ლიმონი ქერა თმას იცავს - გაანებივრეთ თმა შინაურ პირობებში



მართალია, თანამედროვე კოსმეტიკური საშუალებები თითქმის უნივერსალურია და ნებისმიერი ტიპის თმის მოვლას იოლად და ზედმეტი ძალისხმევის გარეშე შეძლებთ, მაგრამ ბუნებრივ ინგრედიენტებს თავისი უპირატესობები აქვს, რომელთა შორის ყველაზე მნიშვნელოვანია, რომ ისინი თითქმის არ აზიანებენ თმას და თავის კანს.

ბუნებრივი ბალზამები, შამპუნები, ნიღბები თმისთვის

გადასავლებ წყალში ლიმონის წვენის ჩამატება ქერა თმას აცოცხლებს, ხოლო 30 მლ (2 სუფრის კოვზი) ვაშლის ძმარი - ნებისმიერი ფერის თმას ფაფუკს ხდის.

თუ თმა პრობლემურია, მისი მკურნალობა ბალახის ბალზამით შეიძლება. ცხიმიანი თმისათვის გამოიყენება ავშანი, თუ თმა ცუდად იზრდება ან ცვივა - ჭინჭარი, თუ დაელექტროებისაკენ აქვს მიდრეკილება - როზმარინი, თუ თავის კანზე ქავილი შეიგრძნობა - ლავანდა.

ბალზამის მომზადების წესი: 2 სუფრის კოვზ ნედლ ან 1 სუფრის კოვზ გამხმარ ბალახს 600 მლ ადუღებული წყალი დაასხით. მოურიეთ და 3-4 საათი გააჩერეთ, გაწურეთ, შეათბეთ და თავის დაბანის შემდეგ თმაზე გადაივლეთ.

თმის ძირების გასამაგრებლად ეფექტურია ოხრახუშის ფოთლების ფაფა. ოხრახუშის ფოთლები მიქსერში დააქუცმაცეთ და მცირე რაოდენობით თბილ წყალში გააზავეთ. მიღებული ფაფა თმაზე დაიდეთ და პოლიეთილენის თავსაფრით შეიხვიეთ. ერთი საათის შემდეგ წყლით ჩამოიბანეთ.

ვიტამინის ბალზამი

20 გრ ხახვი, 20 გრ ნიორი, 20 გრ ლიმონის წვენი, 20 გრ თაფლი და 20 გრ მაიონეზი მიქსერით ათქვიფეთ. მიღებული მასა მაცივარში შეინახეთ.

კვირაში ერთხელ ამ კრემით თავის კანი კარგად დაიზილეთ, პოლიეთილენის ქუდი დაიხურეთ და ზემოდან პირსახოცი დაიფარეთ. 3-4 საათის შემდეგ თმა ჩვეულებრივი შამპუნით დაიბანეთ.

სტაფილოს შამპუნი

1 კვერცხის გული, 20 გრ ზეთი, 20 გრ ლიმონის წვენი და 4 სუფრის კოვზი სტაფილოს წვენი ერთმანეთში კარგად აურიეთ. შამპუნის ნაცვლად თმა ამ ნაყენით დაიბანეთ.

ნიღაბი

კომბოსტოსა და ატმის წვენის ნაყენი თმას ამაგრებს. 2 სუფრის კოვზი კომბოსტოსა და 2 სუფრის კოვზი ატმის წვენი ერთმანეთში აურიეთ, დაუმატეთ კვერცხის გული, 20 გრ კონიაკი და 20 გრ თაფლი.

ნიღაბი თმაზე წაისვით, პოლიეთილენის ქუდი დაიხურეთ და ზემოდან პირსახოცი დაიფარეთ. 2 საათის შემდეგ ჩვეულებრივი შამპუნით დაიბანეთ. ეს ნიღაბი კვირაში ერთხელ გაიკეთეთ. თერაპიული კურსი 2-3 თვე გრძელდება.

ერთი კვერცხის გულს ნახევარი ლიმონიდან გამოწურული წვენი და რამდენიმე წვეთი ნუშის ზეთი დაუმატეთ, თმის ძირებზე წაისვით და 20 წუთი გაიჩერეთ. შემდეგ თბილი წყლით ჩამოიბანეთ.

ჟურნალი "რეიტინგი"

წყარო
































ტექსტის სანახავად გაიარეთ რეგისტრაცია.