ადრე თუ გვიან ეს დღე დგება თქვენს ცხოვრებაში – ანუ პირველი ერთობლივი საუზმე! პირველ ღამეს აუცილებლად თან ახლავს პირველი დილა, რომელიც ასევე არანაკლებ მნიშვნელოვანია. ის თუ როგორ წარიმართება თქვენი პირველი საუზმე განაპირობებს თქვენი ურთიერთობის მომავალს და მიმართულებას – საკურთხეველთან თუ კარებთან ბარგით ხელში.
თუ დილით ახალმოდუღებული ყავის და ტოსტების ან კრუასანების სურნელმა გაგაღვიძათ, ჩათვალეთ, რომ ზღაპარში აღმოჩნდით, ვინაიდან მამაკაცები იშვიათად იწუხებენ თავს საყვარელი ქალისათვის, რომ მას საუზმე პირდაპირ საწოლში მიართვან (მით უმეტეს თუ ღამე თქვენს ტერიტორიაზე გაატარეთ). ქვემოთ გთავაზობთ რამოდენიმე ვერსიას საუზმის მომზადების შესახებ:
- მან მოითხოვა არა საუზმე არამედ ნამდვილი სადილი – ხაში, მწვადი, ღომი, შემწვარი კარტოფილი, ხინკალი და ა.შ.
განმარტება: ალბათ მას დედამისი სწორედ ასეთი კერძებით ანებივრებს დილაობით და მას სურს, რომ თქვენც იგივე გააკეთოთ. ამიერიდან უნდა შეძლოთ დილაობით 1 საათით ადრე ადგომა, რომ ეს კერძები მომზადოთ. თუ რა თქმა უნდა ასეთ მამაკაცთან გენდომებათ ურთიერთობის გაგრძელება. ეს თქვენს სურვილზეა დამოკიდებული. ერთის მხრივ, ასეთი საუზმე დამღლელი და რთულია, მეორეს მხრივ კი თქვენ ფაქტიურად უკვე ოჯახი ხართ.
- ის მხოლოდ ყველით და პურით დანაყრდა. ჩაის მაგივრად კი სწრაფი კოცნა ლოყაზე.
განმარტება: ნურც იფიქრებთ, რომ მისგან მზრუნველობას და სათანადო ყურადრებას მიიღებთ. მოგიწევთ იქით მისი პატრონობა და მოვლა. სხვათაშორის სანამ სამსახურში გაიქცევა, პერანგის საყელო გაუსწორეთ. არაა გამორიცხული, რომ მას სიჩქარეში დაავიწყდეს მოწესრიგება.
- მას საუზმე მყუდრო კაფეში მოსწონს.
განმარტება: ყველაფერი გასაგებია. თქვენი ურთიერთობა ისევე ჰკიდია ჰაერში, როგორც ჩემს აივანში ჩინური ზარები. თუმცა, თუ თქვენ თავისუფალი ურთიერთობის მოყვარული ხართ ასეთი ურთიერთობა ზუსტად თქვენთვისაა.
- თქვენ ერთად მოამზადეთ საუზმე, ერთად გაშალეთ სუფრა და ერთად აალაგეთ.
განმარტება: იდეალურო წყვილი! თქვენმა რჩეულმა მამაკაცმა არა მხოლოდ რომანტიკული, არამედ სერიოზული ურთიერთობისათვის მზაობის სურვილი გამოხატა. თუ ორივემ ისიამოვნეთ ამ პროცესით ე.ი. ნამდვილად იდეალური წყვილი ბრძანდებით.
- მან უარი თქვა საუზმეზე. ჩაიზეც კი უარი განაცხადა. უბრალოდ ჩაიცვა და კარი გაიხურა.
განმარტება: მისი მხრიდან ასეთ საქციელს, ნებისმიერი თუნდაც თავისუფალი ურთიერთობის მოყვარული ქალის გულის ტკენაც კი შეუძლია. თქვენ რა თქმა უნდა ათასი კითხვა გაგიჩნდებათ: ნუთუ წინა ღამე ასეთი ცუდი იყო? ნუთუ აღარ უნდა ჩემთან ურთიერთობა? ალბათ სწორედ ასეა! თუმცა, შეიძლება ის საერთოდ არ საუზმობს ხოლმე დილაობით და ძალზედ საპასუხისმგებლოდ ეკიდება თავის სამსახურს (რახანც ასე სწრაფად წავიდა).
- მან საუზმე საწოლში მოგართვათ.
