ნუ დაელოდებით, რომ სახე თავისით დაიბრუნებს ლამაზ ფორმებს. მოგიწევთ შრომა იმისათვის, რომ სახეს ფორმები აღუდგინოთ და მერე შეუნარჩუნოთ. ასეთი ვარჯიშები დღეში ორჯერ უნდა აკეთოთ, სხვაგვარად შედეგს ვერ მიაღწევთ.
თუ დროში შეზღუდული ხართ
ასეთ დროს შეგიძლიათ სავარჯიშოები დაყოთ დაჩქარებულ და გამარტივებულ ვარიანტებად, ე.წ. ექსპრეს სავარჯიშოებად, რომლებიც გამოადგება მათ, ვისაც ძალიან ცოტა თავისუფალი დრო აქვს და სურს, რომ სახეს მოუაროს. სადაც არ უნდა იყოთ, შეასრულეთ ქვემოთ მოცემული სავარჯიშოები, რომლებიც უნდა გაიმეოროთ 5-ჯერ:
· ქვედა ყბა ამოძრავეთ მარცხნიდან მარჯვნივ და შემდეგ მარჯვნიდან მარცხნივ.
· ხელის გულები გაასწორეთ და დაიდეთ ლოყებზე, თავი გადახარეთ მარჯვნივ, მერე მარცხნივ, ისე თითქოს ხელებს ეწინააღმდეგებით.
· თავი მაქსიმალურად ზემოთ აწიეთ, კისერი კარგად რომ დაიჭიმოს. გაჩერდით ასე რამოდენიმე წამი და შემდეგ საწყისი მდგომარეობა მიიღეთ.
· გაუსწორეთ კბილები ერთმანეთს. ქვედა ტუჩი წამოწიეთ წინ ისე, რომ ტუჩის კუთხეები დახრილი იყოს ქვემოთ, ხოლო კისრის ძარღვები დაჭიმული. დარჩით ასე რამოდენიმე წამს, შემდეგ მოადუნეთ სახე.
· გაიღიმეთ ისე, რომ ტუჩის კუთხეები მაქსიმალურად გაიჭიმოს. რამოდენიმე წამის შემდეგ დაუბრუნდით საწყის მდგომარეობას.
მოვლილი სახე სუნთქვის დახმარებით:
სუნთქვითი ვარჯიშები სახის გასახდომად ძალიან ეფექტურია. სპეციალური სუნთქვის ვარჯიშები შემუშავებულია სხეულის ჭარბი წონის მოსაშორებლად, ასევე არსებობს სუნთქვის ვარჯიშები სახის გასახდომად.
გთავაზობთ რამოდენიმე ტიპის ვარჯიშს:
· ნელა შეისუნთქეთ ცხვირით და ამოისუნთქეთ პირით. გაიმეორეთ 5-ჯერ, ვარჯიშებს შორის დაიცავით 3 წამიანი ინტერვალი.
· ტუჩები მოკუმეთ და წინ წამოწიეთ, თვალები ფართოდ გაახილეთ და მზერა მიაპყარით ჭერს. ლოყებისა და ცხვირის კუნთები დაჭიმეთ, ტუჩების კუთხეები დახარეთ, ენა გამოყავით და ნელ-ნელა ისუნთქეთ პირით.
· ღრმად ჩაისუნთქეთ, დახურეთ პირი და შეიკავეთ სუნთქვა, იმავდროულად დაბერეთ ლოყები. 5 წამის შემდეგ ერთბაშად ამოისუნთქეთ და გამოდევნეთ ჰაერი. გაჭიმეთ ლოყები, ღრმად შეისუნთქეთ, პირი დახურეთ და შეიკავეთ სუნთქვა. გაბერეთ ლოყები და ძალიან ნელა გამოუშვით ჰაერი, ისე, რომ ლოყები დაიჩუტოს.
გისურვებთ ჯანმრთელობას და სილამაზეს!
წყარო: babyinfo.ge