ბუმერანგის ეფექტი, ანუ ისტორია № 1 - განწყობა
საშინელ განწყობაზე გაიღვიძა, წინა დღის ამბებმა მოსვენება აღარ მისცა, ყველაფერი გაიხსენა და კიდევ მეტად გაბრაზდა. ფინჯანმა ყავამაც ვერ უშველა. ოფისის დერეფანი ისე გაიარა, არავის მისალმებია. საკუთარ კაბინეტში ჩაიკეტა, თავი ხელებში ჩარგო და სცადა, ფიქრებს მორეოდა: პატარა ბავშვები ხომ არ არიან? რამდენჯერ უნდა ავუხსნა? რა არის აქ ასე რთულად გასაგები? ამხელა სტაჟის მქონე ხალხს ელემენტარულიც არ ესმით. ასე საქმეს წინ ვერ წავწევთ...
თავი ასწია, თანაშემწეს დაუძახა და ყველა განყოფილების მენეჯერის მოწვევა სთხოვა... არა, არ სთხოვა, მოსთხოვა... იჩხუბა, იყვირა... გოგონას თავაზიანი ღიმილი სახეზე შეაშრა, უხმოდ გავიდა...
მენეჯერებსაც არ შეხვედრია თბილად, გაბრაზების დამალვა არც უცდია, ყველა გალანძღა, ყველას ყველაფერი აკადრა... სუნთქვაშეკრული მენეჯერები უფროსს გაოგნებულები უსმენდნენ, ხასიათი გაუფუჭდათ, კაბინეტიდან საშინელ განწყობაზე გავიდნენ... ახლა მათ დაქვემდებარებაში მყოფ თანაშრომლებს უნდა დალაპარაკებოდნენ...
შუადღის მერე ცოტა დაწყნარდა... სასიხარულო ამბავიც შეიტყო და ამანაც იმოქმედა. ოთახში ბოლთის ცემა შეწყვიტა და სიმღერაც წაიღიღინა. მერე ოფისში გავლაც მოინდომა, - ხალხს დავხედავო...
თავაუღებლად მუშაობდა ყველა. ხელმძღვანელმა თანამშრომლებთან გასაუბრება და ვინმეს სახეზე ღიმილის დაჭერა სცადა, თუმცა ამაოდ - ნაძალადევი, თავაზიანი მისალმების გარდა ვერაფერი მიიღო...
დილიდან განვითარებულმა მოვლენებმა ყველა დაძაბა. კომპანიის ხელმძღვანელის კაბინეტიდან გამოსული მენეჯერების განწყობა ყველას მოედო.
უკან დაბრუნდა, საშინელ ხასიათზე იყო. ისევ მაგიდასთან დაჯდა, თავი ისევ ხელებში ჩარგო...
მაინც ვერ მიხვდა, რომ ეს მისი დილანდელი საშინელი განწყობის შედეგი იყო, რომელიც ბუმერანგივით მიუბრუნდა უკან...
ხშირად ერთი ადამიანისგან წამოსული აგრესია გარშემომყოფების ცუდი განწყობის მიზეზი ხდება. ეს კი იმას ნიშნავს, რომ ერთ კონკრეტულ ადამიანს ზოგადი ფონის შექმნაც შეუძლია და შეცვლაც.
საიდუმლო არაა, რომ ჩვენი განწყობა არა მარტო საკუთარ თავთან შინაგან ჰარმონიაზე, არამედ გარემო ფაქტორებზეცაა დამოკიდებული. რა გვითხრა უფროსმა სამსახურში? შეგვაქო თუ გვისაყვედურა? ვიკამათეთ თუ არა საყვარელ ადამიანთან? მეტროში ვინმემ ფეხზე ხომ არ დაგვაბიჯა? ვინმემ ხომ არ გამოგვლანძღა? და ა.შ. - ეს და სხვა მრავალი ნიუანსი ქმნის ჩვენს ხასიათს, რომელსაც ჩვენ, ჩვენი მხრივ, გარშემომყოფებს ვუნაწილებთ.
ადამიანები ერთმანეთისგან განსხვავდებიან და აბსოლუტურად სხვადასხვაგვარად რეაგირებენ ამა თუ იმ სიტყვაზე, თუ ფრაზაზე, ან ქცევაზე, იქნება ეს მათივე ქმედება, თუ სხვების...
