ყველას ჯერ კიდევ სძინავს, თქვენ კი ყავისთვის წყალი უნდა აადუღოთ, ბუტერბროდები დაჭრათ, ბავშვი სკოლისთვის გაამზადოთ, ქმარი გააღვიძოთ და მისი გაღვიძებისთვის მოწესრიგებაც მოასწროთ. რთულიაო, იტყვის ვინმე, მაგრამ თუ ამ რთულ მოვალეობებს რუტინად არ აღიქვამ, მიხვდები, რომ ეს ყველაფერი მოსიყვარულე და მზრუნველი ცოლის იდილიური ყოველდღიურობაა.
1. დილა საკუთარი თავით დაიწყეთ. ნუ ირბენთ ბინაში ხალათითა და საღამურით. სულ 5 წუთი დაგჭირდებათ, რამე მოხერხებული და საშინაო რომ გადაიცვათ. რბილი სვიტერი, მოხერხებული თარგის შარვალი - ასე განწყობას იქმნით, რომელიც, შესაძლოა, მთელი დღე გაგყვეთ. ასე რომ, საკუთარ თავზე დახარჯული 5 წუთით სამყარო არ ამოტრიალდება, არც მეუღლეს ჩაეძინება და არც უჭმელი დარჩება ვინმე.
2. ყურადღებით მოათვალიერეთ სამზარეულო. სწორედ აქ იწყება ყოველი დღე, აქ ატარებთ ყველაზე დიდ დროს. ეს იმას ნიშნავს, რომ ეს გარემო განსაკუთრებულად უნდა მოაწყოთ, თქვენებურად, მოსახერხებლად, სასიამოვნოდ. რა თქმა უნდა, მაშინვე იფიქრებთ: ადვილია თქმა, მაგრამ ჯადოსნურჯოხიანი ქალღმერთი კი არა ვარო. გადაადგილეთ პატარა წვრილმანები: ლარნაკები, ყვავილების ქოთნები, ქილები. შეცვალეთ ხოლმე თაიგულების ფერი სეზონის მიხედვით. გამოცვალეთ ფარდა, რომელიც თავისებურ განწყობას ქმნის სამზარეულოში. დღესასწაულებზე - ახალი წელი, შობა, აღდგომა, დაბადების დღეები და სხვა. ერთი სიტყვით, გზა მიეცით ფანტაზიას.
3. ყოვედღიური სტრესით ნუ დაღუპავთ იდილიას. ოჯახურ მეორნეობასაც ორგანიზატორული თვისებები სჭირდება. ჰაერზე კი არ ამბობენ, კარგი დიასახლისები კარგი მენეჯერები ხდებიანო. მარტო რომ დარჩებით, დაისხით ყავა, მაცივრიდან იოგურტი გამოიღეთ, ჩამოჯექით 5 წუთით. ფანქარი და ფურცელი მოიმარჯვეთ და დღის გეგმა ჩამოწერეთ, თან პრიორიტეტები განსაზღვრეთ. ყველაფრის “ერთად” გაკეთებას ნუ დაიწყებთ. დაახარისხეთ საქმეები სასწრაფო, ყოველდღიურ და იმ საქმეებად, რომლებიც ერთ კვირას მოიცდიან. ნუ შფოთავთ. თუ მშვიდი და საკუთარი თავით კმაყოფილი იქნებით, სახლშიც იგივე ატმოსფერო გამეფდება.
4. ხშირად უამბეთ ქმარს, რას აკეთებდით მთელი დღე. იცოდეს, რომ ფეხიფეხზე გადადებული არ იჯექით. კაცები ხომ სულ წუწუნებენ, რომ დაიღალნენ, ქანცი გაძვრათ სამსახურში და ძლივს მოლასლასდნენ სახლამდე. ცოლს ტელევიზორთან რომ დაინახავენ, შეიძლება ზარმაციც უწოდონ. ამიტომ ტრაბახით ძალიან ნუ შეაწუხებთ, მაგრამ ხალისიანი მონაყოლით მიახვედრეთ, რომ ნაკლებად არ დაღლილხართ.
5. ”ყოვლისშემძლეობას” ნუ დაიჩემებთ, ვითომდა, ყველანაირ სიტუაციაში ყველაფერი ძალმიძსო. როცა თავს შეუძლოდ გრძნობთ, შეეცადეთ, მარტო “სასიცოცხლო მნიშნელობის” საქმეები გააკეთოთ. უსაქმოდ ყოფნა და ავადმყოფობაც არაა სასიამოვნო, მაგრამ არც გადატვირთვაა ხსნა, თქვენი ჯანმრთელობა - ოჯახური ბედნიერების განუყოფელი ნაწილია და ეს უნდა გახსოვდეთ. ნუ შეგრცხვებათ ხოლმე იმის თქმის, რომ კარგად არა ხართ. როცა სიცხე 39 გაქვთ და სამზარეულოში ქვაბებით დარბიხართ, არავინ დაიჯერებს, რომ თავს ცუდად გრძნობთ და გრიპს ჩვეულებრივი მოკვდავებივით იტანთ. მამაკაცებს ხშირად უნდა შევახსენოთ, რომ ხანდახან სუსტები და დაუცველები ვართ და მზრუნველობა გვჭირდება.
დიასახლისობა რუტინად რომ არ გადაიქცეს
⏱️ 1 წთ.
👁️ 1 776
100%