს.
და მათთვის, ვინც დიდხანს იმყოფება ოფისში: კონდიციონერი ცუდად მოქმედებს კანზე. ის აშრობს და უსიცოცხლოს ხდის კანს.
გამოსავალი: შეეცადეთ, ხანდახან მაინც მოეშვათ. ჩაეწერეთ იოგის კურსებზე, სახლში მოიწყვეთ სპა-სეანსები და არომათერაპია. ოფისში ყოფნისას დღის განმავლობაში აუცილებლად გამოიყენეთ თერმოწყალი მინერალებით, მიკროელემენტებითა და მცენარეული ექსტრაქტებით.
ეს კომპონენტები ხელს უშლის კანის გაუწყლოებას, აწყნარებს ანთებით პროცესებს კანზე, ატენიანებს და ტონუსში მოჰყავს კანი.
10. გამოუძინებლობა
თუ მუდმივად გამოუძინებელი ბრძანდებით, მთელ ორგანიზმსა და მათ შორის, კანსაც ზიანს აყენებთ. იმის ნიადაგზე, რომ ორგანიზმი სრულფასოვნად არ ისვენებს, ის სტრესში ვარდება.
გარდა ამისა, მათ, ვისაც ცოტა სძინავს, ჰორმონ ინსულინის მიმართ მგრძნობელობა უქვეითდება.
ეს კი სისხლში შაქრის დონეს მაღლა სწევს. უარესდება საჭმლის მონელება, ნელდება სისხლის მიმოქცევა და კანს ეწყება ჰიპოქსია. შედეგად კანზე ჩნდება ანთებები და ჯანსაღი ფერი იკარგება.
გამოსავალი: შეეცადეთ, დღე-ღამეში არანაკლებ 8 საათი იძინოთ. აუცილებლად დაჰყავით საწოლში 2-დან 4 საათამდე - სწორედ ამ დროს ხდება უჯრედებსა და ქსოვილებში განახლების პროცესი.
ჩვევა - ჩვენი მეორე მეა, რომლისგან გათავისუფლება არც ისე მარტივია, მაგრამ ღირს, რომ მცდელობა სწორედ ახლავე დაიწყოთ.
მხოლოდ და მხოლოდ რამდენიმე წესის დაცვა მოგიწევთ: თავი დაანებოთ მოწევას, გამოიძინოთ, ცოტა ინერვიულოთ, რეგულარულად იზრუნოთ კანზე, მიჰყვეთ ყველა დაწერილ თუ დაუწერელ კანონს, და გვერწმუნეთ, თქვენს კანს და ზოგადად, გარეგნობას წლები ვერაფერს დააკლებს.
10 მავნე ჩვევა სახის კანისთვის
⏱️ 1 წთ.
👁️ 2 242
100%