ფეხებს, რომლებზეც დიდი დატვირთვა მოდის, გამძლეობის უზარმაზარი მარაგი აქვთ, მაგრამ ზოგჯერ მათში უთანხმოება ხდება და შეიძლება რამდენიმე ნაბიჯის გადადგმაც კი გაუჭირდეთ. როგორ მოვუაროთ ფეხებს?
ფეხების ძირითადი პრობლემები
ყველაზე ხშირად რომელი დაავადებები აზიანებენ ფეხებს და რა არის ამის მიზეზი?
1. სახსრების დაავადებები – ართრიტი, ართროზი, პოდაგრა. მათ აღმოცენებას იწვევს მეტისმეტი ფიზიკური დატვირთვა, ნივთიერებათა ცვლის მოშლა, არასწორი კვება, ინფექციური დაავადებები (მათ რიცხვში გრიპი ან ანგინა). სერიოზული რისკფაქტორია ჭარბი წონა.
2. ძვლის ქსოვილის დაშლა – საუბარია ოსტეოპოროზზე, რის გამოც ძვლების სიმყიფე იზრდება. დაავადების აღმოცენების ალბათობა ასაკთან ერთად მატულობს, ამიტომ ამ პერიოდში საჭიროა კალციუმითა და ვ ვიტამინით მდიდარი მეტი პროდუქტისა და ასევე ექიმის მიერ დანიშნული პრეპარატების მიღება.
3. სისხლძარღვოვანი დაავადებები – მათ მიეკუთვნება არამხოლოდ ვენების ვარიკოზული გაგანიერება, ასევე ფეხების სისხლძარღვების ათეროსკლეროზი. ამ დაავადებების განვითარების მიზეზია სტატიკური დატვირთვა, მოუხერხებელი ფეხსაცმელი, კვებაში ცხიმების სიჭარბე. სისხლძარღვებს დიდ დარტყმას აყენებს თამბაქოს მოწევა და ალკოჰოლის ბოროტად გამოყენება. ასევე ბევრისთვის საყვარელი პოზა – ფეხის ფეხზე გადადება.
4. ნერვული სისტემის დაავადებები – ყველაზე ხშირად მათი მიზეზი ხერხემალში, განსაკუთრებით წელის განყოფილებაში იმალება. ე.წ. მშფოთვარე ფეხების სინდრომი აღმოცენდება ენდოკრინულ სისტემაში დარღვევების, რკინის, მაგნიუმისა და ი ჯგუფის ვიტამინების დეფიციტის გამო.
5. კანის ინფექციური დაავადებები – ყველაზე მეტად გავრცელებულია ტერფისა და ფრჩხილების სოკო, წითელი ქარი. ამ დაავადებების თავიდან ასაცილებლად საჭიროა ჰიგიენის წესების დაცვა და ჩვეულებრივი ნაკაწრის დროს სწორი დახმარება.
ჯანმრთელობის 10 კომპონენტი
ნებისმიერ ასაკში ფეხებთან რაიმე პრობლემა რომ არ გქონდეთ და ჯანმრთელობა შეუნარჩუნოთ, რამდენიმე მარტივი წესის დაცვა ახლავე დაიწყეთ.
1. დღეში არანაკლებ 10 ათასი ნაბიჯი გადადგით. მჯდომარე–მწოლიარე ცხოვრების წესი ბევრი დაავადების განვითარებას უწყობს ხელს და არამხოლოდ კუნთებსა და მყესებს ასუსტებს, სახსრებსა და სისხლძარღვებსაც აზიანებს.
2. მეტისმეტ დატვირთვას მოერიდეთ. უმჯობესია ნახევარი საათი საშუალო ტემპში გაისეირნოთ, ვიდრე ასფალტზე ირბინოთ და მუხლისა და ტერფის სახსრებს ავნოთ.
3. თუ მჯდომარე ან მდგომარე სამუშაო გაქვთ, ყოველ 5 წუთში შეისვენეთ, ფეხები გაჭიმეთ, დაიზილეთ. რამდენჯერმე ჩაიმუხლეთ, ფეხის წვერებსა და ქუსლებზე მონაცვლეობით დადექით, ფეხები რამდენჯერმე აიქნიეთ. ამგვარად, სისხლის შეგუბებას თავიდან აიცილებთ.
4. ყოველდღიურად თვითმასაჟი გაიკეთეთ. ტერფიდან ბარძაყამდე ფეხებზე ხელი გადაისვით, კანი გაჭიმეთ, კუნთები დაიზილეთ. ტერფებისთვის მასაჟის ხალიჩა გამოიყენეთ.
5. მოხერხებული ფეხსაცმელი ატარეთ. სხვათა შორის, ბრტყელი ძირი უფრო მავნეა ფეხებისთვის, ვიდრე მაღალი ქუსლი.
6. ჰიგიენის წესები დაიცავით. ყოველდღიურად ფეხები აუცილებლად თბილი წყლით დაიბანეთ და კარგად გაიმშრალეთ, განსაკუთრებით თითებს შორის კანი.
7. ფეხებზე გრილი და თბილი წყალი მონაცვლეობით გადაივლეთ.
