ამ ბოლო დროს, კანის სიმსივნის გაჩენის მიზეზებში მზემაც საკმაოდ დიდი დოზით იჩინა თავი. როგორც ჩანს, მისი სასიამოვნო სხივები, რომლებსაც მთელი წელიწადი ველოდებით, ლამის მომაკვდინებლად მოქმედებს ჯანმრთელობაზე.
კოსმეტოლოგებმა კარგად იციან, რამდენად არსებობს იმის შანსი, რომ ახალგაზრდა გოგონებმა რუჯზე უარი თქვან, ამიტომ მათ კანის მოვლის მაქსიმალურად ეფექტურ საშუალებებს ურჩევენ. იმაზე, რომ შუადღის მზე მავნებელია, ყველა თანაბრად თანხმდება, თუმცა ოდნავ განსხვავებულ და სასარგებლო რჩევებს Lollipop-ის მკითხველს კოსმეტოლოგი ტატა კვაჭანტირაძე აძლევს:
ქალბატონო ტატა, საერთოდ შეიძლება თუ არა სახის კანისთვის რუჯის მიღება?
ნამდვილად მოგატყუებთ, რომ გითხრათ, კოსმეტოლოგები ამას მივესალმებით მეთქი, მაგრამ რუჯის აკრძალვაც ჩვენს ძალებს აღემატება. შოკოლადისფერი კანი ყველა ქალს უხდება და სახის კანზე გარკვეულ დეფექტებს მალავს, თუმცა მის მიღებამდე სახის კანზე დამატენიანებელი პროცედურა აუცილებლად უნდა გაკეთდეს. პრობლემატური კანის არსებობის შემთხვევაში, სასურველია მისი გაწმენდაც. რუჯის მიღების პროცესში კი დამცავი კრემის გამოყენებაა მნიშვნელოვანი.
როგორ მივიღოთ ზაგარი სწორად ისე, რომ სახეს ნაკლებად ვავნოთ?
ვიმეორებ, მნიშვნელოვანია დამცავი კრემის წასმა როგორც სახეზე, ასევე – ტანზე. გოგონებს ჰგონიათ, რომ მისი გამოყენებით კარგად ვერ გაირუჯებიან და პროცესი დიდი ხანი გაგრძელდება. სინამდვილეში, მისი მეშვეობით კანი ბევრად უფრო ბზინვარე, ჯანმრთელი ხდება. გარდა ამისა, გასათვალისწინებელია მზეზე წოლის დროც. ზაგარი უნდა მიიღოთ დილის 11 საათამდე და საღამოს 5 საათის შემდეგ.
მზის დამცავ რომელ კრემს გაუწევდით რეკომენდაციას?
დღეს საქართველოს ბაზარზე უამრავი კარგი პროდუქცია შემოდის და დაკონკრეტებისგან თავს შევიკავებ, თუმცა გაითვალისწინეთ, რომ კრემის შემადგენლობის წაკითხვა აუცილებელია. გარდა ამისა, შავგრემანი გოგონასთვის 15-25%-იანი დამცავია რეკომენდებული, ხოლო თეთრი და ქერა გოგონასთვის – 70-80%-იანი. კრემი დილით, ზღვაზე ან აუზზე გასვლამდე მინიმუმ ნახევარი საათით ადრე უნდა წაისვათ. წყლიდან ამოსვლის შემდეგ კი კვლავ გადაისვათ სხეულზე. სწორედ ამ გზით მიღებული რუჯია უსაფრთხო და გრძელვადიანი.
ახლა გვითხარით, როგორ უნდა მოვუაროთ გარუჯულ სახის კანს?
ზოგადად, რუჯის მიღების შემდეგ კოსმეტოლოგთან ვიზიტია რეკომენდებული, თუმცა თავის მოვლა სახლის პირობებშიც შესაძლებელია. საუკეთესო ხერხს დამატენიანებელი ნიღბები წარმოადგენს. არავითარ შემთხვევაში არ დატოვოთ სახის კანი უყურადღებოდ, რადგან მზის სხივები მისთვის დიდი სტრესიცაა და დაბერების პირველი ნიშნების მაუწყებელიც.
სახლის პირობებში გარუჯული სახის კანის მოვლა ყველასთვის საინტერესო იქნება, რას ურჩევთ ქალბატონებს?
