ჰერცოგის პრინცის მეუღლის პირველმა გამოსვლამ საზოგადოების წინაშე ყველა გააოცა. მშობიარობიდან ერთ თვეში ქეით მიდლტონი შესაშურ ფორმაშია.
ქეითის გარემოცვიდან ერთ-ერთი წყაროს თქმით, ჰერცოგის მეუღლეს არაფერი მოუმოქმედებია იმისათვის, რომ დაეკლო წონაში. ვახდენთ ციტირებას:
"ქეითი ჯერ კიდევ ძუძუთი კვებავას პატარა პრინცს, ამიტომაც მისთვის დიეტა არ შეიძლება. მას ორსულობის დროს უმნიშვნელოდ ჰქონდა მომატებული წონაში, რაც მარტივად დაიკლო. ახლა კი ახალგაზრდა დედა დაუბრუნდა იოგას და ბევრს სეირნობს სუფთა ჰაერზე პატარასთან ერთად".
როგორ დავიკლოთ მშობიარობის შემდეგ? ეს ბევრისთვის მტკივნეული თემაა. ამიტომაც ჩვენ რამდენიმე მარტივ მეთოდს გთავაზობთ:
მეთოდი პირველი: მოთმინება
თუ თქვენ დაორსულებისას ნორმალური წონა გქონდათ და ცხრა თვის განმავლობაში მოიმატეთ 10-დან 14 კგ-მდე, მშობიარობის შემდეგ ზედმეტი კილოგრამები თავისით გაქრება. თუმცა არც ამ შემთხვევაში უნდა დაივიწყოთ ვარჯიში. თუ დაორსულებამდეც და მას მერეც დაშვებულ ნორმაზე მეტი მოიმატეთ, მაშინ უკან, ლამაზ სხეულამდე დასაბრუნებელი გზისთვის მინიმუმ ერთი წელი დაგჭირდებათ.
სპეციალისტების აზრით, წონაში დაკლებაზე აქტიურად ზრუნვა - დაბალკალორიული საკვების მიღება, ვარჯიში, - უნდა დაიწყოთ მშობიარობიდან 6 თვის შემდეგ.
"თავს ვაიძულე, მშობიარობიდან 3 თვის შემდეგ გადავსულიყავი კარდიოვარჯიშებსა და დაბალკალორიულ დიეტაზე. ეს ძალიან რთული იყო და დღემდე ვნანობ, რომ იმ საზოგადოებრივი აზრის ქვეშ მოვექეცი, რომელიც ვარსკვლავებისგან ბავშვის გაჩენისთანავე უზადო ფორმებს მოითხოვს." (ბიონსე)
მეთოდი მეორე: კვება
არც იფიქროთ მკაცრ დიეტებზე, - ერთხმად გაიძახიან სპეციალისტები. შესაძლოა, თქვენი საყვარელი ვარსკვლავი პირდაპირ სამშობიაროდან გამოვიდა 42 ზომა ჯინსით, მაგრამ კარგია თუ არა ეს მისი ჯანმრთელობისთვის, ეს კიდევ საკითხავია.
რას ურჩევენ ახალგაზრდა დედებს ექსპერტები? იკვებეთ მრავალფეროვნად, ხშირად (5-6-ჯერ მცირე პორციებით) და სრულფასოვნად. თქვენი დღიური რაციონის კალორიულობა არ უნდა ჩამოვიდეს 1800-ის ქვემოთ. განსაკუთრებით მაშინ, თუ ბავშვი ბუნებრივ კვებაზე გყავთ.
"მშობიარობის შემდეგ ქალისთვის სუპერპროდუქტებია: თევზი, რძე და ნატურალური იოგურტი, მჭლე ხორცი, ქათამი, ლობიო, შვრია, ბოსტნეული და ხილი. ხოლო "ანტიპროდუქტებია" – ფასტფუდი, კანფეტები, ტორტები, ორცხობილები, ნამცხვრები, ნახევარფაბრიკატები, ძეხვეული, შებოლილი პროდუქტები, ასევე, ცხიმიანი კერძები და სოუსები."
