როგორ დავიცვათ შვილი სიმსუქნისგან

სიმსუქნის უარყოფითი გავლენის შესახებ მეცნიერებს სულ ახალ–ახალი არგუმენტები მოჰყავთ. ჭარბი წონა ბავშვებშიც დიდ პრობლემას წარმოადგენს. პატარების სიმსუქნის მიზეზი მრავალია, მაგრამ არსებობს რამდენიმე ძირითადი მიზეზი, რაც ჭარბი კილოგრამების დაგროვებას განაპირობებს.

პირველ ადგილზე ზომაზე მეტი საკვების მიღება დგას, მეორეზე – ორსულობის პერიოდში დედის არასწორი კვება, მესამე გენეტიკური წინასწარგანწყობა გახლავთ, მეოთხე ადგილზე კი სხვადასხვა სახის დაავადებებია: ენდოკრინული პრობლემები, ჰორმონული დარღვევები, სხვადასხვა სისტემის ფუნქციის მოშლა…

ყურადღებიანი და ფრთხილი მშობელი შვილის რაციონს ზედმიწევნით არჩევს და ექიმის რჩევებს ითვალისწინებს. ლიმონათი, "კოკა კოლა", ტკბილი გაზიანი სასმელები, ჰამბურგერი, ჩიფსები… ეს იმ საკვების არასრული სია გახლავთ, რომლებიც არც სასარგებლოა და ჭარბი კილოგრამების დაგროვებასაც უწყობს ხელს.

მშობლების პირველი შეცდომა შვილის მიმართ ლიბერალური მოპყრობაა. ისინი თავიანთ პირმშოს არაფერს უკრძალავენ და ცდილობენ, ყველანაირად გაანებივრონ, მათ შორის ნუგბარითაც, რომელიც ხშირად სულაც არ არის სასარგებლო.

მეორე შეცდომა ავტორიტარული მიდგომაა, ანუ ძალით კვება. ამ შემთხვევაში ყველაზე მეტად რისკ ჯგუფში ის ბავშვები შედიან, რომელთა მშობლებიც კვებასთან მიმართებაში ძალიან მკაცრები არიან და შვილს საჭმლის ჭამას აძალებენ. 40%–ის შემთხვევაში ჭარბი წონის დაგროვებას სწორედ იძულებითი კვება იწვევს.

იძულებითი კვების შემთხვევაში დროთა განმავლობაში ბავშვს უყალიბდება გარკვეული რეფლექსი, რომელიც სტრესულ სიტუაციაში ჭამისაგან მიღებულ სიამოვნებასთანაა დაკავშირებული. როცა პატარას ეს ჩვევა გამოუმუშავდება, უკვე ძალიან რთულია მასთან ბრძოლა.

ასევე დიდი მნიშვნელობა აქვს, თუ რა სახის კვებას ანიჭებენ უპირატესობას ოჯახში. თუ ეს პრობლემა მოგვარებულია და ჯანსაღი კვება წესად გაქვთ, მაშინ შვილს მშვენიერ მაგალითს აძლევთ და პრობლემები თქვენგან შორს იქნება.
იმისათვის, რომ პატარა სწორ, ზომიერ და თანამიმდევრულ კვებას მიაჩვიოთ, საჭიროა მისთვის გასაგებ ენაზე განუმარტოთ, რატომ არის ასეთი დამოკიდებულება საჭირო და რა სახის საკვების მიღება არ არის რეკომენდებული.



შვილის სწორ კვებაზე ზრუნვა მომავალმა დედიკომ ორსულობის პერიოდიდან უნდა დაიწყოს. თავად მიიღოს ჯანსაღი საკვები, ვიტამინები და მინერალები, რათა ჩანასახი ძლიერი იყოს.

ჭარბად ხილ–ბოსტნეული – ეს არის უმთავრესი, რასაც ბავშვი პატარაობიდანვე უნდა მიაჩვიოთ. ყურადღება გაამახვილეთ იმაზეც, რამდენად სათანადოდ არის პატარას ორგანიზმი უზრუნველყოფილი საჭირო ვიტამინებით, მინერალებით და სხვა სასარგებლო ნივთიერებებით. თუ ატყობთ, რომ ბავშვი მიდრეკილია სიმსუქნისადმი, საჭიროა მისი ფიზიკურად დატვირთვა და აქტიური წესით ცხოვრება. პატარაობიდანვე ატარეთ სპორტზე. ბუნებრივია, დატვირთვა მისი ასაკის შესაბამისი უნდა იყოს.

წყარო: janmrtelobainfo.ge