იმისათვის, რომ თავი თავდაჯერებულად და კომფორტულად ვიგრძნოთ, სულაც არ არის საჭირო ფიტნეს კლუბებში ილაჯგაწყვეტამდე ვარჯიში ან აუტანელი დიეტის დაცვა (თუ, რა თქმა უნდა, ჯანმრთელობის პრობლემების გამო არ მიმართავთ ამას). მარტივი ჭეშმარიტებაა: რამდენადაც თქვენ აფასებთ საკუთარ თავს, იმდენად გაფასებენ გარშემომყოფებიც. ამიტომ, შეეცადეთ, კატეგორიული შეზღუდვების და აკრძალვების კასკადი თავს არც ჩაცმის დროს მოიხვიოთ. ჩვენ მიერ შემოთავაზებული რჩევები ამაში დაგეხმარებათ.
არასოდეს დაგავიწყდეთ თქვენი ფიგურის ტიპი!
წინა პოსტში ქალის ფიგურის ტიპების შესახებ დაწვრილებით ვისაუბრეთ.
ამ საკითხს კვლავ არაერთხელ დავუბრუნდებით, მანამდე კი გირჩევთ:
* არ მოუსმინოთ მაღაზიის კონსულტანტებს ან საყიდლებზე სახელდახელოდ წაყვანილ ახლობლებს.
* არ არსებობს უნივერსალური თარგის ჩაცმულობა “Plus Size” ქალებისთვის, რადგან არ არსებობს უნივერსალური “Plus Size” ფიგურა.
* მაგალითად, თეძოებზე უხვნაკეცებიანი ტანსაცმლის იგნორირების რჩევა სულაც უადგილოა სამკუთხედის ტიპის ფიგურისთვის, მაშინ როდესაც ე.წ. ფანრებიანი სახელოები ამ ტიპის ფიგურას უკიდურესად ულაზათოდ წარმოაჩენს.
* ის, რაც მართლზომიერია ვაშლის ფორმის ფიგურისთვის (აქცენტირება ფეხებზე), შესაძლოა, არამომგებიანი იყოს მსხლისთვის.
* ამიტომ, ჩვენი ფიგურა კარგად უნდა შევისწავლოთ, რის საფუძველზეც მის მომგებიან პოზიციაში წარმოჩენაში ვეღარავინ შეგვიშლის ხელს.
ფერთა დღესასწაული
დაივიწყეთ აკრძალვები თქვენი ჩაცმულობის მკვეთრ, ღია ფერის და ერთ ტონში გადაწყვეტაზე. სინამდვილეში, ვიზუალურად ჩვენი გაბარიტების გაზრდაზე ფერის არა მხოლოდ ინტენსივობა და ღიაობა მოქმედებს, არამედ მისი ტემპერატურაც: რაც უფრო თბილია ფერი, მით უფრო „ფართოა“ იგი და პირიქით, ცივი ფერები ვიზუალურად ამცირებს მის მიერ ამოვსებულ სივრცეს. ასე რომ, ფერებით თამაში მუდამ შესაძლებელია. ასევე არაგონივრულია ერთი ტონის სამოსზე ტაბუს დადება; მთავარია, შევარჩით მკვეთრი სილუეტის, კარგად დამუშვებული მოხაზულობის სამოსი.
მხიარული ზოლები
ჩვენი ბებიების, დედების და თანატოლების თაობა მტკიცედაა დარწმუნებული, რომ „ჰორიზონტალური ზოლები ასუქებს, ვერტიკალური კი - ახდუნებს“.
შესაძლოა, ამაში მართლაც იმალებოდეს სიმართლის მარცვალი, მაგრამ ალბათ ხშირად შეგინიშნავთ, რომ ვერტიკალური ზოლებიანი სამოსის მატარებელნი მოსიარულე ლეიბებს ჰგვანან.