მეთოდი მესამე: წყალი
სვით ბევრი წყალი – ჩვეულებრივი, უგაზო მინერალური, მწვანე ჩაი – მთელი დღის განმავლობაში. ეს არა მარტო გასუქებისგან დაგიცავთ, არამედ დააჩქარებს მეტაბოლიზმს, დაგიქვეითებთ მადას, ასევე, ვერ შეჭამთ ბევრს, რადგან კუჭი ნახევრად სავსე გექნებათ. როგორ გავარკვიოთ, საკმარის წყალს სვამთ თუ არა? ექსპერტები ამბობენ: როცა თქვენ სვამთ საკმარის წყალს, თქვენი შარდი უნდა იყოს გამჭვირვალე და საჭირო ოთახში შესვლის სურვილი უნდა გიჩნდებოდეთ ყოველ 3-4 საათში ერთხელ.
უნდა გამორიცხოთ რაციონიდან ალკოჰოლი და გაზიანი სასმელები.
მეთოდი მეოთხე: ძუძუთი კვება
მეცნიერებში ამ საკითხში აზრი ორად იყოფა: ერთნი თვლიან, რომ წონის დასაკლებად საკმარისია ძუძუთი კვება, მეორენი კი ამბობენ, რომ არანაირი მნიშვნელობა არ აქვს, ბუნებრივ კვებაზე ჰყავს ქალს პატარა თუ ხელოვნურზე, დასაკლებად ერთნაირი ძალისხმევაა საჭიროო. თუმცა, ეჭვს არ ბადებს ფაქტი, რომ ძუძუთი კვება სასარგებლოა, როგორც ბავშვისთვის, ასევე დედისთვის – ის აჯანსაღებს ქალის ორგანიზმს და ამყარებს ემოციურ კავშირს დედასა და შვილს შორის.
"ძუძუთი კვება ყოველდღიურად დაახლოებით 300 კალორიას გაკარგვინებთ (ზუსტად ამდენ კალორიას ხარჯავს ორგანიზმი რძის ჩადგომისას). თუ ბავშვი მადას არ უჩივის ან სულაც ტყუპი გყავთ, ამ შემთხვევაში კალორიები ორმაგად დაიწვება."
მეთოდი მეხუთე: მოძრაობა
ფიზიკური მოძრაობა, პლუს სწორი კვება, ცხიმებს დაწვავს და არა კუნთებს. ბავშვზე ზრუნვა - ერთგვარი ფიზიკური დატვირთვაც არის, თუმცა არა სრულფასოვანი. ამერიკული სპორტული მედიცინის კოლეჯის სპეციალისტებმა გამოთვალეს: წონაში დაკლების მსურველი ქალის საშუალო ფიტნეს-დრო კვირაში 150 წუთს უნდა შეადგენდეს.
რა არის დასაშვები? ცეკვები, იოგის ზოგიერთი ელემენტი, რგოლის (ჰულაჰუპის) ტრიალი, ჩქარი სიარული, საღამოს გასეირნება.
რა არ არის დასაშვები? ცურვა, ბუქნები, სირბილი, აერობიკა, ჩოგბურთი, ხტუნვა და სიმძიმეების აწევა.
როდიდან შეიძლება ვარჯიშის დაწყება? თუ მშობიარობა ბუნებრივად და გართულების გარეშე მოხდა – 6-8 კვირის შემდეგ, ხოლო საკეისრო კვეთის ან მძიმე მშობიარობის შემთხვევაში - მაშინ, როცა ექიმი დაგრთავთ ნებას. დატვირთვა უნდა იყოს რეგულარული: 3-5-ჯერ კვირაში 30-60 წუთის განმავლობაში.
მეთოდი მეექვსე: ძილი
გამოუძინებლობა ხელს უწყობს ზედმეტი წონის დაგროვებას და მის მოშორებასაც აფერხებს, განსაკუთრებით იმ შემთხვევაში, თუ ახალნამშობიარებ ქალს ღამეში 5 ან ნაკლები საათი სძინავს. საბედისწერო ჯაჭვი შემდეგნაირად მუშაობს: როცა დაღლილი ხართ, თქვენი ორგანიზმი გამოიმუშავებს კორტიზოლს და სტრესის სხვა ჰორმონებს, რომლებიც ხელს უწყობს ზედმეტი კილოგრამების დაგროვებას.
