ფრჩხილების კვნეტის დაწყება, როგორც წესი, ნერვული დაძაბულობის შედეგია, სტრესის, შფოთვის. თუმცა შემდეგ ის მავნე ჩვევაში გადადის და ადამიანი მოწიფულ ასაკშიც ვერ ანებებს თავს. გარდა იმისა, რომ ამგვარი ფრჩხილები საშინლად არაესთეტიკურია - მოჭმული და დასისხლული ფრჩხილების შეხედვა არავის სიამოვნებს, მას ბევრი სხვა მავნე შედეგიც მოაქვს - დიზენტერია, ჰეპატიტის სხვადასხვა სახეობა, ჭიები და ა.შ.
პირველ რიგში, სანამ ამ მავნე ჩვევას შეებრძოლებით, მიზეზი უნდა დაადგინოთ. როგორც წესი, ეს ნერვიულობის დროს ხდება. ადამიანს, რომელიც ფრჩხილებს იკვნეტს, სუსტი ნებისყოფისად და ნერვიულად მიიჩნევენ. გინდათ, რომ თქვენზე ასეთი შთაბეჭდილება დარჩეთ? აიყვანეთ თავი ხელში და ებრძოლეთ ამ მავნე ჩვევას. პირველ რიგში მოერიდეთ ნერვიულობას და სტრესებს. მერე კი სხვადასხვა მეთოდი გამოიყენეთ.
მაშ ასე, ბრძოლის მეთოდები:
• როგორც კი გაგიჩნდებათ სურვილი, რომ ფრხილები მოიკვნიტოთ, ეცადეთ, ყურადღება სხვა რამეზე გადაიტანოთ. აიღეთ, მაგალითად ხელში კალამი და ატრიალეთ.
• ყურადღების გადატანაში დაგეხმარებათ ასევე რაიმე სასუსნავი, ხილის ან ბოსტნეულის მირთმევა.
• ერთ-ერთი მეთოდია, ხის ე.წ. კრიალოსანი, რომლის მძივების გადარჩევა შეგიძლიათ ხოლმე თითებით.
• მაღაზიებში უამრავი ანტისტრესული საშუალება იყიდება: სხვადასხვა ბურთი, ესპანდერი ან სხვა ნივთი, რომელიც მავნე ჩვევებისგან გათავისუფლებაში დაგეხმარებათ. არსებობს ასევე ანტიდეპრესანტი ბეჭდები, რომლებსაც მოძრავი დეტალი აქვს.
• ასევე შესაძლებელია, ფრჩხილებზე რაიმე საშუალება წაისვათ. მაგალითად, აფთიაქებში იყიდება სპეციალური გამჭვირვალე ლაქი მწარე გემოთი. თუ უცებ პირში მწარე გემოს იგრძნობთ, თავს ხელში აიყვანთ.
• კარგი საშუალებაა ლიმონი. რამდენიმე წვეთი ლიმონი ფრჩხილზე დაიწვეთეთ. ლიმონის წვენი ათეთრებს ფრჩხილებს, სიმაგრეს აძლევს. გარდა ამისა, შეიძლება, მავნე ჩვევის დამარცხებაშიც დაგეხმაროთ.
• კარგი საშუალებაა ნაძლევის დადება შეყვარებულთან, მეგობართან, ნათესავთან, რომ გადაეჩვევით ამ ჩვევას. თან მოიფიქრეთ, რა გინდათ ჯილდოდ ასეთ შემთხვევაში. იქნებ, ამგვარი სტიმული დაგეხმაროთ.
წყარო: etanews.ge
როგორ გადავეჩვიოთ ფრჩხილების კვნეტას - საუკეთესო მეთოდები
⏱️ 1 წთ.
👁️ 4 559
100%