საუკეთესო დამატენიანებელია ნუშის ზეთი, ატმის ზეთი… ,,ველედას“ ზეთები, თუმცა რჩევის მიცემა ზეპირად არ შემიძლია, რადგან დიდი მნიშვნელობა აქვს იმას, როგორ მდგომარეობაშია სახის კანი. ზოგადად კი შემიძლია ვთქვა, რომ მშრალი კანის მქონე ქალებისთვის ტკბილი ხილისგან გაკეთებული ნიღბები ნამდვილი მისწრებაა, ხოლო ცხიმიანი კანის მქონეებისთვის – მჟავე ხილის ნიღბები.
ხშირია სახის კანის დამწვრობა გარუჯვისას, ამ შემთხვევაში რას ურჩევთ ჩვენს მკითხველს?
მზის დამწვრობის დროს პირველად დახმარებას თურმანიძის ან პანტენოლის მალამოები წარმოადგენს. შედეგის არ არსებობის შემთხვევაში კი, კოსმეტოლოგთან ან დამწვრობის ცენტრში ვიზიტია აუცილებელი. გააჩნია, მდგომარეობას!
რუჯი ქართველ ქალბატონებს ძალიან უყვართ. თბილისის ქუჩებში უკვე მრავალი გარუჯული ქალბატონი დადის, თუმცა უმეტესობას სახის კანზე ლაქები უჩნდება. როგორ ავარიდოთ თავი ლაქების გაჩენას და თუ გაგვიჩნდა , როგორ მოვიშოროთ ის?
ლაქების ასარიდებლად მაღალპროცენტიანი დამცველობის კრემი უნდა გამოვიყენოთ. ის ხომ კანს არა მხოლოდ დამწვრობისგან, არამედ სხივების მავნე ზემოქმედებისგან იცავს! თუ ლაქები მაინც გაჩნდა, მაშინ ლაქების გადამყვანი პროცედურების ჩასატარებლად შემოდგომა-ზამთარს ველოდებით.
შესაძლებელია თუ არა ლაქების საწინააღმდეგო პროცედურების ჩატარება სახლის პირობებში?
სახლის პირობებში ყველაზე მარტივი მოსამზადებელი ლიმონის წვენისა და კვერცხის ცილის ნაზავია. არაჩვეულებრივია ოხრახუშის ნახარშის წვენიც, რომელიც სახეს ათეთრებს, თუმცა გაითვალისწინეთ: ეს პროცედურები რუჯის კანდან გადასვლის შემდეგ კეთდება!
ქალბატონებს ხშირად უწევთ გარუჯულ სახეზე მაკიაჟის გაკეთება, ან სიწითლის დაფარვის მიზნით ტონალური კრემის გამოყენება. როგორ წავისვათ ტონალური სწორად და როგორ შევინარჩუნოთ გარუჯულ სახის კანზე მაკიაჟი?
გარუჯულ სახეზე პირდაპირ ტონალურის წასმა არ შეიძლება, აუცილებელია დამატენიანებელი ბაზა ან კრემი. პირადად მე რეკომენდაციას „ატელიერის“ ტონალურებს ვუწევ.
ყველა ქალს აინტერესებს, თუ ეპილაციის რომელი ტიპი შეიძლება გაკეთდეს გარუჯულ სახის კანზე…
გარუჯულ სახეზე მხოლოდ „ელოს ეპილაციის“ გაკეთება შეიძლება. ჩემი აზრით, ეს აპარატი ერთადერთი უსაფრთხო და ჭეშმარიტად კეთილი გამოგონებაა 21-ე საუკუნეში. ეპილაციამდე კი პაციენტმა აუცილებლად უნდა თქვას, აქვს თუ არ მიღებული რუჯი, რადგან ყენდება სპეციალური პარამეტრები რუჯისთვის.
და ბოლოს, რას ურჩევთ ზოგადად ქართველ ქალბატონებს? როგორ მოუარონ მათ თავს?
საქართველოში ძალიან ბევრი ლამაზი ქალბატონია, თუმცა მათი უმრავლესობა მოუვლელია. (ვგულისხმობ სახის კანს) სახის კანის მოვლა ჩვეულებრივი ეთიკა, კულტურა და ჰიგიენაა. ჩემი აზრით, ნაკლები მნიშვნელობა აქვს ტანისამოსს, ბრენდსა და ფეხსაცმელს. მთავარი სუსტი სქესისთვის სახეა, ამიტომ ჩემი რჩევა კოსმეტოლოგთან სისტემატური ვიზიტი იქნებოდა.
ავტორი: თამარ შველიძე
წყარო: lollipop.ge