დარიგებებს გვაძლევს მეტეხის ყოვლადწმინდა ღვთისმშობლის შობის ტაძრის წინამძღვარი, დეკანოზი მამა აკაკი (მელიქიძე).
* ნებისმიერი ტექნოლოგიური წინსვლა ადამიანისათვის მხოლოდ სულიერი და ფიზიკური სიკეთის მომტანი უნდა იყოს.
* სარწმუნოება ყოველთვის მოქმედია და განვითარების ნებისმიერ ეტაპზე სჭირდება ადამიანს.
* ტრანსპორტირებისას, ისევე როგორც სხვა დროს, აუცილებელია უფლის მფარველობა და მეოხება. ნებისმიერი გადაადგილებისას უნდა ახსოვდეს მორწმუნეს უფალი და * შეძლებისდაგვარად გამოხატავდეს მისდამი მოწიწებას და მადლიერებას.
ავტომობილის კურთხევა
* როგორც სახლს, რომელშიც ოჯახი ცხოვრობს, ისევე ავტომობილს სჭირდება დალოცვა და კურთხევა.
* არსებობს სპეციალური ლოცვა „ეტლის კურთხევა“, რომელსაც ამბობს მოძღვარი და ლოცავს ავტომობილის მგზავრებს, მძღოლს, თავად ტრანსპორტის თითოეულ კედელს, რომ სიკეთით ემსახუროს ადამიანს და მშვიდობით ატაროს იგი.
* ავტომობილი შეძენისას მხოლოდ ერთხელ იკურთხევა, ხელახალი კურთხევა საჭირო არ არის.
* თუ ახლად შეძენილი ავტომობილი ძველი პატრონის დროს მოძღვრის მიერ არის დალოცვილი, მას ხელახლა კურთხევა არ ჭირდება.
ავტომობილი და ხატები
* ყველა მორწმუნეს უხარია და მოსწონს, როდესაც თავის ავტომობილში სხვადასხვა ხატები აქვს დაბრძანებული, მაგრამ ეს მეტად რთული და საპასუხისმგებლო რამეა.
* ხატს და ავტომობილის გარედან მისაკრავ საეკლესიო ლოცვებს დიდი ძალა აქვთ. ეს ძალა გადმოდის მძღოლზე და მგზავრებზე და ტრანსპორტირებისას იცავს მათ.
* ავტომობილში, სადაც ხატებია დაბრძანებული, კატეგორიულად აკრძალულია მოწევა. სიგარეტზე დამოკიდებულება ცოდვაა, მავნე ჩვევაა რომელსაც ამ დროს მორწმუნე ხატების წინ სჩადის.
* ხატები ავტომობილში დიდ პასუხისმგებლობას ითხოვენ მფლობელისაგან.
* ასევე დიდი ცოდვაა ამ დროს სალანძღავი სიტყვებიც.
* მლოცველის ბაგეები მხოლოდ ლოცვებს უნდა ამბობდნენ და მათთვის ლანძღვა-გინება მტკივნეულია.
მძღოლის ლოცვა
„ღმერთო, ყოვლად სახიერო და ყოვლად მოწყალეო, რომელი შენითა მოწყალებითა და კაცთმოყვარებითა ყოველთა ჰფარავ, მეოხებითა ღმრთისმშობელისათა და ყოველთა წმიდათა დაგვიფარენ მოულოდნელისა სიკუდილისა და ყოვლისა განსაცდელისაგან, მე ცოდვილი და ჩემდამი მინდობილნი ესე კაცნი და მაკურთხე უვნებელად მიყვანებად ყოველთა საჭიროებისამებრ მათისა.
ღმერთო მოწყალეო, მიხსენ მე ბოროტისა მოჩქარეობისა და უწმიდურისა მემთვრალეობისაგან, რომელნი არიან მიზეზ ყოველთა განსაცდელთა და მოულოდნელისა სიკუდილისა, თვინიერ აღსარებისა.
მომმადლე მე უფალო წმიდითა სვინიდისითა მიწევნად ჟამსა სიბერისასა, ჩემისა დაუდევრობითა მომწყდართა და ვნებულთა კაცთა ტვირთისა გარეშე, რათა დიდებულ იყოს სახელი შენი წმიდა აწ და მარადის და უკუნითი უკუნისამდე, ამინ.“
მძღოლები და ეკლესიის გაფრთხილება
* ნებისმიერი ავტომობილი ელემენტარული გადაადგილების საშუალებაა.
* ხშირი ცვლა, ნაირ-ნაირი ავტომობილებით თავის მოწონება არ არის ნამდვილი მორწმუნის კარგი საქციელი.
* ზომიერება ერთადერთი რამაა, რაც უხდება და მოეთხოვება ადამიანს.
* ავტომობილით გადაადგილებისას საჭიროა ზომიერების დაცვა, რათა გაუფრთხილდეს ადამიანი უფლისგან ბოძებულ სიკეთეს - სიცოცხლეს.
* საჭესთან ალკოჰოლი და თრობა უფლის უპატივისცემლობაა.
* გარდა საკუთარი სოცოცხლისა, მძღოლი ასევე უნდა უფრთხილდებოდეს სხვების სიცოცხლესაც. ნებისმიერი ადამიანი ხომ უფლის შვილია.
* ნებისმიერი სიცოცხლისათვის საშიში ქცევა, მართალია, არც სწრაფი მოძრაობა და არც საჭესთან სიმთვრალე თვითმკვლელობის ტოლი არ არის, მაგრამ მაინც არაეკლესიური ქმედებაა.
* ქართულ სინამდვილეში ხშირია ბილწსიტყვაობა საჭესთან, რაც ასევე ყოვლად დაუშვებელია.
მძღოლების სამახსოვრო
* როდესაც ავტომობილით გაუვლით გვერდით ეკლესიას, შეანელეთ სვლა და გადაიწერეთ პირჯვარი.
* ეს ქმედება მორწმუნის დიდ შეგნებაზე მეტყველებს, რომლის სულშიც უფლის სიყვარულია.
* ეკლესიის წინ პირჯვრის გამოხატვა უფლის წინაშე პატივისცემაა.
rubrica.ge
ავტომობილის კურთხევა და მძღოლის ლოცვა
⏱️ 1 წთ.
👁️ 8 347
100%