ფსიქოლოგები ამტკიცებენ, რომ მომუშავე ადამიანები 3 ძირითად კატეგორიად იყოფიან: მტაცებელი, მსხვერპლი და მცველი.
მტაცებელი – ეს ადამიანი სხვა მომუშავეების კრიტიკით და შენიშვნებით არის დაკავებული და უმეტეს შემთხვევაში ის არა ხელმძღვანელი არამედ ჩვეულებრივი რიგითი მომუშავეა. მისი ყველას ეშინია და ერიდებიან როგორც მუშაკები ასევე ხელმძღვანელობაც. მტაცებელი საკმაოდ სასტიკი და უსამართლოა და ფიქრობს, რომ მასზე უკეთესად არავინ მუშაობს. სწორედ ამიტომ ის არავის არ უყვარს, უფრო სწორედ ვერავინ ვერ იტანს. მისი მრისხანების ობიექტი ძირითადად ის ადამიანია, რომელიც შენიშვნას და პრეტენზიებს საერთოდ არ იმსახურებს.
მსხვერპლი – ეს ადამიანი უკვე წინასწარ არის შეგუებული იმ აზრს, რომ მისი ცხოვრება ვერ შედგა და ის უბედურია. მსხვერპლი თითქოს იზიდავს უსამართლობას მისდამი და მუდმივ წარუმატებლობას. ის ძალიან კარგი მომუშავეა და თავის საქმეს “10-იანზე” ასრულებს, მაგრამ რატომღაც ცხოვრება მისთვის რთულდება. თუ რამეში გაუმართლებს მისი სიხარული დიდხანს არ გრძელდება, ვინაიდან ის მომენტალურად დეპრესიაში ვვარდება, იმ მოტივაციით, რომ წარმატებას თან სდევს წარუმატებლობა.
მცველი – ეს ადამიანი ძლიერი და ზედმეტად დარწმუნებულია საკუთარ თავში. ის ყველას მეგობარია, ყველას უსმენს, უგებს და ანუგეშებს. თუმცა, სინამდვილეში გულთან ახლოს არაფერი მიაქვს და არც არავინ აღელვებს. ერთი შეხედვით ის ნეიტრალური, სამართლიანი და დადებითი პერსონაა. თუმცა, ყველა ჭორის და ინტრიგის ავტორი სწორედ, რომ "მცველია".
ეს რა თქმა უნდა ოფის-მუშაკების ერთ-ერთი შესაძლო კლასიფიკაციაა. საბედნიეროდ საოფისე სამყაროში ყოველთვის არ სუფევს ჯუნგლების კანონი პრინციპით: `თუ შენ არ შეჭამ – შენ შეგჭამენ~. მიუხედავად იმისა, რომ ჩვენ ვცხოვრობთ ძალზედ ცინიკურ და სასტიკ სამყაროში და ვებრძვით ძლიერ და კონკურენტულ ბიზნესს, საოფისე და ბიზნეს სამყარო ხშირ შემთხვევაში გვალვის პერიოდს ემსგავსება, რომლის დროსაც სასტიკი აუცილებლობა აიძულებს მონადირესაც და ნადავლსაც ერთი მდინარიდან დალიონ წყალი.
ფსიქოლოგიური პორტრეტი
ის ფსიქოლოგიური ტიპაჟები, რომლებიც არსებობენ და მოღვაწეობენ ოფისებში (და არა მხოლოდ ოფისებში), ძალზედ გვანან ცხოველებს. თუ კარგად დააკვირდებით შეიძლება თქვენი თავიც აღმოაჩინოთ. ოღონდ, ნუ გეწყინებათ, ეს ხომ ერთგავრი გზაა საკუთარი თავის შეცნობისაკენ.
