თითოეულ ადამიანს სხვადასხვა ტიპის კანი აქვს. ყველა მათგანს მოვლა და დაცვა სჭირდება. როგორ უნდა მოვუაროთ სახის კანს, როგორ უნდა დავიცვათ იგი და რა საშუალებები უნდა გამოვიყენოთ? ამ საკითხთან დაკავშირებით დერმატოლოგ მარიკა ხურციძეს ვესაუბრეთ.
– ქალბატონო მარიკა, როგორი ტიპის კანი არსებობს?
– სულ რამდენიმე ტიპის სახის კანი არსებობს: ცხიმიანი, მშრალი, ნორმალური და შერეული. თითოეულის სტრუქტურა განსხვავებულია. ყველა მათგანს თავისებური მოვლა და დაცვა სჭირდება.
– როგორ დავადგინოთ, რა ტიპის კანი გვაქვს?
– სახის კანის ტიპის დადგენა კოსმეტიკურ დაწესებულებებში შეგიძლიათ, მაგრამ შეიძლება, საოჯახო პირობებშიც დავადგინოთ. სახის კანის რაგვარობის დასადგენად გაისუფთავეთ სახე ოთახის ტემპერატურის წყლითა და საპნით. მოგშორდებათ მტვერი, ოფლი და კანის ცხიმი. დაბანიდან 1–2 საათის შემდეგ სახეზე კვლავ წარმოიქმნება ცხიმის ფენა. აიღეთ თხელი ქაღალდი, ხელსაწმენდი, დაიფინეთ სახეზე ისე, რომ იგი სახის კანის ყველა უბანს ეხებოდეს. თუ ქაღალდზე გაჩნდა ცხიმის ლაქები, ე.ი. სახე ცხიმიანია, თუ ოდნავ, თანაბრად შეიმჩნევა ცხიმის კვალი, სახე ნორმალურად ითვლება. მშრალი ტიპის კანი ქაღალდზე ლაქას არ ტოვებს. თუ ცხიმის ლაქა მხოლოდ ზოგიერთ ადგილზე გაჩნდა, კანი შერეული ტიპისაა.
– რა თვისებები ახასიათებს თითოეულ მათგანს?
– მშრალი კანი ყველასგან გამორჩეული, თხელი და ნაზია. ის სწრაფად ბერდება. ნაოჭები ადრეულ ასაკში ჩნდება. ასეთი კანი მგრძნობიარეა გარეგანი ფაქტორების მიმართ. კანის სიმშრალეს იწვევს ცხიმის ჯირკვლების ცუდი მუშაობა და კანის ზედაპირიდან სითხის გაძლიერებული აორთქლება, რაც გამოწვეულია არასწორი კვებით. თუ ამას ემატება არასწორი მოვლაც, კანი უსიამოვნო შესახედავი ხდება, ჰკარგავს ელასტიურობას, მოდუნებული, აქერცლილი, დანაოჭებული და გაღიზიანებულია.
ცხიმიანი კანი სქელი, მკვრივი, ხშირად ფერმკრთალია, ზედაპირზე კარგად ჩანს ფორები. კანის ცხიმი გამომუშავდება ცხიმის ჯირკვლებში, ერევა ოფლს და წარმოქმნის კანის ზედაპირზე დამცველ შრეს, რომელიც კანს იცავს გამოშრობისა და გარეგანი ფაქტორების ზემოქმედებისგან. ცხიმიანი კანი ნელა ბერდება და გვიან ჩნდება ნაოჭები, მაგრამ ცხიმი, რომელიც ფორებში ჩნდება, ერევა კანის ცხიმს და წარმოიქმნება "შავი წერტილები" – კომედონები. სწორედ ამით შეიძლება დაუშნოვდეს ცხიმიანი კანი და წარმოიქმნას ფერიმჭამელები და კანის სხვადასხვა დაავადებები.
უმეტესობას შერეული ტიპის კანი აქვს – ადამიანს შეიძლება სახის სხვადასხვა უბანზე სხვადასხვა ტიპის კანი ჰქონდეს, ზოგან ცხიმიანი, ზოგან – მშრალი და ასე შემდეგ. ცხიმიანი უბნებია შუბლი, ცხვირი და ნიკაპი. ასეთი სახის კანის მოვლას განსაკუთრებული ცოდნა და ყურადღება სჭირდება. მისი ცალკეული უბანი საჭიროებს განსხვავებულ მოვლას და დამუშავებას.
– ახლა საკმაოდ ცხელა, როგორ უნდა მოვუაროთ სახის კანს?