გარდა ამისა, როცა გადაქანცული ხართ და უძილო, საკუთარი თავის მოვლის თავიც აღარ გაქვთ, ვარჯიშზე რომ აღარაფერი ვთქვათ, ჯანმრთელი საკვების მომზადებაც გეზარებათ, შედეგად კი რაც ხელში მოგხვდებათ, იმას ჭამთ. სპეციალისტები გირჩევენ: თუ ღამე პატარა არ გაძინებთ და სრულფასოვანი 8 საათი ვერ გძინავთ, აუცილებლად დაისვენეთ და წაუძინეთ დღისით, როცა ბავშვს სძინავს.
მეთოდი მეშვიდე: კოსმეტიკური პროცედურები
მშობიარობის შემდეგ სხეული დიდ ყურადღებას საჭიროებს: "ზედმეტ კილოგრამებს ბონუსად ცელულიტი და "სტრიები" მოჰყვება. თუმცა, მოვლის დაწყებამდე აუცილებელია ექიმთან კონსულტაციის გავლა – მშობიარობიდან პირველ თვეებში არ შეიძლება ყველა პროცედურის გაკეთება. მაგალითად, ქიმიური პილინგი, მეზოთერაპია და მიკროდემაბრაზია იკრძალება ძუძუთი კვების დროს.
რა დაგვეხმარება სხეულის ფორმაში მოყვანაში?
მიოსტიმულაცია. ფიზიკური დატვირთვის "შემცვლელი" პრობლემურ ადგილებზე: თეძოებზე, მუცელზე, ფეხებზე. მიოსტიმულატორი-ხელსაწყოები (ხშირად არის ქამრის ან ბალიში-პეპლის სახის) იმპულსების ზემოქმედების შედეგად იწვევს კუნთების შემცირებას.
წყალმცენარეების ნიღბები. წყალმცენარეები შეიცავს ბიოაქტიურ ნივთიერებებს, რომლებიც "სტრიებს" ებრძვის, გამოჰყავს ორგანიზმიდან ტოქსინები, აუმჯობესებს ნივთიერებათა ცვლას, აჯანსაღებს კანს.
მასაჟი. ხელის, ვაკუუმური, აპარატის... პროცედურა ჭიმავს კანს, კვებავს და აძლიერებს სისხლის მიმოქცევას, ნივთიერებათა ცვლას, გამოჰყავს ორგანიზმიდან ტოქსინები, "შლის" კანქვეშა ცხიმოვან ფენას.
მეთოდი მერვე: პოზიტიური განწყობა
არავითარ შემთხვევაში არ ჩაეფლოთ შავ-ბნელ ფიქრებში იმის შესახებ, რომ ამის შემდეგ თქვენი გამოსახულება სარკეში ბეჰემოთისას დაემსგავსება. ღმერთმა არ ქნას, რომ ეს განწყობა ჩვევაში გადაგეზარდოთ და გაართულოთ სიტუაცია... ძალიან კარგი იქნება, თუ გვერდით გყავთ ქმარი, მეგობრები და ახლობლები, რომლებიც გეხმარებიან ბავშვის გაზრდაში და შესაბამისად, დრო გრჩებათ თავის მოსავლელად.
დადებით განწყობას შეგიქმნით: შოპინგი, კინო-თეატრში სიარული, საყვარელი წიგნები და მუსიკა, წყლის პროცედურები, ბავშვთან ერთად ჰაერზე სეირნობა, - ყველაფერი ეს ენერგიით აგავსებთ და გაგათავისუფლებთ დეპრესიისგან.
წყარო
როგორ დავიკლოთ სწრაფად მშობიარობის შემდეგ?
⏱️ 1 წთ.
👁️ 3 896
100%