განმარტება: ალბათ ის საშინლადაა თქვენზე შეყვარებული, ან ის უბრალოდ კინოს და რეკლამის მსხვერპლია. სულაც არ არის გამორიცხული, რომ მას გაახსენდა სცენა ფილმიდან ’’მისტერ და მისის სმიტები’’, როდესაც ბრედ პიტი ანჯელინა ჯოლის საწოლში მიართმევს საუზმეს, ასევე გაზეთს და ერთ ცალ ყვავილს. თქვენ რა თქმა უნდა მადლიერებით უნდა მიიღოთ მისი რომანტიკული ჟესტი. თუ რეალისტი ხართ, გეცოდინებათ, რომ ის ყოველ დღე ასე არ მოიქცევა. მამაკაცი ძირითადად არ გამოხატავს თავის გრძნობებს და ემოციებს. თუმცა, თუ გამოხატავს ამის არ დაფასება მას საშინლად ატკენს გულს.
სამუშაო ვითარება:
- თუ თქვენი ერთობლივი საუზმე დაემთხვა სამუშაო კვირას და ორივეს სამსახურში გეჩქარებათ, ექსტრავაგანტული კერძების მზადების დრო ნამდვილად არ არის. გამოსავალი:
• მენიუ
ასეთ ვითარებაში იდეალური გამოსავალია მსუბუქი საკვები – იოგურტი, ვაშლი, შავი პური და ყველი, კვერცხი, ჰერკულესის ფაფა და ა.შ. გაიხსენეთ ევროპის და ზღვისპირა სასტუმროების დილის მენიუ: ის ყოველთვის მსუბუქი და სწრაფია.
• სუფრის გაწყობა
ის რაც მზა სახით გაქვთ, პირდაპირ სუფრაზე დააწყვეთ. ასევე ჭურჭელიც და დანაჩანგალიც. ის თავად აირჩევს რაც სურს.
• მზადყოფნა
ნუ გაგიკვირდებათ და ნუ გეწყინებათ, თუ ის საერთოდ უარს იტყვის საუზმეზე. შეიძლება ის ისეთი ადამიანების კატეგორიას განეკუთვნება, რომლებიც დილაობით საერთოდ არ საუზმობენ. შესაზლებელია მას უბრალოდ მოერიდა, ან მართლაც აგვიანდება ოფისში.
- თუ თქვენი პირველი საუზმე არა სამუშაო კვირას არამედ შაბათ-კვირას დაემთხვა, აღარ მოგიწევთ აჩქარება. სხვათაშორის ერთობლივად საუზმის მოზადება ძალზედ აახლოვებს წყვილს.
• მენიუ
თუ დილით ძალიან ადრე არ გაიღვიძეთ თავისუფლად შეგიზლიათ მსუბუქი საკვებით შემოიფარგლოთ – ბლინები, კვერცხი, კრუასანი, ხაჭაპური. თუმცა, თუ ცოტა გვიან ადექით, შუადღისთვის შეგიძლიათ ერთობლივად მოამზადოთ ასევე სადილიც – ხორცეული, თევზი, სალათა ან თუნდაც ხცარე კერძები. გააჩნია, რომელ კერძზე შეთანხმდებით. ქართული სამზარეულო კი კერძების მრავალფეროვნებით გამორჩეულია. თუმცა, უნდა გაითვალისწინოთ აუცილებელი ფაქტორი: თუ ამ კერძების მოსამზადებელი ინგრედიენტები არ გაქვთ და თქვენი მაცივარი ცარიელია უმჯობესია სადილი არა სახლში არამედ კაფეში ან რესტორანში გააგრძელოთ ან სახლში შეუკვეთოთ.
• სუფრის გაწყობა
ასეთ ვითარებაში სუფრაზე სანთლების დაწყობა უადგილოა. თუმცა, საკმაოდ ლამაზი და შესაფერისი იქნება თეთრი ჭურჭელი და ასევე თეთრი ლამაზი ხელსახოცები.
• მზადყოფნა
საუზმის ერთად მომზადებას შეიძლება მოულოდნელი სიურპრიზი ახლდეს თან, მაგალითად: მან შეიძლება საკუთარ დედას შეგადაროთ და დაიწუნოს თქვენი კულინარიული შესაძლებლობები. ასევე შეიძლება მან უარი განაცხადოს კერძების ერთად მომზადებაზე და ტელევიზორთან დაჯდეს და მზამზარეულს დაელოდოს. ასეთ ვითარებაში დასკვენბის გამოტანა ალბათ არ გაგიჭირდებათ! ასე არ არის?
დამატებითი რჩევა: პირველი საუზმის დროს შეიძლება გაგიჩნდეთ კითხვა, ღირს თუ არა ტელევიზორის ჩართვა? უმჯოებესია არა, ვინაიდან ტელევიზორი ერთნამეთისადმი განკუთვნილ ყურადრებას გაფანტავს. თუმცა, თუ დილაობით საუბრის მოყვარული არ ხართ, ტელევიზორი ამ მხრივ საუკეთესო გამოსავალია. თუ მხოლოდ ფონის შექმნა გსურთ, შეგიძლიათ რადიო ან მუსიკალური ცენტრი ჩართოთ. სასიამოვნო მელოდია კი ნამდვილად დაგაახლოვებთ.
ანა მწითურიძე
წყარო: eva.ge
×