გულმა შეუფერხებლად რომ იმუშაოს ყველა ასაკში, ამისთვის საჭიროა თქვენს ჩვევებს გადახედოთ და ეცადოთ, ყოველდღიური ცხოვრებიდან გულის მტრები სრულად გააძევოთ.
1. მოწევა გულის დაავადებებს შორის ერთ–ერთი ლიდერია. სიგარეტზე უარის თქმა ინფარქტის რისკს რამდენჯერმე ამცირებს.
2. ზედმეტის ჭამა, ცხიმის სიჭარბე და მარილიანი საკვები წონაში მატებას იწვევს. შედეგად ათეროსკლეროზი და ჰიპერტონია ვითარდება, გულზე დატვირთვა იზრდება. რაციონალური კვება – დანაწევრებული მცირე ულუფებით, საკმარისი რაოდენობის ხილითა და ბოსტნეულით გულს ყველა წამალზე უკეთესად ამაგრებს.
3. ნაკლებმოძრავი ცხოვრების წესი, ფეხით გასეირნების ჩანაცვლება ავტომობილით, დილის გამამხნევებელი ვარჯიშის საერთოდ უგულებელყოფა – ყველაფერი ეს გულის კუნთებს ასუსტებს. საჭიროა მოძრაობა. წესად გაიხადეთ, დღეში არანაკლებ 30 წუთისა ვარჯიშს ან სუფთა ჰაერზე გასეირნებას დაუთმოთ.
4. სტრესი გულის ძალიან ცბიერი მტერია. ნერვიულობა სამსახურში, ოჯახში, ქალაქის დაძაბული ცხოვრების ტემპი, ძილის უკმარისობა გულს უფრო სწრაფად ანგრევს, ვიდრე მოწევა ან ალკოჰოლი. ისწავლეთ მოდუნება, კარგად გამოიძინეთ, ცხოვრებით დატკბით და გული მადლობელი დაგრჩებათ.
გულის პრობლემების ნიშნები
გული არ მიეკუთვნება "მდუმარე" ორგანოებს. თუ უჭირს, ამის შესახებ მაშინვე გვამცნობს. სამწუხაროდ, ყოველთვის არ შეგვიძლია დროულად გამოვიცნოთ ეს პირველი საგანგაშო ზარები. ამიტომ მეტად მნიშვნელოვანია გულის მუშაობაში უთანხმოების ძირითადი სიმპტომები განვასხვაოთ. თუ მათ თქვენში აღმოაჩენთ, ექიმთან გამოკვლევა ჩაიტარეთ, მაშინაც კი, თუ გულის ტკივილს არ უჩივით. გულის პრობლემების ნიშნებია:
1. ფეხების შეშუპება, განსაკუთრებით საღამოსკენ, როდესაც ჩვეულებრივი ფეხსაცმელი ვიწრო ხდება. რა თქმა უნდა, ეს შეიძლება იყოს ვენების ვარიკოზული გაგანიერების ნიშანი, მაგრამ ნებისმიერ შემთხვევაში აუცილებელია გულის შემოწმება.
2. თუ დილაობით თავის ფეთქვითი ტკივილი გაწუხებთ და ამავდროულად იდაყვში ან მაჯაში, განსაკუთრებით მარცხენა მხარეს, მტკივნეული შეგრძნებები აღმოცენდება, ეს სერიოზული საბაბია სასწრაფოდ ექიმს მიმართოთ.
3. ქოშინი და სწრაფი დაღლა, გახშირებული გულისცემა მცირე ფიზიკური დატვირთვის დროსაც კი, მაგალითად, კიბეზე ასვლის ან ბინის დალაგების შემდეგ.
4. გულში უთანხმოება ხშირად კუჭის ტკივილით, გულისრევით, განსაკუთრებით სტრესისა და განცდების შემდეგ, ვლინდება. ეს შეიძლება იყოს გასტრიტი, მაგრამ დიდი ალბათობაა, რომ ამგვარად გული თავს გვახსენებს.
5. მწვავე ტკივილი გულმკერდში, შიშის გრძნობა, მოჭერითი შეგრძნება მკერდში – სასწრაფო დახმარებას საჭიროებს. ეს სტენოკარდიის ან ინფარქტის შეტევის ნიშნებია.
რას გვამცნობს პულსი
თუ საკუთარ პულსს მოუსმენთ, გაიგებთ, თქვენი გული როგორ მუშაობს. პულსი ასევე თქვენს ორგანიზმში არსებულ სხვა პრობლემებზეც გვატყობინებს.
პულსის გასინჯვა არ შეიძლება მაშინვე ჭამის ან ალკოჰოლის მიღების შემდეგ, შიმშილის მწვავე შეგრძნებისას, მძიმე ფიზიკური სამუშაოს ან დაძაბული გონებრივი შრომის, მასაჟის, შხაპის, აბაზანის შემდეგ და ქალებში კრიტიკულ დღეებში. სხვაგვარად თქვენი თვითდიაგნოსტიკა დამახინჯებული იქნება.
პულსი ისინჯება სამი შუათითის ბალიშებით ზედმეტი ხელის დაჭერის გარეშე. ასე შეიგრძნობთ არამხოლოდ შეკუმშვის სიხშირეს, ასევე პულსის სხვა მახასიათებლებსაც შენიშნავთ.
1. შეკუმშვის სიხშირე მოზრდილ ადამიანში, ნორმაში საშუალოდ წუთში 72 დარტყმაა. ასაკთან ერთად დაახლოებით 65 დარტყმამდე მცირდება. თუ თქვენი პულსი წუთში 45 დარტყმაზე ნაკლებია, მაშასადამე, დაბალი წნევა და გულის პრობლემები გაქვთ. 59–46 დარტყმა წუთში ფარისებური ჯირკვლის ფუნქციის დაქვეითების ნიშანია. პულსი 90–ზე ზევით მაღალი წნევის, ნევროზის, ანემიის, ფარისებური ჯირკვლის დაავადებების, გულის უკმარისობის დროს აღინიშნება.
