თქვენს განკარგულებაშია ყველა დეტალი: ფანჯარა, კარი, კედლები, ჭერი, სანათები, ავეჯი – ერთი სიტყვით, ყველაფერი, რაც სახლშია. მთავარი იარაღი კი წარმოსახვაა!
დაწყება შემოსასვლელი კარიდან სჯობს, კარგი იქნება თუ მას საკუთარი ხელით გაკეთებული ან შეძენილი, მზა დეკორატიული საახალწლო კომპოზიციით მორთავთ.
კარისა და ფანჯრის ნაპრალები წიწვოვან ტოტებს (ხელოვნური, ბუნებრივი), ან ელექტრული ყვავილწნულებს მოიხდენს, მიამაგრებთ ნაძვის ხის სათამაშოებს, ლენტებს და ა.შ. ყველაფერი თქვენს გემოვნებაზე და ხელმარჯვეობაზეა დამოკიდებული.
დაიმახსოვრეთ, რომ ჯობს, რომელიმე ერთი ფერის სპექტრის დეკორატიული ელემენტები აარჩიოთ, ეს ფერიც ოთახს უხდებოდეს.
თავისებური ხიბლი და მყუდროება მოაქვს სანთლებს, რომლებსაც ტრადიციულ საახალწლო სიმბოლოებთან ერთად საკუთარ კომპოზიციებში გამოიყენებთ. სანთლებით ძირითადად ჰორიზონტალურ ზედაპირს რთავენ: ფანჯრის რაფებს, ღია თაროებს და ა.შ.
მსგავსი კომპოზიციების მთავარი თავისებურება არაორდინალურობა და სიახლეა. ექსპერიმენტების არ შეგეშინდეთ. ყურადღებით შეისწავლეთ თქვენი ზარდახშა, მასში უამრავი ისეთი “საუნჯეა”, რომელსაც უკვე აღარანაირი სარგებლობა მოაქვს. საახალწლო ღამეს, მხატვრულ გაფორმებაში უამრავ ნივთს მოეძებნება ადგილი.
თქმაც არ უნდა, რომ ახალი წლის მთავარი ატრიბუტი – ლამაზი, მორთულ-მოკაზმული, კოხტა ნაძვის ხეა, რომლის გვერდით ასე სასიამოვნოა სურვილების ჩაფიქრება, მომავალზე ოცნება, საჩუქრებისა და სიურპრიზების პოვნა. ტყის ლამაზმანი ისე უნდა მორთო, რომ სახლში ზღაპრული ატმოსფერო გამეფდეს.
სულ ორი ვარიანტია: კლასიკური და თანამედროვე. დღეს ნაძვის ხეების იმდენად დიდი მრავალფეროვნებაა, რომ არჩევანის გაკეტება ძნელია.
ყველაზე ხალისიანებს და უზრუნველყოფილებს ასეთ შემთხვევაში ყველა ოთახისთვის შესაფერისი ზომის ნაძვის ხის დადგმას ურჩევენ.
საბაშვო ოთახისთვის საჩუქარია “ცოცხალი” ნაძვი გემრიელი მორთულობით. საჩუქრიანი კალათაც მოუხდება.
საძინებლისთვის მანათობელი, წიწვებიანი ნაძვის ხე რომანტიკულ სანათსაც დაემსგავსება და საახალწლო განწყობასაც გაამეფებს, თან მორთვაც არ სჭიდება, თვითონ წიწვები ანათებენ გარდამავალი ფერებით. ასეთ ნაძვისხეს გამჭვირვალე, თხელ ფარჩას თუ გადააფარებთ, უფრო იდუმალ ატმოსფეროს შექმნით, საჩუქრებით კი ხიბლს შემატებთ.
როცა ბევრი ოთახია, მაგრამ ყველგან, თუნდაც პაწაწა ნაძვის ხის დადგმა შეუძლებელია, ისევ ფანტაზიას მიენდეთ და რამდენიმე აუცილებელი დეტალით მაინც შეიტანეთ სხვა ოთახებში ახალი წლის სიხარული.
ფანტაზიებს ხორცი ნებისმიერი იმპროვიზირებული მასალით შეასხით.
თუ ორიგინალურ, არაორდინალურ ნაძვის ხის ანალოგს ქმნით, კონუსისებური ფორმა აუცილებელი მოთხოვნაა, სხვა შემთხვევაში ამ ობიექტს ნაძვის ხედ ვერავინ აღიქვამს და ახალ წელთან მისი დაკავშირებაც გაჭირდება და...
...და არ დაგავიწყდეთ საჩუქარი, თუნდაც უბრალო, თუნდაც ელემენტარული, მაგრამ მაინც საჩუქარი, რომელიც იმის ნიშანი იქნება, რომ გახსოვთ, უფრთხილდებით, სიხარულს უსურვებთ საყვარელ ადამიანებს!..
ბედნიერი ახალი წლის დადგომას გისურვებთ!..
წყარო: eva.ge