როგორც ინტერნეტის აქტიური მომხმარებელი, ხშირად ვსტუმრობ სხვადასხვა ვებ-გვერდს. შესაბამისად, ბევრი საინტერესო ამბის მომსწრე და შემსწრე ვხდები ხოლმე. სულ რაღაც, ორი დღის წინ, სრულიად შემთხვევით წავაწყდი ძალიან სასაცილო ფოტოს, რომელმაც ბევრ რამეზე დამაფიქრა და ჩემი შთაგონების წყაროც კი გახდა.
მოკლედ, მინდა წარმოგიდგინოთ, ჩემეული რჩევები, სპეციალურად მათთვის, ვინც ჯერ კიდევ სრულყოფილი მამაკაცის მოლოდინშია.
“ქალის გონების გარკვეული ნაწილი მხოლოდ იმისთვის მუშაობს, რომ მამაკაცზე იფიქროს” - ხშირად გამიგონია საპირისპირო სქესის მოსაუბრეებისაგან. ისინი ამტკიცებენ –“ქვეცნობიერში ჩაშტრიხულია გამუდმებული ფიქრი, რომელიც ძლიერი სქესისკენაა მიმართული. ძალასთან დაკავშირებული ყველა საგანი თუ ნივთი, ქალში მამაკაცის ასოციას იწვევს”-ო. გაბედე და არ დაეთანხმო, მაშინვე იწყებენ საკუთარი ძალის დემონსტრირებას! მართალია, განსხვავებული აზრი მაქვს, ასე მაგალითად, ქალებს კაცებზე ფიქრის გარდა, სხვაც ბევრი საქმე გვაქვს, მაგრამ ერთ რამეს კი მეც ვიზიარებ. ქალი მამაკაცის გარეშე ისეთივეა, როგორც თევზი წყლის, წამალი ავადმყოფისა და თასი ღვინის გარეშე. პრიმიტიული შედარებები იქით იყოს და, მდედრი მამრის გარეშე ნამდვილად უფუნქციოა. ვაღიარებ, მათზე ფიქრი მუდმივად თან გვდევს, მხოლოდ, სხვადასხვა დროს იჩენს ხოლმე თავს. ისინი ყოველთვის ხდებიან ჩვენი ჭორაობის, სიმპატიისა და სიყვარულის ობიექტები, ამაზე მეტი რაღა უნდათ!
ზემოთ აღნიშნული სტრიქონების წაკითხვისას, გავიფიქრე: “ეს ნაწილი უნდა ამოვიღოთ, მამაკაცთა უფლებების დისკრიმინაციას დაგვწამებენ, ძლივს დამყარებული თუ, ჯერ კიდევ, დასამყარებელი გენდერული ბალანსის დამანგრეველ-გამანადგურებელთა სტატუსი არ აგვცდება”. მაგრამ, ნურას უკაცრავად! ჩვენ ყველაზე კანონმორჩილი პორტალის პერსონალი, არ ვცდილობთ კაცების უფლებების დაკნინებას, მათ ძაგებაზე ხომ ლაპარაკიც ზედმეტია. აბა როგორ უნდა შეურაცხყო ის, ვინც შენი ნაწილია (შეიძლება არც მთლად სრულყოფილი, მაგრამ მაინც).
მოდით, რეალობას თვალი გავუსწოროთ და ერთხმად ვაღიაროთ, რომ სრულყოფილი არავინაა. რა თქმა უნდა, სრულყოფილად ვერ ჩაითვლება ის, ვინც ვერ ერკვევა გრძნობებში (ყველას არ ეხება!), არც კი იცის, როდის რა სიამოვნებს მისი აღფრთოვანების ობიექტს, არ ახსოვს გაცნობის დღე, ერთად ყოფნის საიუბილეო თარიღი, პირველი კოცნაც კი... მოკლედ, როგორც ხედავთ, რეალობა საკმაოდ მწარეა. მაგრამ გული არ გაიტეხოთ! ეს ხომ ყველას არ ეხება. შეიძლება თქვენც გაგიმართლოთ და რომელიმე უცხო პლანეტიდან გესტუმროთ ის ერთადერთი, რომელსაც არ უმტყუნებს მეხსიერება, არ იქნება ეჭვიანი, იქნება მგრძნობიარე, მოსიყვარულე და რომანტიული... ნუ არც მთლად ასეა საქმე. მომიტევეთ საყვარელო მამაკაცებო, ქალებს გაზვიადება გვჩვევია. საკმარისია, გავიგოთ სხვა ქალის ბედნიერების შესახებ, გვშურს და მისი რჩეული უნაკლო გვეჩვენება, შედეგად, ვაიდეალებთ იმას, ვისაც არც კი ვიცნობთ. ეს კი სრულყოფილი მამაკაცის მითს წარმოშობს და ველით მას.. ველით 20, 30, 40, 50-წლის განმავლობაში, ან კიდევ უარესი, უკანასკნელ დღემდე.
ამ სტატიის მიზანი არ გახლავთ მამაკაცთა გაკიცხვა, პირიქით! სტატიის მეშვეობით გვინდა, ქალბატონებს შევაგნებინოთ, დააფასონ ის რაც აქვთ და განერიდონ ილუზიების სამყაროს. მანამ, სანამ სხვისგან მოითხოვთ სრულყოფილებას, საკუთარ თავში ეძებეთ იდეალი. კარგად მოიძიეთ, ჯერ გულში, მერე სულში, ბოლოს გონებაში. ვერ იპოვეთ?! არაფერია. ქალს იმისთვის სჭირდება მამაკაცი და პირიქით, რომ ორი სამყარო გაერთიანდეს, შეივსოს ის, რაც ორივეს აკლია.. აი, თურმე რა ყოფილა ჩვენი ჭეშმარიტი დანიშნულება, გავხდეთ ერთმანეთის მეორე ნახევრები! საკუთარი არასრულფასოვნება მისი ღირსებით ჩავანაცვლოთ და პირიქით.
იმედია, თვალი აგეხილათ და დარწმუნდით თქვენი უწინდელი შეხედულებების სიმცდარეში. დაიმახსოვრეთ, სრულყოფილი არავინაა და თქვენი გაერთიანებით, ამსხვრევთ ამ სტერეოტიპსაც კი!
P.S. თან, სრულყოფილება ხომ საშინლად მომაბეზრებელია…...
ანი ლუხავა
წყარო: eva.ge
სრულყოფილი მამაკაცის მოლოდინში...
⏱️ 1 წთ.
👁️ 2 245
100%