ლომი – ის ნამდვილი მონარქია და შესაბამისად, როგორც ცხოველთა სამყაროს მეფეს შეეფერება, ის ძლიერი, კეთილშობილი, სამართლიანი და ძალაუფლებით განებივრებულია. ლომი ამ შემთხვევაში ძლიერ ხელმძღვანელს განასახიერებს, რომელიც ყოველთვის დაეხმარება და დაიცავს თავის ქვეშევრდომებს, მაშინაც კი როცა ამის საჭიროება არა არის. ის ყველაზე დადებითი პერსონაჟია. უსამართლოდ არავის დაჩაგრავს.
დათვი – საყოველთაოდ ცნობილია, რომ თუ დათუნიას უფრო სწორდ დათვს გააბრაზებ, “კარგ” დროს გაატარებ მის ტორებში. სწორედ ასეთია ადამიანი დათვი. ის მომთმენია და თავის სიტყვებს და სქაციელს აკონტროლებს, მაგრამ თუ მან მოთმინების უნარი დაკარგა, ჯობია ახლოს არ გაეკარო. პირველი შეხედვით ის უწყინარ და ცოტა სულელ არსებასაც გავს, მაგრამ თუ გაბრაზდა არა მხოლოდ ის დაისჯება ვინც გამოიწვია მისი მრისხანება, არამედ ისიც ვინც საერთოდ არაფერს შუაში არ იყო. დათვი ხშირ შემთხვევაში ხელმძღვანელის თანაშემწეა. ის ბევრს მუშაობს და ფიქრობს.
მელია – ქართულ და არა მხოლოდ ქართულ ზღაპრებში, მელია უარყოფით თუ არა, დადებით პერსონაჟადაც არ არის მიჩნეული. ის უფრო პარაზიტია, თუმცა, ბოროტი სულაც არ არის. მელიას ჰგონია, რომ ის ყველას აკონტროლებს და სამყარო მის გარშემო ტრიალებს. თუმცა, ეს ასე არ არის. სხვათაშორის ქალ მელიაზე უფრო ხშირი მამაკაცი მელიაა, რომელიც საკმაოდ საშიშია. სწორედ მამაკაცი მელია ჭორაობს ყველაზე მეტს და ვნებს სხვებს. მელია იმდენადაა თავის თავზე შეყვარებული, რომ ძირითად დროს სარკის წინ ატარებს და ტკბება მისი მავნე აზრებით და სურვილებით. თუმცა, ცხოვრებაში ძალიან იშვიათად ანხორციელებს თავის მავნე და პარაზიტ აზრებს.
კუ – ესეთი ადამიანი ძალიან ნელი და დამღლელია. ის უხსოვარი დროიდან მუშაობს და რეალური მტკიცებულებაა იმისა, რომ დინოზავრები არსებობდნენ. კუ ნამდვილი პესიმისტია. არაფრის არ სჯერა და ცხოვრებისგან მხოლოდ ცუდს მოელის. მისი დევიზია: ”რა საჭიროა რამის გაკეთება, ყველაფერი ხომ მაინც უარესობისკენ იცვლება”. მას არ სჯერა არც კარიერული წარმატებების, არც სიკეთის გამარჯვების და არც მშვიდობის მთელ სამყაროში. ის ყველაფერს უგულოდ და შენელებული რითმით აკეთებს. მუდმივად ხვნეშის და წუწუნებს. მიუხედავად, იმისა რომ კუ ერთი შეხედვით მშრალი და თითქოს გაყინულია, სინამდვილეში მისი გული თბილი და კეთილია. მას უბრალოდ არ უნდა თავისი სიკეთის დემონსტრირება. ასე, რომ ნუ გაგიკვირდება, თუ ის თბილად მოგექცევა და დაგეხმარება.