ზოლები და ხაზები - ოპტიკური ილუზიის მძლავრი ინსტრუმენტია, რომელიც გონივრულად უნდა გამოვიყენოთ. თითქმის უნივერსალური წესია, რომ დიაგონალური ზოლები სილუეტს აგრძელებს.
რა დავმალოთ და რა გამოვაჩინოთ?
Plus Size გაბარიტების მქონე ქალები მუდმივად დახურულ და სქელი ქსოვილისგან შეკერილ სამოსს ატარებენ, რაც მათ საერთო გარეგნობას ამძიმებს.
სხეულის ზოგიერთი ნაწილის გამოჩენა თქვენს ჩაცმულობას სიმსუბუქეს და წინასწორობას შემატებს. შეეცადეთ, ზომიერი დოზით გამოაჩინოთ სხეულის ის ნაწილები, რომლებიც მიმზიდველი გაქვთ. თუ არცთუ ისე დახვეწილი ხელის მტევნებისა და იდაყვების დამალვა შესაძლებელია, ყელთან დაკავშირებით საქმე სხვაგვარადაა - რაც უფრო ცდილობ მისი მოცულობის დაფარვას, მით უფრო ვეებერთელად მოჩანს იგი. გამონაკლისია ე.წ. დამდგარი საყელო. დაბალ ყელს უხდება კვადრატული ან V-ს ფორმის ჭრილი.
სამოსის სიგრძე
ე.წ. ვაშლის ან სამკუთხედის ტიპის ფიგურის მქონე ქალებმა თავი უნდა შეიკავონ მკლავების დიდი დოზით გამოჩენისგან. ამ შემთხვევაში, სახელოს სიგრძე აუცილებლად იდაყვს ქვემოთ უნდა იყოს. მნიშვნელოვანია ტუნიკებისა და კაბების სიგრძეც. ტუნიკა, კარდიგანი და ბლუზა არ უნდა მთავრდებოდეს თეძოს ყველაზე ფართო ნაწილში - ეს მათ დამატებით მოცულობას შემატებს. Plus Size ქალებს უხდებათ მუხლს ოდნავ ზემოთ, მუხლს ჩამოცილებული ან მაქსი კაბები.
უფრო მეტი ვერტიკალური ხაზი
ზოლების გარდა, ფიგურისთვის ვერტიკალური ფორმების მიმნიჭებელი ბევრი საშუალება არსებობს. შეიძლება ეს იყოს კაბაზე ან პიჯაკზე მიმაგრებული ღილების წყობა, ხაზიანი შარვალი, შარფის ვერტიკალური მოხაზულობა, ნაკერი ჯინსზე, გახსნილი ჟილეტი, გრძელი ყელსაბამი და სხვ.
ფეხსაცმელი
აქ ბევრი წესი არცაა. რა თქმა უნდა, ყველაზე მთავარი კომფორტულობაა. სხეულის წონა ტერფს ისედაც ამძიმებს, რომ ცუდმა კალაპოტმა სიცოცხლე კიდევ უფრო არ გაგვიმწაროს. მისასალმებელია 6-7 სანტიმეტრიანი ქუსლი. ფეხსაცმლის ცხვირის საუკეთესო ფორმაა მომრგვალებული ან წაწვეტებული, კუთხოვანს კი უარი უნდა ვუთხრათ.
ასევე, ულამაზოდ გამოიყურება ძალიან წვრილი ქუსლი. სასურველია, ქუსლის სისქე საშუალო იყოს, სხვადასხვა ფორმების ვარიაციით.
ეთნიკური ორნამენტი
ეთნიკური ორნამენტი საოცრად უხდება Plus Size გაბარიტების მქონე ქალებს. აქ მთავარი ისაა, თუ როგორ მოიხდენთ აფრიკული ან ნორვეგიული ორნამენტით დამშვენებულ, ტანზე თავისუფლად მდგარ სამოსს. ამგვარი სტილი განუმეორებელ ორიგინალურობას მოგანიჭებთ.
funtime.ge