“ჭირვეულის მორჯულება”
ორნელა მუტისა და ადრეანო ჩელენტანოს დუეტი ლეგენდად რჩება და ყველა სეზონზე შეუდარებელია! მათი დიალოგები იმდენად სასაცილო და ყველასათვის საყვარელია, რომ ხშირად ყოველდღიურ საუბარშიც კი მოისმენთ. ნამდვილად ღირს ამ კომედიის ერთხელ კი არა, ძალიან ბევრჯერ ნახვა!
“ნიღაბი”
ჯიმ კერი კომედიებში რომ შეუდარებელია, ამაზე აღარავინ დავობს. თუმცა, ყოველთვის ღირს მისი პირველი გახმაურებული როლების გადახედვა. ასეთ დროს კი პირველი, რაც თავში მოგვდის, მისი “ნიღაბია”. პრინციპში, ჯიმის სახის მიმიკებით თუ ვიმსჯელებთ, უნიღბობასა და ნიღბიანობას შორის დიდი განსხვავება არც არის.
“პოლიციის აკადემია”
ამერიკის მშვიდობიანი მოსახლეობა საფრთხეშია! ქალაქის მერმა ახალი კანონი მიიღო – ახლა ნებისმიერს შეუძლია პოლიციაში მუშაობა. წონა, სქესი, სიმაღლე და ჭკუანაკლულობა აღარაფერს ნიშნავს. პოლიციის აკადემიაში განურჩევლად ყველა ირიცხება. აკადემიის ლექტორები შოკში არიან და ცდილობენ, სტუდენტების ეს ტალღა ნებისმიერი გზით მოიცილონ თავიდან.
“ჯაზში მხოლოდ ქალიშვილები არიან”
ამ კომედიას, ალბათ, წარდგენაც არ სჭირდება. ეს სწორედ იმ ფილმთაგანია, რომლებიც ყოველ ჯერზე ერთნაირად გვაცინებს და გვამხიარულებს. ძალიან ბევრი ადამიანი აღნიშნავს, რომ როცა ტელევიზორში შემთხვევით აწყდებიან ზემოთ აღნიშნულ ნამუშევარს, სხვა არხზე გადართვა შეუძლებელი ხდება და რჩება ერთადერთი გზა – უკვე მერაღაცამდენჯერედ (!) იცინო იმაზე, რომ “ჯაზში მხოლოდ ქალიშვილები არიან”!
“ჩლუნგი და ჩლუნგზე უფრო ჩლუნგი”
ისევ ჯიმ ჯერი, ამჯერად ჯეფ დანიელსთან ერთად. ორი მეგობრის მართლაც რომ ჩლუნგური თავგადასავალი არავის ტოვებს ღიმილის გარეშე. აქვე, შეგახსენებთ, რომ ფილმის მეორე ნაწილის პრემიერა სულ ცოტა ხანში, 15 ნოემბერსაა დაგეგმილი.
“მშობლების გაცნობა”
გრეგი ქალაქგარეთ მიემგზავრება, რათა თავისი შეყვარებულის მშობლები გაიცნოს. მას წარმოდგენა არ აქვს, რომ დიდი გამოცდის ჩაბარება მოუწევს. ეს გამოცდა კი სავსე იქნება თავგადასავლებითა და მოულოდნელი, თანაც, არც თუ ისე სასიამოვნო სურპრიზებით.
“ევროტური”
ესეც იმ კომედიათაგანია, რომლის ფრაზებსა და ხუმრობებს ყოველდღიურ საუბრებშიც შევხვდებით. თანაც, იშვიათია ადამიანი, რომელსაც “ევროტური” ნანახი აქვს, მეგობრებთან ერთად მატარებლით მგზავრობს და გვირაბში შესვლისას კონკრეტული სცენები არ ახსენდება მოკლედ, თუ არ გიყურებიათ, უყურეთ!
“კეთილი იყოს თქვენი მობრძანება”
ფილიპ აბრამსი, საფოსტო განყოფილების უფროსი, ყველაფერს აკეთებს იმისათვის, რომ სამსახურიდან მარსელის ახლოს მდებარე პატარა კუთხეში გადაანაწილონ. თუმცა, ყველა მისი მცდელობა კრახით სრულდება, როდესაც წვრილმანი დარღვევისათვის ჩრდილოეთ ნაწილში გადაჰყავთ, თანაც ორი წლით! მის წინაშეა პოლარული რეგიონი, სადაც დასახლებულნი არიან გაუგებარ ენაზე მოსაუბრე უხეში არსებები. სხვა გზა არ აქვს – ადგილობრივებს უნდა მოერგოს… სწორედ აქ იწყება სასაცილო და მხიარული თავგადასავალი.