ნაგაზი – ის ძალიან ჯიუტი, უხეში და თავის თავში დარწმუნებული მუშაკია. ის ბერვს ყეფს და ძალიან აქტიურია. ამით ხშირად ბევრ მუშაკს აშინებს და ტერორში ამყოფებს. თუმცა, თუ ნაგაზს მოეფერები და თავზე ხელს გადაუსმევ კნუტზე უფრო ალერსიანი და ტკბილი გახდება. ნაგაზს ცხოვრება არ შეუძლია პატრონის გარეშე, რომელშიც ამ შემთხვევაში ხელმძღვანელს ვგულისხმობთ. ნაგაზი პატიოსანი, შრომისმოყვარე და ერთგულია. ის არასოდეს გიღალატებს. თუმცა, თუ აწყენინებ ამას არაოსდეს დაივიწყებს და გულში ჩაიხვევს.
მაიმუნი – ის საუკეთესო მეგობარი და მოსაუბრეა. მაიმუნი ძალიან ცნობისმოყვარე, მოუსვენარი და თანამგრძნობია. გარდა ამისა ის წამბაძურაა. თუ მას ვინმე მოეწონება ყველანაირად ეცდება მას მიბაძოს და ასლი გახდეს. თუმცა, მაიმუნს ყველაფერი ძალიან მალე ბეზრდება და ის მუდმივად ახლის ძიებაშია. თუ დღეს ის შენით იყო არფრთოვანებული და მისი საუკეთესო მეგობარი იყავი, ხვალ სხვა ადამიანი დააინტერესებს და შენ მალევე დაავიწყდები. სწორედ ამიტომ, ჯობია მას არ ენდო. მაიმუნი ყველაზე ცუდი მომუშავეა. ის ფაქტიურად არაფერს აკეთებს ჭორაობის გარდა.
ნიანგი – ნიანგს შეუძლია თავი მკვდარ არსებად მოგაჩვენოს. ის ჩუმი და თავ ჩაღუნლი მომუშავეა. მუდმივად დუმს და არაფერზე არ აკეთებს კომენტარს, ფაქტიურად არავის ეკონტაქტება. თუმცა, არა მელიის პარაზიტობის არამედ ნიანგის სიბოროტის უნდა გეშინოდეს. ყველაზე მოულოდნელ მომენტში ის იერიშზე გადმოვა და მის სიბოროტეს უკვე ვეღარავინ გადაურჩება.
მგელი – ის მშიერი და გაბრაზებულია ცხოვრებაზე. მას მუდმივად პრობლემები აქვს ხელმძრვანელობასთან თავისი ცუდი საქციელის და ხულიგნობის გამო. მუდმივად ითხოვს ადრე განთავისუფლებას, ხელფასის მომატებას ერთი სიტყვით მოსიარულე პრობლემაა. ის უსამართლო, დაუნდობელი და დაუნახავია. მგელი ვერ იტანს ხელმძღვანელობას და მუდმივად ოპოციციაში უდგას მათ. სწორედ ამიტომ არა მხოლოდ რიგით მომუშავეებს, არამედ ყველაზე უფრო მეტად ხელმძღვანელობას ეშინია მისი. თავის საქმეს ის იმდენად გაბრაზებული სახით და აგრესიული განწყობით აკეთებს, რომ მასთან მუშაობის სურვილი არავის არა აქვს.
ბეჰემოტი – ის დიდი და მრგვალია და მისთვის ყველაფერი სულ ერთია!
ჭიანჭველა – ნამდვილი მუშაკი, პატიოსანი, კეთილი, ნიჭიერი, ჭკვიანი, შრომისმოყვარე, გამგები და თბილი. ის საუკეთესოა, მაგარმ სამწუხაროდ ძალიან მორიდებულია და საკუთარი თავის და შესაძლებლობების ფასი არ იცის. ის ყოველთვის იმაზე ნაკლებს იღებს ვიდრე იმსახურებს რეალურად.
მამალი – ის ყველაფერში პირველია და ლიდერობის სურვილით სულდგმულობს. სწორედ ამიტომ მას ყოველთვის აძლევენ მნიშვნელოვან და საპასუხისმგებლო საქმეებს. მამალი ამაყობს თავისი თავით და თუ შეაქებ მთას გადააადგილებს. თუმცა, მას არ შეუძლია წაგება. ეს მისთვის ნამდვილი საშინელებაა. მას არ უყვარს დამარცხება.