ძალიან მარტივია გაწონასწორებული ადამიანის მდგომარეობიდან გამოყვანა მხოლოდ ერთი უხეში სიტყვითაც კი.
ცუდი განწყობისთვის ადამიანს უამრავი მიზეზი შეიძლება ჰქონდეს. ეს შეიძლება იყოს ვინმეს ჯანმრთელობის მდგომარეობა, აწმყოსა და მომავლის შიში, სამუშაო, კარიერა, ოჯახი, ახლობლები და მსოფლიოში მიმდინარე პროცესები... და რადგან მკვლელობების, ძარცვის, ომების და სისხლისღვრების შესახებ ინფორმაციები მასმედიის საშუალებით ვრცელდება, საინფორმაციო გამოშვება, სხვადასხვა გადაცემები და ჟურნალ-გაზეთებიც კი შეიძლება გახდეს ადამიანის ცუდი განწყობის მიზეზი.
საბოლოო ჯამში, ჩვენში უარყოფითი ენერგია გროვდება. რომელიმე ჩვენგან აღმოაჩნდება უნარი, დამოუკიდებლად გაუმკლავდეს შინაგან გაღიზიანებას და ეცდება, ცუდი განწყობა ოჯახის წევრებზე, მეგობრებზე, კოლეგებსა და უბრალოდ, უცნობებზე არ გადაიტანოს. ზოგს ეს არ გამოუვა და დაგროვილ აგრესიას სხვადასხვა გზით ყველას გაუნაწილებს. ასეთ ადამიანებს კი გარესამყარო ასეთივე მეთოდებით უპასუხებს, რაც, საბოლოო ჯამში, ჩაკეტილ წრესთან მიგვიყვანს. ვიღაც, მაგალითად, მეტროში, ან სამსახურში საკუთარ ჯავრს ჩვენზე იყრის, ჩვენც ამ აგრესიას ჩვენში დავიგროვებთ მანამ, სანამ არ ვიპოვით ადამიანს, ვისზეც ახლა უკვე ჩვენი ჯავრის ამოყრას შევძლებთ, შემდეგ მასში გაჩნდება იგივე ემოცია და ა.შ.
სამწუხაროდ, ასეთ ადამიანებად შეიძლება ჩვენი ახლობლები და ნათესავები იქცნენ.
ბუმერანგის ეფექტი -ისტორია №2 - სილა (ინდური იგავი)
ერთხელ მეფე აკბარი 9 რჩეულ ქვეშევრდომს ესაუბრებოდა. ისინი სასახლეში ყველაზე ნიჭიერ და შემოქმედებით პერსონებად ითვლებოდნენ. აკბარი კი უცნაური ქმედებებით გამოირჩეოდა. ხშირად ისეთ რაღაცას ჩაიდენდა, რომ... მეფეს კი ვერავინ ეკითხებოდა, რატომ იქცეოდა ასე...
საუბრის დროს, აკბარმა გვერდით მდგომს მოულოდნელად სილა გააწნა. ის ყველაზე ჭკვიანი ვეზირი, ბირბალი აღმოჩნდა. ბირბალი რამდენიმე წამს დაფიქრდა, ვერ მიხვდა, რა რეაქცია უნდა ჰქონოდა, თუმცა იცოდა, რომ რაღაც უნდა მოემოქმედებინა. ბევრი აღარ უფიქრია და მის შემდეგ მდგომს გააწნა სილა. ის ერთ-ერთი მინისტრი აღმოჩნდა. ახლა მინისტრი დაიბნა, თუმცა მცირე პაუზის შემდეგ, დაუფიქრებლად გადაულოცა სილა მეზობელს. ამბობენ, სილამ მთელი დედაქალაქი შემოიარაო.
ღამით კი აკბარს საკუთარმა ცოლმა შემოარტყა ხელი. გაფრაზდა მეფე, - რას აკეთებო, ჰკითხა. მან კი უპასუხა, - არ ვიცი, მაგრამ ეს მთელ ქალაქში ხდებაო. დღეს სრულიად უმიზეზოდ შენმა პირველმა ცოლმა სილა გამაწნა, ის ჩემზე დიდია ასაკით და ბუნებრივია, ხელსაც ვერ შევუბრუნებდი, შენ გარდა კი მე ისეთი არავინ მყავს, ვისაც სილას ვუთავაზებდიო.
