მოვუაროთ თვალების გარშემო კანს (თვალების მოვლა)



ყველა ქალს უნდა, რომ ლამაზი თვალები და მეტყველი მზერა ჰქონდეს. თვალების სწორი მოვლის შედეგად შეგიძლიათ გაიუმჯობესოთ არა მარტო გარეგნული სახე, არამედ მხედველობაც.
თვალების ირგვლივ კანი განსაკუთრებულ ყურადღებას მოითხოვს, ამიტომ მისი მოსავლელი საშუალებები უნდა იყოს სპეციალურად შერჩეული და მისი წასმისას გარკვეული წესებით უნდა იხელმძღვანელოთ.
წასმისას გაიკეთეთ მინიმასაჟი თვალების ირგვლივ. ზედა ქუთუთოზე კრემის წასმა დაიწყეთ ცხვირის მხრიდან, ხოლო ქვედა ქუთუთოზე, პირიქით - გარეთა მხრიდან ცხვირისაკენ. კრემების გამოყენება განსაკუთრებით აქტუალური ხდება ზაფხულში. ზამთრის დადგომასთან ერთად დამატენიანებელი კრემების გამოყენება არ არის რეკომენდებული, რადგან ტენი სიცივეში ყინულად გარდაიქმნება. ამიტომ წელიწადის ამ დროს არა წყლის, არამედ ცხიმის შემცველი კრემები უნდა გამოიყენოთ.
დილით, სახლიდან გასვლამდე ნახევარი საათით ადრე გაიწმინდეთ სახე, შემდეგ კი მსუბუქად წაისვით ცხიმიანი კრემის თხელი ფენა, რათა კანმა მთლიანად შეიწოვოს. ღამით სუფთა სახეზე ასევე ცხიმიანი კრემი წაისვით, ძილის წინ კი ზედმეტი ფენა ხელსახოცით მოიცილეთ.
დამატენიანებელი კოსმეტიკის ნაცვლად, შეგიძლიათ ხალხური, ბუნებრივი საშუალებებიც გამოიყენოთ. კრემის დამზადება შინაურ პირობებშიც არ არის რთული. თუ თქვენ გაქვთ მგრძნობიარე, გაღიზიანებისაკენ მიდრეკილი კანი, მაშინ ყურადღება გმართებთ - დოზები მინიმალური უნდა იყოს. აირჩიეთ თქვენი კანის ტიპთან ყველაზე მეტად მიახლოებული ნელსაცხებლის რეცეპტები. გახსოვდეთ, რომ სახლის პირობებში კრემი მცირე რაოდენობით უნდა მოამზადოთ, რადგან ის დიდხანს ვერ ძლებს. მაცივარშიც კი შვიდ დღეზე მეტხანს არ გააჩეროთ - ის ისეთი ეფექტიანი აღარ იქნება.
* თვალების ქვეშ ჩამუქებული კანისათვის კარგია სალბის ნაყენის კომპრესი. 1 ჩ/კ სალბი ცოტა ხანს ადუღეთ 100 მლ წყალთან ერთად და 15 წუთით გააჩერეთ თავდახურულ ჭურჭელში. ერთი ნაწილი გააცივეთ მაცივარში, მეორე კი ცოტათი გააგრილეთ. ამ მასაში დასველებული ტამპონი დაიდეთ დახუჭულ თვალებზე 10 წუთით. შემდეგ გამოიღეთ მაცივრიდან შენახული მასა და სალბის ცივი კომპრესი გაიკეთეთ, ანუ ცვალეთ - ჯერ დაიდეთ თბილი, შემდეგ კი ცივი კომპრესი.
* *ეფექტიანია ასევე ოხრახუშის ნიღაბი. ოხრახუში წვრილად დაჭერით და დაიდეთ თვალების ირგვლივ. თვალებზე დაიდეთ ბამბის ტამპონები და დაიტოვეთ ნიღაბი 15-20 წუთით.
* *არაჩვეულებრივია კარტოფილის ნიღაბიც. აიღეთ გარეცხილი, გაუთლელი უმი კარტოფილი, გახეხეთ წვრილ სახეხზე და 2 ჩ/კ პიურეს შეურიეთ 2 ჩ/კ ფქვილი და 1 ს/კ რძე. ამის შემდეგ დაიდეთ ნიღაბი ქუთუთოებზე და გაიჩერეთ 15-20 წუთით.
არანაკლები ყურადღებით უნდა მოეკიდოთ წამწამებსაც. ყველასთვის ცნობილია, რომ გრძელი და აპრეხილი წამწამები თვალს განსაკუთრებულ მომხიბვლელობას მატებს, მაგრამ ბევრმა არ იცის, როგორ მოუაროს მათ. თუ წამწამების ასაპრეხ ტუშს ყოველდღე იყენებთ, მალე დაგჭირდებათ კოსმეტოლოგის კონსულტაცია - თუ რა მოუხერხოთ წამწამების ორად გაყოფილ ბოლოებს. უხარისხო საღებავმა შესაძლოა, ქუთუთოების წვა და ქავილიც გამოიწვიოს, რასაც საბოლოოდ წამწამების ცვენა მოჰყვება. ამიტომ, ქუთუთოს სულ უმნიშვნელო შეწითლების შემთხვევაშიც კი აუცილებელია წამწამების მოვლაზე იზრუნოთ.
დილით გაკთებული მაკიაჟი, ძილის წინ აუცილებლად მოიცილეთ კოსმეტიკური რძის საშუალებით.
წამწამების მოვლა ზეითუნის ზეთის რეგულარული გამოყენებით დაიწყეთ. ჯერ კარგად ამოიბანეთ თვალები თბილი წყლით, შემდეგ კი წამწამებზე ზეითუნის ზეთი წაისვით - წამწამები გახშირდება, გამუქდება და ბზინვარება მიემატება. თუ ძილის შემდეგ თვალის კუთხეებსა და წამწამებზე ლორწოვანი გამონადენი გიგროვდებათ, თვალები გვირილის თბილი ნაყენით (1 ჩ/კ გვირილა, 1 ჩ/ჭ წყალში) უნდა ამოიბანოთ. შეგიძლიათ საამისოდ ჩაის ნაყენიც გამოიყენოთ.
წამწამების სამკურნალოდ საკმაოდ ეფექტურია აბუსალათინის ზეთიც. სპეციალური (შესაძლებელია ყურის საწმენდი) ჩხირი დაასველეთ ზეთში და თხელ ფენად წაისვით წამწამებზე. ჩამობანა საჭირო არ არის. ეს პროცედურა სასურველია, საღამოობით, მაკიაჟის მოცილების შემდეგ ჩაიტაროთ.



































ტექსტის სანახავად გაიარეთ რეგისტრაცია.