ცხენ-ირემი – ის ჯიუტი და ამაყია. მას მიაჩნია, რომ თავად შეძლებს ყველაფრის გაკეთებას, სხვისი დახმარების გარეშე. ის პერფექციონისტია, თანაც დიდი და ძლიერია. მას გასაოცარი პროფილი აქვს. ის შრომისმოყვარე და მყარი ხასიათისაა. თავის საქმეს კარგად ასრულებს და პასუხისმგებელია. მას დიდი მოთმინების უნარი აქვს და ამტანია. თუმცა, იმაშიც ღრმად არის დარწმუნებული, რომ ცურვა და ფრენა შეუძლია. მისი გადარწმუნება კი დროის და ნერვების უაზრო ხარჯვაა.
ფარშევანგი – ყველა კოლექტივში არსებობს გამაოგნებლად მომხიბვლელი მამაკაცი ან ქალი რომელზეც ყველა შეყვარებულია. თუმცა, ამ შემთხვევაში მამაკაც ფარშევანგზე ვისაუბრებთ. ის მარტივი, თავის თავზე შეყვარებული, ნარცისი და ცანცარაა. თავისი ლამაზი სახით და სასიამოვნო ხმით ყველას გულს იგებს. განსაკუთრებული შრომისმოყვარეობით და ინტელექტით არ გამოირჩევა.
პეპელა – "ჭრელო პეპელა, გაფრინდი ნელა დელია რანუნი…". უკაცრავად გადახვევისთვის. პეპელა ნამდვილად საოცრად დახვეწილი, ლამაზი, თბილი და ჰაეროვანი მომუშავეა. თუმცა, გაუგებარია რას აკეთებს საერთოდ. ის იმდენად ჰაეროვანია, რომ მას არავინ სერიოზულ და საპასუხისმგებლო დავალებებს არ აძლევს. მას სილამაზეში უხდიან ხელფასს.
ღორი – სულაც არ არის ბინძური და ტალახის მოყვარული. უბრალოდ ის ტალახშიც კი დადებითს ხედავს. ის ძალიან კეთილი, მზრუნველი, მრგვალი და მსუქანია. მას ბევრი გოჭი ჰყავს. თუმცა, თუ ძაღლის ლეკვი ან კნუტი ან იხვის ჭუკი შემოეპარება იმასაც ისე გაზრდის როგორც საკუთრას. ის ყველას უსმენს და ანუგეშებს. არ არის ნეიტრალური. ცდილობს ყველას დაეხმაროს და უთანაგრძნოს. სწორედ ამიტომ ის ყველას უყვარს. კარგი მომუშავეა და ძალიან უყვარს რჩევების მიცემა. ყველაფერი რიგზე იქნებოდა მისი რჩევები სულელური და პრიმიტიული, რომ არ იყოს, ისვე როგორც მისი ინტელექტი.
არსებობს ასევე ცხენი - კონსერვატორი, რომელიც ტრადიციების მიმდევარი და ლაპარაკის მოყვარულია. ასევე გიენა, რომელიც ცინიკოსი და უგულოა და ყველას დასცინის. ეს მხოლოდ მცირე ჩამონათვალია იმ ცხოველებისა, რომლებიც ზუსტად გამოხატავენ ჩვენს ხასიათს. რა თქმა უნდა შესაძლებელია საერთო ენის გამოხავა და ჰარმონიულად თუ არა მეგობრულ გარემოში მუშაობა. რამდენად უკეთესი იქნებოდა სამყარო, რომ ამ ცხოველბს შორის მშვიდობა და ჰარმონია დამყარებულიყო არა მძიმე და უხეში რკინის გისოსების საშუალებით, არამედ გამაერთიანებელი საქმის საშუალებით.
მასალა მოამზადა ანა მწითურიძემ
წყარო: eva.ge