“მისტერ ბინი”
პატარ-პატარა სერიები. ცოტა ლაპარაკი და ბევრი, ძალიან ბევრი სიცილი!
“რაზე საუბრობენ მამაკაცები”
ეს კომედიაა მუშაობითა და ყოველდღიური რეჟიმით გადაღლილ მამაკაცებზე მოგვითხრობს. ისინი გადაწყვეტენ, ცოტა ხნით გაერიდონ საქმესა და ოჯახს და რამით გაერთონ. მაყურებელი, გარდა იმისა, რომ ბევრს იცინის, სხვადასხვა საინტერესო დეტალსაც იგებს მამაკაცებისა და ქალების თანაცხოვრების შესახებ.
“ყოვლისშემძლე ბრუსი”
გაგიკვირდებათ და ისევ ჯიმ კერი უნდა წარმოგიდგინოთ. ბრუსი მოულოდნელად მართლაც რომ ყოვლისშემძლე ხდება, თუმცა, მალევე ხვდება, რომ თავისივე “მოწყობილ” სამყაროში ყველაფერი არეულ-დარეულია. თუმცა, სანამ ამ დასკვნამდე მივა, ჯიმ კერი ბევრს, ძალიან ბევრს გაცინებთ.
“მარტო სახლში”
ვინც თვლით, რომ ქრის კოლუმბუსის ამ ნამუშევარს მხოლოდ საახალწლოდ უნდა უყუროთ, ძალიან ცდებით! სცადეთ და ერთხელ მაინც უყურეთ ქევინისა და მისი ქურდების თავგადასავალს ყველა სეზონზე. თავადვე დარწმუნდებით, რომ ყოველ ჯერზე ზუსტად ისეთი განწყობა დაგრჩებათ და ზუსტად იმდენს იცინებთ, როგორც ეს მაშინ იყო, პირველად რომ გაიცანით სახლში შემთხვევით დარჩენილი პატარა ბიჭუნა.
“სამზარეულო პარიზში”
ვინც ამ მსახიობების მონაწილეობით გადაღებულ სერიალს უყურებთ, ადვილად მიხვდებით, რა კომედიაზეა საუბარი. თუ არ იცით, არც ეგ არის პრობლემა – ყველაფერი პარიზში ხდება და ყველაფერი ძალიან, ძალიან მხიარული და სასაცილოა.
“ნაბახუსევი”
დიახ, “ნაბახუსევი” და არა “რა მოხდა ვეგასში” თუმცა, რა მნიშვნელობა აქვს სათაურს, როცა ფილმი ყოველ ჯერზე ერთსა და იმავე ემოციებს გვპირდება. ემოციებში კი, ძირითადად, სიცილით გაჯერებული დადებითი განწყობა იგულისხმება.
“ჰიტჩი”
ჰიტჩის მეთოდებს ყველა იცნობს. თუმცა, თავად მთავარი გმირი ლამაზი “პრაქტიკანტის” მიერ დაგებულ ხაფანგში ებმება. უილ სმითს ნამდვილად არ აქვს საქმე სასაცილოდ. აი, თქვენ კი ძალიან ბევრს იცინებთ.
“პიკის საათი”
“პიკის საათი”, თავისი ყველა ნაწილით, განუმეორებელი კომედიაა! მიუხედავად იმისა, მოგწონთ თუ არა ჯეკი ჩანი და გხიბლავთ თუ არა მისი ილეთები, ეს ფილმი ყველაფერს დაგავიწყებთ გარდა ერთისა – იცინოთ რაც შეიძლება ბევრი და დაიმახსოვროთ ყველა მომენტი, რათა შემდეგ მეგობრებს მოუყვეთ და მათაც მოანდომოთ ჩინურ-ამერიკული მეგობრობის ყურება.
“მთელი ცხრა იარდი”
ნიკოლას ოზერანსკის ცხოვრებაში უამრავი უსიამოვნება ხდება. კარგი ამბავი ის არის, რომ მისი ცოლი ორსულადაა. ცუდი ამბავი? – მას პარანოია დაეწყო! გარდა ამისა, ცნობილი მაფიოზი ციხიდან გამოვიდა და იმ ფულის დაბრუნება სურს, რომელიც ოზმა და ჯიმ ტულპანებმა ცხვირწინ მოჰპარეს. ლაზლო, მიზნის მისაღწევად, ნიკოლასის მეუღლეს იტაცებს. ამბავი უფრო და უფრო იხლართება, მაგრამ ეს ჩვენი გმირების ცხოვრების მხოლოდ ერთი დღეა.