– უნდა დაადგინოთ თქვენი კანის რაობა და ამის მიხედვით მოუაროთ კანს, სასურველი ინგრედიენტით. ახლა ხილის სეზონია და შეგიძლიათ გამოიყენოთ სხვადასხვა ხილი, 15–20 წუთი გაიჩეროთ სახეზე. ყველა ხილი სხვადასხვა ეფექტს გვაძლევს. მაგალითად: გარგარი ამშვიდებს, ბანანი ასწორებს და არბილებს, მოცვი ავიწროვებს ფორებს და კვებავს მათ. ატამი ასწორებს და არბილებს, აძლევს სასიამოვნო ფერს. ჟოლოსა და ატმის ნარევი ატენიანებს და კვებავს, ლიმონი ათეთრებს და ფორებს ავიწროვებს. შეგიძლიათ, სიცხის დროს სხვადასხვა ნიღბები გაიკეთოთ. მე კი ჩემს პაციენტებს ყოველთვის ხილის ნიღბებს ვურჩევ ხოლმე, რადგან ისინი საკმაოდ ეფექტურია.
– მაინც, კონკრეტულად რა გამოვიყენოთ დღის განმავლობაში?
– მშრალი კანი მაქსიმალურად უნდა დაიცვათ გამოშრობისგან, იხმაროთ დამატენიანებელი საშუალებები. ცხიმიანი კანის შემთხვევაში კი სასურველია, გამოვიყენოთ ალკოჰოლის შემცველი ლოსიონი.
– აზიანებს თუ არა მაკიაჟი სახის კანს?
– მაკიაჟიც სწორად უნდა იყოს შერჩეული ამა თუ იმ სახის კანისთვის. არსებობს სხვადასხვა ტიპის ტონალური, არ შეიძლება, ცხიმიანი და მშრალი კანის მქონე ქალმა ერთი და იგივე ტონალური იხმაროს. ამიტომ, სანამ შეიძენთ პროდუქციას, დაუკვირდით, არის თუ არა ის თქვენი კანისთვის სასურველი.
– ზოგჯერ კანზე მზისგან ლაქები ჩნდება, როგორ უნდა გავაუფერულოთ ისინი?
– ლაქების გაჩენის შემთხვევაში, უპირველეს ყოვლისა, თავი უნდა დაიცვათ მზისგან. გარუჯვაც ზომიერად უნდა მოხდეს, შუადღის მზეს ქუჩაშიც უნდა მოერიდოთ, არ უნდა გავიდეთ პლაჟზე. უნდა გამოვიყენოთ მზის დამცავი კრემი, რომლის გამოყენებაც ლაქების წარმოქმნას უშლის ხელს. თუმცა, თუ უკვე პრობლემა წარმოქმნილია და მზის ლაქები გაქვთ, აუცილებლად უნდა მიაკითხოთ კოსმეტოლოგს, სადაც სპეციალურად დამზადებულ კრემს შემოგთავაზებენ. ეს საშუალებები რაღაც ეტაპამდე აუფერულებს ლაქებს, მაგრამ თუ მიდრეკილება გაქვთ, ლაქები აუცილებლად შეგახსენებენ თავს.
– როგორ უნდა დავიცვათ თავი მზისგან, თუ მაინც გვიწევს გარეთ გასვლა?
– მოერიდეთ მზეს პიკის საათებში, დილის 10–დან შუადღის 4 საათამდე. თუ გარეთ გასვლა გიწევთ, დაიხურეთ მზისგან დამცავი ქუდი, რომელიც სახეს დაჩრდილავს. მზის სათვალის გარეშე გარეთ არ გახვიდეთ. ეცადეთ, ისეთი სათვალე იშოვოთ, რომელიც 100 პროცენტით დაბლოკავს ულტრაიისფერ სხივებს, სათვალე შეეცადეთ, იყოს მუქი, იყიდეთ კარგი სათვალე სანდო ბრენდისგან. მოერიდეთ ხელოვნურ გარუჯვას – სოლარიუმი მზეზე ბევრად უარესია. საუკეთესო ალტერნატივაა ავტო–გასარუჯი კრემები, რომლებიც კანის ფერს მავნე ზემოქმედების გარეშე ცვლის და უვნებელია ჯანმრთელობისთვის. ჩაიცვით თეთრი ფერი, რომელიც სხივებს აირეკლავს. მოუფრთხილდით თქვენს კანს და მიირთვით ჯანსაღი საკვები.
წყარო: janmrtelobainfo.ge
გარგარი კანს ამშვიდებს, ბანანი არბილებს, ლიმონი ათეთრებს
⏱️ 1 წთ.
👁️ 1 764
100%