რამდენად საშიშია კანზე გაჩენილი უცნობი წარმოშობის ხორკლი და როგორ შეიძლება მისი მოცილება? თუ მეჭეჭი გაქვთ, ნუ იჩქარებთ, ამ საქმეში უწყინარი ბაყაყები დაადანაშაულოთ. დიახ, ასეთი ახსნა ჩვენს ბავშვობაში იყო. სინამდვილეში ამ უსიამოვნების მიზეზი პაპილომის ვირუსია, რომელსაც შეუძლია ორგანიზმში საკმაოდ დიდი ხანი "თვლემდეს".
როგორი სახის არსებობს?
მეჭეჭი არის ჩვეულებრივი და ბრტყელი. ის ნებისმიერ ადგილას ჩნდება, ყველაზე ხშირად ხელებსა და ფეხისგულზე. უმეტეს შემთხვევაში ადამიანს განსაკუთრებულ უსიამოვნებს არ აყენებს – არც სტკივა და არც ექავება.
წვეტიანი (ე.წ, კონდილომები) სასქესო ორგანოებზე გვხვდება და სქესობრივი გზით გადადის.
ხანდაზმულობის (ე.წ. კერატომები) ორგანიზმში ვირუსის არსებობასთან დაკავშირებული არ არის. არაკეთილსასურველი ფაქტორების ზემოქმედებით ასეთი მეჭეჭები შეიძლება ავთვისებიანში გადაიზარდონ. ამიტომ ყურადღებასა და მუდამ დაკვირვებას საჭიროებენ.
როგორ ავიცილოთ თავიდან
მეჭეჭი რომ არ გაჩნდეს, ამისთვის არსებობს მხოლოდ ერთი საშუალება – ეს არის იმუნიტეტის გამაგრება და ინფექციების შეჭრისგან ორგანიზმის დაცვა. სხვის მეჭეჭებს არ შეეხოთ. ხელები ხშირად დაიბანეთ. ხელებზე ხშირად გადაივლეთ ცივი წყალი, ამით სისხლის მიმოქცევას გაიუმჯობესებთ. თუ მეჭეჭები წინათ გქონდათ, ხელმეორედ რომ არ გაჩნდნენ, ამისთვის საჭიროა ჯანსაღი ცხოვრების წესი დაიცვათ და ვიტამინებით მდიდარი პროდუქტებით იკვებოთ.
თუ მაინც გაჩნდა?
საკონსულტაციოდ აუცილებლად ექიმს მიმართეთ. ის განსაზღვრავს თქვენი მეჭეჭის ტიპს, გასინჯავს, ანთებითი პროცესი ხომ არ მიმდინარეობს და შეიძლება თუ არა მისი მოცილება. ჩვეულებრივ ამას ქირურგიული წესით ან თხევადი აზოტის დახმარებით აკეთებენ. პრაქტიკულად, ეს უმტკივნეულო პროცედურაა.
მეჭეჭის მოცილება სახლის პირობებში
ჩვეულებრივი მეჭეჭები ადვილად ექვემდებარებიან მკურნალობას სახლის პირობებში. არსებობს რეცეპტების დიდი რაოდენობა. შეარჩიეთ ისეთი, რომელიც ყველაზე მეტად მოგწონთ და იმოქმედეთ. რეკომენდებული არ არის რამდენიმე რეცეპტის ერთდროულად გამოყენება. მხოლოდ ერთით ისარგებლეთ. მკურნალობის კურსი ბოლომდე ჩაიტარეთ (და არა დროდადრო).
ყოველდღიურად (არაუმეტეს 3 კვირისა) ძილის წინ მეჭეჭზე ნახევარი კბილი ნიორი წაისვით. პროცედურის შემდეგ ბამბის სახვევი დაიდეთ.
მეჭეჭზე ნივრისა და თაფლის ნარევი წაისვით (3 წილ ნიორზე 1 წილი თაფლი აიღეთ).
ეხმარება ფაფადქცეული ცირცელის კენკრის კომპრესი. გამოიყენება ღამით 10 დღის განმავლობაში.
სასარგებლოა კანიანად გახეხილი კარტოფილის ფაფის კომპრესი. ორი კვირის განმავლობაში ღამით დაიდეთ.
შეგიძლიათ მეჭეჭი ცარცით გამოაშროთ. დაფხვნილი ცარცი მეჭეჭზე დაიყარეთ და შეიკარით. სახვევი დღეგამოშვებით გამოიცვალეთ. ეს საშუალება გამოიყენეთ მანამ, სანამ მეჭეჭი არ გახმება.
ახალგაჩენილ მეჭეჭს შესანიშნავად აქრობს ბაბუაწვერას რძე. რძე ყოველდღიურად 4–5–ჯერ წაისვით სრულ გაქრობამდე.
მეჭეჭს ასევე აქრობს აბზინდას მაგარი ნაყენი.
მეჭეჭზე ყვავილობის დროს დაკრეფილი ქრისტესისხლას წვენი წაისვით (არაუმეტეს 3 კვირისა). პერიოდულად მეჭეჭების მკვდარი ნაწილები მოიცილეთ.
ამის ცოდნა მნიშვნელოვანია
მეჭეჭების დამოუკიდებლად მოცილების მცდელობისას სიფრთხილე გმართებთ. დაუყოვნებლივ მიმართეთ ექიმს, თუ: მეჭეჭმა ფორმა და ფერი სწრაფად შეიცვალა; ზუსტ საზღვრებს კარგავს და გადღაბნას იწყებს; მტკივნეულია და იქავებთ; სისხლმდენია; მეჭეჭების რიცხვი გაიზარდა.
წყარო: sana.ge
როგორ გავიქროთ მეჭეჭი?
⏱️ 1 წთ.
👁️ 6 527
100%
