სასარგებლო სპორტი - ცურვა (სპორტი და ფიტნესი)

ცურვა ერთმნიშვნელოვნად გამოირჩევა ციკლურ ვარჯიშებს შორის. მ დროს ყველა ჯგუფის კუნთები აქტიურდება, ხოლო სისხლის მიმოქცევის სისტემა, სხეულის ჰორიზონტალური მდგომარეობისა და გარემოს (წყლის) სპეციფიკიდან გამომდინარე, უფრო ნაკლებად იტვირთება, ვიდრე თხილამურებით სრიალისა და სირბილისას. ცურვის დროს გულმკერდზე წყლის ზეწოლის გამო ჩასუნთქვა და ამოსუნთქვა ჭირს, რაც სასუნთქ სისტემას აწრთობს და ავითარებს, ხელს უწყობს ფილტვების სასიცოცხლო ტევადობის გაზრდას. ცურვა განსაკუთრებით სასარგებლოა ბრონქული ასთმით დაავადებულთათვის. გარემოს სპეციფიკა - აუზის მიკროკლიმატი, მაღალი ტენიანობა და სხვა ფაქტორები - ასთმით დაავადებულებზე კეთილისმყოფელ გავლენას ახდენს. ცურვის დროს ასთმის შეტევა არ ვითარდება, მაშინ როცა სირბილისა და ფორსირებული სუნთქვისას მისი აღმოცენების ალბათობა საკმაოდ მაღალია. ცურვისას პრაქტიკულად არ იტვირთება სახსრები და ხერხემალი, ამიტომ ციკლური ვარჯიშის ამ სახეობას წარმატებით იყენებენ ხერხემლის დაავადებათა კომპლექსურ მკურნალობაში. ისინი, ვისთვისაც ხმელეთზე სპორტული დატვირთვა მტკივნეული და სახიფათოა, მშვიდად და შედარებით კომფორტულად ვარჯიშობენ წყალში.

ცურვა რეკომენდებულია ხანდაზმულებისთვის, ინვალიდებისა და მსუქნებისათვის. წყალი, გარდა იმისა, რომ ხელს უწყობს სხეულის მასის დაქვეითებას, სუსტ სახსრებს საშუალებას აძლევს, ისეთ დატვირთვას გაუძლონ, რომელიც ხმელეთზე შესაძლოა საზიანოც კი აღმოჩნდეს. წყლის მაამორტიზებელი თვისებების წყალობით ფიზიკური ვარჯიში სასიამოვნო და ადვილად შესასრულებელია არა მხოლოდ ართრიტით (სახსრების ანთებით) დაავადებულთათვის, არამედ ორსულთათვისაც.