– ასეა, – თქვა დაფიქრებულმა აკბარმა, – ჩემი საკუთარი სილა ჩემთანვე დაბრუნდაო.
ბუმერანგის ეფექტი პოზიტიურ განწყობაზეც ვრცელდება. ნეგატივისგან განსხვავებით, პოზიტივი ადამიანს ენერგიით ავსებს და გარშემომყოფებსაც კარგ განწყობას უქმნის. კარგი განწყობაზე მყოფი ადამიანები კი მეტად შრომისუნარიანები არიან და წინააღმეგობების გადალახვაც ნაკლებად უჭირთ.
არსებობს თუ არა ე.წ. უხასიათობასთან ბრძოლის მეთოდები, როგორ უნდა შევიქმნათ დადებითი განწყობა და როგორ მოქმედებს ჩვენი ხასიათი ჩვენსავე ცხოვრებაზე, - ამ და სხვა საინტერესო საკითხებზე sazogadoeba.ge-ს ახალგაზრდული მოძრაობა „დავითიანნის“ ფსიქოლოგიის ცენტრის ხელმძღვანელი, ნინო კერესელიძე ესაუბრა.
ნინო კერესელიძე: განწყობას ძალიან დიდი მნიშვნელობა აქვს ადამიანთა ცხოვრებაში. ზოგადად, განწყობა ქმნის ჩვენს დამოკიდებულებებს საგნებთან და ერთმანეთთან. დადებითი განყობა ქმნის ჯანსაღ გარემოს და თითოეულ ადამიანამდე მიაქვს პოზიტიური ენერგია. რაც შეეხება ცუდ განწობას, ის იწვევს შფოთვას, სტრესს, მივყავართ სამყაროსადმი უნდობლობისკენ, ამ დროს ნეგატიურ დამოკიდებულებაში ვართ ყველაფერთან. განსაკუთრებით ჭირს ემოციების გაანალიზება და კონტროლი თინეიჯერობის ასაკში. ამ დროს ადამიანში სხვადასხვა ტიპის ემოციები ირევა, თუმცა ეს მაინც ინდივიდუალურია და სხვადასხვა გარემო ფაქტორს, ინდივიდზე სოციუმის გავლენას უკავშირდება.
უხასიათობასთან საბრძოლველად, პირველ რიგში, უნდა გავაცნობიეროთ, რატომ ვართ უხასიათოდ, რა გვიქმნის ნეგატიურ განწყობას, როგორ შეგვიძლია, თავი ავარიდოთ მას. აგრესიის გამომწვევ მიზეზთან კონტაქტის შემცირებით და მისი უგულებელყოფით, თავისთავად, აგრესიაც შემცირდება, მაგრამ არსად წავა. იმისთვის, რომ ზოგადად აგრესიულობა დავთრგუნოთ, კარგია ყურადღების გადატანა ამ აგრესიის პოზიტურ მხარეზე. მაგალითად,, თუ აგრესია გვაქვს კონკრეტულ ადამიანზე, მასში ყველაზე პოზიტიური და ჩვენთვის მისაღები თვისება უნდა მოვძებნოთ და იმას მოვეჭიდოთ..
იმისთვის, რომ მთელი დღე კარგ განწყობაზე ვიყოთ, დღე გარკვეული პოზიტივით უნდა დავიწყოთ. უნდა ვეცადოთ, დილიდანვე ჩვენი ცხოვრების დადებით ნიუანსებზე ვიფიქროთ და ვაკეთოთ ის, რაც სიამოვნებას გვანიჭებს. კარგია დილას შპატი, რომელიც აფხიზლებს და ტონუსში მოჰყავს მთელი სხეული, ასევე რეკომენდირებულია მშვიდი და წყნარი მუსიკის მოსმენა ,ურთიერთობა ისეთ ადამიანებთან, რომლებიც ჩვენში დადებით ემოციებს აღძრავენ და ა.შ.
არსებობს რამდენიმე აპრობირებული მეთოდი, რომელიც ჩვენში სხვისი აგრესიის, სხვისი ემოციების დაგროვებას შეუშლის ხელს.
1. თუ თქვენ სიტყვიერი, ან თუნდაც ფიზიკური შეურაცხყოფა მოგაყენეს და საპასუხო ქმედებისგან თავის შეკავება გაგიჭირდათ, შესაძლო გართულებებისგან ერთი მარტივი მეთოდი დაგიცავთ - სულ რამდენიმე წამით სუნთქვა შეიკარით და...
