რჩევები მათთვის, ვინც ალერგიულია



ზამთრის შემდეგ ნანატრი გაზაფხული დადგა, მაგრამ ამ სეზონს თან ალერგიული ფონი ახლავს.

ალერგია გარემო ფაქტორის მიმართ ადამიანის მომატებული მგრძნობელობაა. მას ორგანიზმში იმუნური სისტემა აბალანსებს. იმუნურ სისტემას დაცვითი მექანიზმი აქვს, ანტისხეულებს გამოიმუშავებს. როცა ორგანიზმში ალერგენი, ანუ ანტიგენი მოხდება, ამ ანტიგენის წინაშე ბრძოლის უნარი გააჩნია. თუმცა, როდესაც ანტიგენი ჭარბობს და ანტისხეულებს ბრძოლა აღარ შეუძლიათ, ალერგიული რეაქცია ვითარდება. ალერგიული დაავადებებია: ალერგიული რინიტი, კვებითი ალერგია, ჭინჭრის ციება, კონიუნქტივიტი, ბრონქული ასთმა. ამ ალერგიებს ემატება ინსექტური ალერგია, ანუ მწერის ნაკბენით გამოწვეული. სეზონურ ალერგიაზე "ინფო9"-ს ქირურგიის ეროვნული ცენტრის ალერგოლოგი თინა მურადაშვილი ესაუბრა.

- როგორ უნდა მივხვდეთ, რომ ალერგია გვაქვს?
- დიაგნოსტიკის თვალსაზრისით, ზოგიერთი პაციენტისთვის ალერგია ხშირად გაურკვეველია და დახმარებისთვის სხვადასხვა სპეციალობის ექიმს აკითხავს. ჩვენი პაციენტები ხშირად ხვდებიან ოფთალმოლოგებთან. ყურადღება სეზონურ ალერგიაზე გავამახვილოთ, რომლის ძირითადი მახასიათებლებია: ცხვირცემინება, ცხვირიდან გამონადენი, თვალების წვა და ქავილი. ტემპერატურა ალერგიის ნებისმიერ დაავადებას ახასიათებს. შეიძლება პაციენტს ყელში ქავილის შეგრძნება ჰქონდეს. სეზონური ალერგიული რეაქციები მარტ-აპრილის თვიდან იწყება; თუ ძალიან თბილი ამინდებია და მცენარეებიც ადრე აყვავილდა, დაავადებაც შედარებით ადრე იჩენს თავს. ეს დაავადება ყვავილობის პერიოდში, მცენარის მტვერზეა დამოკიდებული. მტვერი ქარს გადააქვს, სწორედ ამიტომ, გაზაფხულზე, ქარიან ამინდში როცა ხე-მცენარეები ყვავიან, ალერგიული კლინიკის გამოვლენის პერიოდი იწყება. ჩვენთან, ალერგოლოგიის კათედრის მიერ შესწავლილია მცენარეების ყვავილობის კალენდარი. ამ კალენდრის მიხედვით პირველად თავს იჩენს ხე-მცენარეების ყვავილობა, ასევე შესაძლოა ახალი პროდუქტების შემოსვლის პერიოდი გამოვლინდეს. მეორე ეტაპია მარცვლოვანი და პურეული მცენარეების ყვავილობა, ხოლო მესამე სარეველა მცენარეების ყვავილობის პერიოდი.

- სეზონური ალერგიის გარდა, კიდევ რა სახის ალერგიაა ფართოდ გავრცელებული?
- სეზონურ ალერგიებთან ერთად, კვებითი ალერგიებიც ხშირად იჩენს თავს. მოგეხსენებათ, ყველაზე ძლიერი ალერგენია მარწყვი. შეიძლება, ალერგია გამოიწვიოს: ალუბალმა, ბალმა, ნებისმიერმა ახალმა ხილმა. უმჯობესია, პაციენტმა ახალი ხილი შემოსვლიდან პირველივე კვირებში არ მიიღოს, მოგვიანებით მიირთვას. კვებითი ალერგია შეიძლება გამოიხატოს: პირღებინებით, ფაღარათით, მუცლის ტკივილით, ხოლო შემდეგ დაეწყოს გამონაყარი. რაც შეეხება გამონაყარს მის ლოკალიზაციას ვერ განსაზღვრავთ. გახსოვდეთ, რომ ალერგიულ გამონაყარს ყოველთვის ახასიათებს ქავილი. ძლიერ ალერგიულ საკვებად ითვლება: მარწყვი, პომიდორი, ყავა, შოკოლადი, თევზეულობა, ფორთოხალი.