“ბრიჯიტ ჯონსის დღიურები”
აი, სწორედ შემოდგომაზე, სუსხიან პერიოდში, ჭიქა ჩაისთან ერთად ღირს ამ ფილმის ორივე ნაწილის ყურება. ბრიჯიტი ერთი დაბალი თვითშეფასების მქონე გოგონაა, რომელსაც თავგზას უბნევს თავისი თანამშრომელი. პრინციპში, ყველაფერს თავად ამოიკითხავთ დღიურში, რომელსაც რენე ზელვეგერის პერსონაჟი წერს. თანაც, სულ მალე ფილმი მესამე ნაწილით დაგვიბრუნდება.
“გულთამპყრობელები”
სიუჟეტი კაცებზე მონადირე დედა-შვილზე მოგვითხრობს. ორივე მათგანი მამრობითი სქესის წარმომადგენელთა “შებმის” დიდოსტატია. თუმცა, გაუგებრობები იწყება მაშინ, როცა პატარა “მონადირეს” საკუთარი მსხვერპლი უყვარდება. სტანდარტული სიუჟეტია, მაგრამ ძალიან მხიარული.
“ულმობელი ადამიანები”
ის, რომ კომედიაში დენი დევიტო მონაწილეობს, უკვე ბევრის მთქმელია. თუმცა, მაინც გეტყვით, რომ მთავარი გმირის ოცნება ცოლისაგან თავის დაღწევაა. ხდება ისე, რომ მის ცოლს იტაცებენ და გამოსასყიდს ითხოვენ. ის კი არ იციან, რომ მსხვერპლის მეუღლე სულაც არ აპირებს გატაცებულის დახსნას.
“დილა მშვიდობისა”
ფილმის მოქმედება ნიუ-იორკის ტელევიზიაში ვითარდება, სადაც დილის შოუს ტემპერამენტიანი წამყვანი თავის თანაშემწეზეა გადამტერებული. ახალგაზრდა პროდიუსერი შოუს გადარჩენას ცდილობს. ეს მცდელობა კი ბევრ სასაცილო მომენტს მოიცავს.
“ათასი სიტყვა”
ედი მერფი, კომედიების დიდოსტატი, გვევლინება პერსონაჟად, რომელსაც არავინ უსმენს. არადა, რომ მოესმინათ, ყველაფერი ასე სასაცილოდ აღარ წარიმართებოდა…
“დუპლექსი”
ეს შავი იუმორის მოყვარულთა ნამდვილი ზეიმია! დრუ ბერიმორი და ბენ სტილერი განასახიერებენ წყვილს, რომელიც ოცნების სახლში საცხოვრებლად გადადის, მაგრამ არ იცის, როგორი მეზობლის ხელში მოუწევს ცხოვრება.
“დასაკარგი არაფერია”
ცოლის ღალატით გამწარებული მთავარი გმირი უგზო-უკვლოდ დამოგზაურობს. თუმცა, წარმოდგენა არ აქვს, რომ მასზე მეტად კვალი სხვა მგზავრს აქვს არეული. მოკლედ, ღალატის მსხვერპლი კიდევ ერთი საშიშროების წინაშეა. ეს საშიშროება კი უამრავი სასაცილო მომენტითაა სავსე.
“თაგვზე ნადირობა”
ანდერძით დატოვებულ სახლს არც ერთი მემკვიდრე არ აქცევს ყურადღებას მანამ, სანამ არ გაიგებენ, რომ ნანგრევები საკმაოდ ძვირად ფასობს. თუმცა, სახლის გაყოფამდე ერთი სერიოზული პრობლემაა მოსაგვარებელი – იქ დაუმარცხებელი თაგვი ბინადრობს!
აი, ასეთია სია ფილმებისა, რომლებიც შემოდგომის სევდიან და სუსხიან ამინდებში თქვენს განწყობას შესამჩნევად აამაღლებენ. რეკომენდირებულია თითოეული მათგანის მეგობართან ერთად ყურება. გარდა ამისა, სიამოვნებით მოვისმენთ თქვენს შემოთავაზებებსაც.
ბევრ სიცილსა და მხიარულებას გისურვებთ!
წყარო: allmovies.ge