2. შეკუმშვის რიტმულობა მნიშვნელოვანი ნიშანია. თუ ურიტმო დარტყმებს გრძნობთ ან თუ დარტყმა რამდენიმე წამის განმავლობაში არ არის, ეს არითმიაა. არათანაბარი პულსი ქაოსური დარტყმებით მოციმციმე არითმიის ნიშანია, რომელიც თრომბის წარმოქმნით იმუქრება.
3. პულსის მესამე დიაგნოსტიკური ნიშანი – მისი შევსებაა. თუ პულსის ერთი დარტყმა ძლიერია, ხოლო მეორე სუსტი, ეს შეიძლება გულის მანკის ნიშანი იყოს. სუსტი პულსი, რომელიც ძლივს შეიგრძნობა, ანემიაზე ან დაბალ წნევაზე მეტყველებს.
როგორ დავამშვიდოთ გულის ფანცქალი
ზოგჯერ განცდების, მეტისმეტი ფიზიკური დატვირთვის ან უბრალოდ ძლიერ ცხელი ამინდის გამო, გულისცემა ძლიერ გახშირებული ხდება. ასეთ სიტუაციაში კარგად ეხმარება სამკურნალო მცენარეების ხალხური საშუალებები.
ერთი მუჭა ქორფა ან გამხმარი შავი მოცხარის კენკრა ან 2 სუფრის კოვზი მოცხარის მურაბა ჭამეთ, თან 0,5 ჭიქა თბილი წყალი დააყოლეთ.
4 ჩაის კოვზ კალენდულას ყვავილებს 2 ჭიქა მდუღარე დაასხით. ერთი საათი დადგით, გაწურეთ. 0,5 ჭიქა დღეში 4–ჯერ დალიეთ.
0,5 სუფრის კოვზი ბოლოკის წვენი და იმავე რაოდენობის თაფლი აურიეთ. დღეში 1 სუფრის კოვზი 3–ჯერ ჭამეთ.
გულისცემას კარგად ამშვიდებს მელისას ნაყენი. 1 სუფრის კოვზ ბალახს 1 ჭიქა მდუღარე დაასხით, გააგრილეთ, გაწურეთ და მცირე ყლუპებით დღის განმავლობაში დალიეთ.
შავბალახა – გულის წამალი
შავბალახას ბევრ ქვეყანაში "გულის ბალახს" უწოდებენ. მისი ფოთლები მდიდარია გლიკოზიდებით და, პირველ რიგში, რუტინით. ეს ნივთიერებები ძალიან კარგ გავლენას ახდენენ გულის კუნთზე. სწრაფად და ამავდროულად მსუბუქად ამშვიდებენ ნერვულ სისტემას, სტრესს, უძილობას, სხვადასხვა ნევრალგიებს ეფექტურად ებრძვიან.
შავბალახას ნაყენის მომზადების წესი: 2 სუფრის კოვზ ბალახს 1 ჭიქა მდუღარე დაასხით. 2 სუფრის კოვზი დღეში 3–5–ჯერ, ჭამის შემდეგ მიიღეთ.
შავბალახას ნაყენი სპირტზე დამზადებული. 1 სუფრის კოვზ გამხმარ, დაქუცმაცებულ ბალახს 1 ჭიქა 70%–იანი სპირტი დაასხით, 10 დღის განმავლობაში ბნელ ადგილას დადგით, გაწურეთ. 30–50 წვეთი დღეში 3–4–ჯერ, ჭამის წინ მიიღეთ.
საღამოს შავბალახას ნაყენის თბილი აბაზანა ძილს აუმჯობესებს, ნერვებს ამშვიდებს და გულისთვის სასარგებლოა. წყლის ტემპერატურა 37 გრადუსს არ უნდა აღემატებოდეს.
გულისთვის მავნე და სასარგებლო პროდუქტები
გულისთვის საზიანოა ცხიმიანი პროდუქტები, შებოლილები, ერბოზელილი ცომეული, ფასტფუდები, მარილი.
სასარგებლოა ხილი და ბოსტნეული, უცხიმო ხორცი, თევზი, უცხიმო რძის პროდუქტები, თხილეული და კვერცხი.
თაფლით მკურნალობა
გამაძლიერებლი ვიტამინური სასმელი. 1 სუფრის კოვზ ასკილის გამხმარ ნაყოფს 2 ჭიქა მდუღარე დაასხით და 10 წუთი ხარშეთ. გააცივეთ, გაწურეთ, 1 სუფრის კოვზი თაფლი დაუმატეთ. 1/4–1/2 ჭიქა დღეში 2–3–ჯერ დალიეთ.
მაღალი წნევის საწინააღმდეგო. შტოშის 0,5 ჭიქა ახალგამოწურულ წვენს 0,5 ჭიქა თაფლი დაუმატეთ და 2 კვირის განმავლობაში 1 ჩაის კოვზი დღეში 3–ჯერ მიიღეთ.
გულისთვის საუკეთესო დესერტი. თანაბარი რაოდენობით აურიეთ თაფლი, ნიგოზი, გარგარის ჩირი, ქიშმიში და შავი ქლიავი, შეგიძლიათ ასევე ლეღვი და კანიანად დაჭრილი ლიმონი დაუმატოთ. ყოველდღიურად 1 სუფრის კოვზი დილით და საღამოს ჭამეთ. მაცივარში შეინახეთ.
წყარო: sana.ge
მოიშორეთ გულის მტრები
⏱️ 1 წთ.
👁️ 12 339
100%