- რას გვეტყვით სეზონურ ალერგიულ რინიტზე?
- სეზონური ალერგიული რინიტები განსაკუთრებულ ყურადღებას ბავშვებში იქცევს. ბავშვთა სეზონურ ალერგიებს ვუწოდებთ - შეიძლება თვითგანკურნებადიც კი იყოს და თავადვე ალაგდეს, მაგრამ არის შემთხვევები, როცა გართულებები იჩენს თავს რაც პოსტ-ასთმური სინდრომით და ალერგიული ტიპის გამონაყარით გამოიხატება. ამიტომ, გართულება თავიდან რომ ავიცილოთ, შემდგომი ტაქტიკისა და მკურნალობისათვის, მშობელმა ალერგოლოგს უნდა მიაკითხოს. გადაუდებელ შემთხვევაში, შეგიძლიათ, აფთიაქში წახვიდეთ, სადაც კონსულტაციას გაგიწევენ და პრეპარატს შეგირჩევენ. ეს იქნება ერთგვარი პირველადი დახმარება, შემდეგ კი აუცილებლად ალერგოლოგს მიაკითხეთ. სეზონურის გარდა, ასევე გვაქვს მთელი წლის ალერგიული რინიტი. ეს ალერგიული რინიტი ნებისმიერ დროს შეიძლება განვითარდეს. ალერგენის დადგენა ხდება ალერგოლოგთან გამოკვლევების საფუძველზე. ალერგიულ რინიტს მთელი წლის განმავლობაში იწვევს სინოტივე, ობი, სოკოები. ასევე არსებობს ოთახის მტვრის ტკიპა, რომელიც ორგანიზმის კანის თესლით იკვებება. ბუდობს რბილ ქსოვილებში.

რჩევები მათთვის, ვინც ალერგიულია


რას გვეტყვით მზის ალერგიის შესახებ?
- როცა გაზაფხულზე მწველი მზეა, უმჯობესია ადამიანი სხივებს მოერიდოს. თუ აუცილებელი არაა, ქუჩაში გასვლისგან თავი შეიკავოს. სხვა შემთხვევაში კი მზისგან დამცავი ქუდი დაიხუროს. სასურველია, დღე ჩრდილში გაატაროთ. მზის დამწვრობის შემთხვევაში საჭიროა ექიმს მიაკითხოთ. ამ დროს რეკომენდებულია დიდი რაოდენობით სითხის მიღება.

- ალერგიასთან დაკავშირებით გარკვეული რეკომენდაციები არსებობს. რას ურჩევთ ჩვენს მკითხველს?
- როცა პაციენტი ალერგიულია ვურჩევთ რბილი ქსოვილი ტყავით შეცვალოს, ლოგინი კი ხშირად გაამზეუროს. ოთახი გაანიავოს დილით ძალიან დრე, ან გვიან. შუადღეს გარეთ მტვერია. ალერგიის გამწვავება განსაკუთრებით ხდება შემოდგომა-გაზაფხულზე. გამწვავებული ალერგიული ფონის მოგვარება დიეტოთერაპიითაცაა სასურველი. არ უნდა მივირთვათ მწარე, მჟავე, ტომატიანი საკვები, შემწვარი და თევზეულობა. სასურველია მიირთვათ ფაფეულობა, მაკარონი, ვერმიშელი, სუპეული, პიურე, მოხარშული ხორცი - ხილიდან ვაშლი. დიდი რაოდენობით მინერალური წყალი და ჩაი დალიეთ, არავითარი წვენი! ერთადერთი შეიძლება მიიღოთ ჩირის, კომშის, ან ვაშლის კომპოტი.

info9.ge
































ტექსტის სანახავად გაიარეთ რეგისტრაცია.