8. რაციონში შეზღუდეთ მავნე პროდუქტები – ფასტ ფუდები, კონსერვები, მარინადები, შემწვარი კერძები.
9. ჭამეთ რძის მჟავე პროდუქტები, ქორფა ბოსტნეული და ხილი, მწვანილი და თევზი. ასეთი საკვები სასარგებლოა როგორც ძვლების, ასევე სახსრებისა და სისხლძარღვებისთვის.
10. კატეგორიულად უარი თქვით მოწევაზე. სიგარეტი სისხლძარღვების მტერია.
მდოგვი, ქატო და მარილი
ართროზის, ართრიტისა და პოდაგრის დროს, თუ მწვავე ანთება არ არის, სახსრებს ეხმარება გათბობა. მისი წყალობით, სისხლის მოდინება იზრდება, ქსოვილების კვება უმჯობესდება და მოძრაობითი შებოჭილობა მცირდება.
1 კგ ზღვის ან სუფრის მარილი, 2 სუფრის კოვზი მშრალი მდოგვი და 1 სუფრის კოვზი ქატო აურიეთ, 0,5 ჭიქა წყალი დაასხით და 50 გრადუს ტემპერატურამდე გააცხელეთ. უნდა მიიღოთ სქელი არაჟნის კონსისტენციის მასა (აუცილებლობის შემთხვევაში წყალი დაუმატეთ). საშუალება მტკივნეულ ადგილას დაიდეთ, ჯერ პოლიეთილენის ფენა დაიფარეთ, შემდეგ შალის ქსოვილი. მარილი გაიჩერეთ, სანამ არ გაცივდება. შემდეგ თბილი წყლით ჩამოიბანეთ და ისევ თბილად შეიხვიეთ. ასეთი პროცედურის შემდეგ 2 საათის განმავლობაში ქუჩაში გასვლა და სიმძიმის აწევა არ შეიძლება.
სახსრებიდან მარილი გამოგვაქვს
მუხლების სახსრებსა და ფეხის თითებში შებოჭილობა, ტკივილი და შეშუპება ხშირად დაკავშირებულია პოდაგრასთან – შარდმჟავას მარილების დალექვასთან. პირველ რიგში, საჭიროა კვების მოწესრიგება. შეზღუდეთ ხორცისა და ცხოველური ცხიმების მოხმარება, უარი თქვით პომიდორსა და ტომატის სოუსებზე, მარინადებზე. ბალახეული ნაყენებითა და ნახარშებით, რომლებიც ორგანიზმიდან ზედმეტი მარილების გამოდენას ეხმარება, ორ თვეში ერთხელ ერთკვირიანი მკურნალობის კურსი ჩაიტარეთ.
მარწყვის და წითელი მოცვის ფოთლები, ცაცხვის ყვავილები თანაბარი რაოდენობით აურიეთ. 1 ჩაის კოვზ ნარევს 1 ჭიქა მდუღარე დაასხით. დღეში არანაკლებ 1–1,5 ლიტრისა უნდა დალიოთ.
კოთხუჯის გამხმარი ფესვები როდინში დანაყეთ. 1 სუფრის კოვზ ნედლეულს 1 ჭიქა ანადუღარი ცივი წყალი დაასხით და 6 საათი დადგით. 1 სუფრის კოვზი გაწურული ნაყენი დღეში 3–ჯერ დალიეთ.
1 სუფრის კოვზ ნიახურის ქორფა ძირებს 2 ჭიქა მდუღარე დაასხით და თერმოსში 3 საათი გააჩერეთ, გაწურეთ და 2 სუფრის კოვზი დღეში 3–4–ჯერ დალიეთ.
ცხენისწაბლა ვენებს ეხმარება
ცხენისწაბლას ყვავილები, ფოთლები და ნაყოფი ვენების ვარიკოზული გაგანიერების დროს ერთ–ერთი საუკეთესო საშუალებაა. მათ ბაზაზე დამზადებული სამკურნალო მაზი არამხოლოდ ანთებასა და შეშუპებას აქრობს, ასევე თრომბის წარმოქმნას აბრკოლებს, სისხლძარღვების კედლებს ამაგრებს.
ცხენისწაბლას ნაყოფისგან მზადდება სამკურნალო მალამო, რომელიც ფეხზე ყოველდღიურად უნდა წაისვათ.
წაბლი კანიანად დააქუცმაცეთ, მცენარეული ზეთი (უმჯობესია სელის ან არარაფინირებული მზესუმზირის) თანაფარდობით 1:10 დაასხით. 2 კვირა ბნელ, თბილ ადგილას დადგით. ამის შემდეგ წყლის აბაზანაზე ნახევარი საათი გააცხელეთ. მზა მალამო მაცივარში შეინახეთ. წასმის წინ საჭირო რაოდენობა ოთახის ტემპერატურამდე შეათბეთ.
შინაგანად მისაღებად მოამზადეთ ყვავილების ნაყენი: 1 სუფრის კოვზ გამხმარ ყვავილებს 1 ჭიქა მდუღარე დაასხით, 6 საათი დადგით. ყლუპობით მთელი დღის განმავლობაში დალიეთ.
წყარო: sana.ge
ფეხები დიდხანს რომ გვემსახურონ
⏱️ 1 წთ.
👁️ 7 184
100%