შეიძლება სცადოთ და გულში რაღაც წაიღიღინოთ კიდეც. ეს ნამდვილად დაგეხმარებათ...
2. თუ უარყოფითი ენერგიის ვინმეზე გადატანა მაინც მოგინდათ, შეეცადეთ ადამიანებს არ შეეხოთ და მაგალითისთვის, ხელი მაგიდას ან კედელს დაარტყათ...
3. ცოტა ხნის შემდეგ იმ სიტუაციის გაანალიზება სცადეთ, რომელშიც აღმოჩნდით. თუ თქვენმა უფროსმა გისაყვედურათ, შეეცადეთ მაშინვე არ დასდოთ ბრალი იმაში, რომ მას თქვენს საქმიანობაზე წარმოდგენაც კი არ აქვს. შეეცადეთ კიდევ ერთხელ გაანალიზოთ საკუთარი მუშაობის შედეგები. შესაძლოა, სადღაც თქვენ მართლა დაუშვით შეცდომა და უფროსმა არცთუ უსაფუძვლოდ გისაყვედურათ. მედლის მეორე მხარე: შესაძლოა უფროსს ძილი დააკლდა ან დილიდანვე უგემური ყავა დალია - ყოველთვის ხდება რაღაც... თუ თქვენ აგრესიას აგრესიით არ უპასუხებთ, დიდი ალბათობით, უფროსი თვითონვე მოგიბოდიშებთ.
4. წარმოიდგინეთ რაიმე სასაცილო სამოსში გამოწყობილი ის ადამიანი, რომელმაც გაწყენინათ. ალბათ ყველას აქვს ნანახი ჰარი პოტერი, სავარაუდოდ, გახსოვთ ერთ-ერთი სერიაც, როდესაც პროფესორი ლიუპინი მოსწავლეებს ასწავლის, როგორ უნდა გაუმკლავდნენ შიშს. ის მონსტრის ნაცვლად საკუთარი შიშის წარმოდგენას სთავაზობს, რომელიც უცნაურ სამოსში გამოწყობილი სასაცილო სიტუაციაში აღმოჩნდება.
5. შეეცადეთ, ბოდიში მოუხადოთ მას, ვინც გაწყენინათ. ამ დროს ის აუცილებლად დაიბნევა და საკუთარი საქციელის შერცხვება. ეს მეთოდი ყოველთვის უღალატოდ მოქმედებს.
6. შეეცადეთ შეიცოდოთ ადამიანი, ვინც შეურაცხყოფა მოგაყენათ. იფიქრეთ იმაზე, რომ ეს გაუაზრებლად გააკეთა და გარკვეული მიზეზების გამო, ახლა თვითონაც ძალიან ცუდ დღეშია. ასეთ შემთხვევაში, გაბრაზება გაივლის და თანაგრძნობაში გადაიზრდება, ეს უკანასკნელი კი უარყოფითად აღარ დაგმუხტავთ.
7. შეეცადეთ პოზიტიურად იფიქროთ, ნებისმიერ სიტუაციაში აღმოაჩინოთ რამე დადებითი. არასასიამოვნო ინციდენტისგან ყურადღება რაიმე საინტერესო ღონისძიებაზე, ან მოვლენაზე გადაიტანოთ, საღამოს საათებში სპორტდარბაზში, ან კინოთეატრში გაისეირნოთ, ძალიან კარგია ამ დროს იოგაც. დადებითად მოქმედებს საყვარელი წიგნის წაკითხვა, ან ფილმის ყურება. ასე დამშვიდდებით და განწყობასაც გაიუმჯობესებთ.
თუ ჩვენ საკუთარი თავის მართვას ვისწავლით, გარემო ფაქტორები უარყოფითად განწყობაზე ასეთი ინტენსივობით აღარ იმოქმედებს.
დადებით განწყობას და შესაბამისად, პოზიტიურ დღეს გისურვებთ!!!
sazogadoeba.ge
როგორ შევიქმნათ დადებითი განწყობა - ბუმერანგის ეფექტი, ანუ უხასიათობის მიზეზი ჩვენშია
⏱️ 1 წთ.
👁️ 2 303
100%