ჯერ კიდევ ღრმა ბავშვობაში, როცა დედა სამზარეულოში ფუსფუსებდა, თავს დასტრიალებდა ქალიშვილებიდან ყველაზე უფროსი, თამრიკო ჭოხონელიძე.
შესაბამისად, თეორიულად ბევრი კერძის მომზადება ბავშვობიდანვე იცოდა. გამოცდა საკუთარ თავს თავად ჩაუტარა, მაშინ, როცა მამა მიკროინფარქტით საავადმყოფოში დააწვინეს და დედას დიასახლისობისთვის არ ეცალა.
მაშ ასე, ამჯერად გემრიელი რეცეპრების კრებულს მუსიკოსი, მომღერალი, თამრიკო ჭოხონელიძე გაგანდობთ.
– ჩემი პირველი მასწავლებელი კულინარიაში იყო დედაჩემი და ასე გრძელდება დღემდე. სამზარეულოში რომ ტრიალებდა, სულ ვუყურებდი, რას აკეთებდა, მაინტერესებდა. თეორიულად ბევრი კერძის მომზადება ვიცოდი. მთავარი იყო პრაქტიკაში განმეხოციელებინა. პირველად, როცა ამის საჭიროება დადგა, მშვენივრად გავართვი თავი. ეს იყო ახალი წილის წინა პერიოდი, როცა მამაჩემს მიკროინფარქტი დაემართა და საავადმყოფოში დააწვინეს. დედა თავზე ედგა მამას, სადილის კეთებაზე ზედმეტი იყო ლაპარაკი. იმის გამო, რომ დებში ყველაზე უფროსი მე ვიყავი, საკუთარ თავზე ავიღე დიასახლისობა. პირველად ხორცის სოუზი გავაკეთე. მომიწონეს. პირველი ჩემი ზეიმი ამ კუთხით, იყო ახალ წელს, როცა სიურპრიზი მოვუმზადე ოჯახს. მამაჩემი 6 დეკემბერს დააწვინეს საავადმყოფოში. 31 დეკემბერს უნდა გამოეწერათ. საკუთარ თავზე ავიღე საახალწლო სუფრის მომზადება. ახალი წელი ყოველთვის დიდი ზეიმი იყო ჩვენს ოჯახში, მთელი რიტუალი იყო, საგულდაგულოდ ვემზადებოდით ამ დღისთვის, „უბორკებით“ და დიდი ამბებით. მამა წმენდდა ხოლმე ბროლის ჭაღს, რომელიც საუკუნეზე მეტს ითვლის. ძალიან მაღალჭერიან სახლში ვცხოვრობდით და მამა ივალებდა ამ საქმეს საახალწლოდ და სააღდგომოდ. ერთი ფრაზით თქვა მამამ, წელს სათანადოდ ვერ შევხვდებით ახალ წელსო. ისე მომხვდა გულზე მამაჩემის გულისწყვეტა, მოვედი სახლში, მივიდგი მაგიდა ჭაღის ქვეშ, მაგიდაზე სკამი და გავწმინდე. 31-ში ბებიას გამოვართვი ფული და მარტო წავედი ბაზარში. სტუდენტი ვიყავი მაშინ. ბაზრის ზედა შესასვლელთან ისეთი ჭყლეტა მოხდა, „მოამბემაც“ გადმოსცა ეს ამბავი. ამ ჭყლეტაში დავკარგე ჩანთა. მოვედი სახლში, ბებოს ვეღარ გავუბედე და მეზობელს ვესესხე ფული. მეორედ წავედი ბაზარში. ვიყიდე ინდაური, ბურვაკი, ნიგოზი, სუნელები, ფხალეულობა. ერთადერთი რისი მომზადებაც არ ვიცოდი, იყო საცივი. დაანარჩენი ყველაფერი მე გავაკეთე: სამნაირი ფხალი, ხორცი მოვხარშე, დავურეკე დედაჩემის გამზრდელ მეგრელ მამიდებს და მათი რეცეპტით გავაკეთე საცივი. უგემრიელესი გამომივიდა. მამა რომ ამოიყვანეს მისმა მეგობრებმა, სუფრა გაშლილი დავახვედრე. სახლში შემოსვლისთანავე ჭაღს ახედა და სასიამოვნოდ გაეღიმა. ყველაზე ბედნიერი ვიყავი მაშინ. ისეთი სუფრა გავშალე, ავ თვალს არ ენახვებოდა. გოზინაყიც კი გავაკეთე.
– ერთ დღეში გააკეთე ეს ყველაფერი?
– ერთ დღეში. ძალიან სწრაფი ხელი მაქვს და, რაც მთავარია, ორგანიზებულად ვაკეთებ ყველაფერს. იმ დღეს მაღიარა კულინარიაში ოჯახმა.
– შენი მეგობრები ამბობენ, რომ საოცარ ხაჭაპურს აცხობ.
– ხაჭაპურის გამოცხობა მოგვიანებით ვისწავლე. როცა გავთხოვდი, პირველივე დღიდან დავიწყე საჭმელების კეთება. გაოგნებული იყო ჩემი დედამთილი. 22 წლის ვიყავი მაშინ.
– ყველაზე მეტად რა მოსწონდა გიას შენი გაკეთებული?
– ყველაფერს მიქებდა. განსაკუთრებით ხაჭაპურს. ცომთან კარგი დამოკიდებულება მაქვს.
– გვასწავლე როგორ მოვამზადოთ ხაჭაპური სწრაფად…
– ამ შემთხვევაში მაწვნის ცომი არის საუკეთესო გამოსავალი. ცომისთვის დაგჭირდებათ: ერთ ქილა მაწონი, ერთი ქილა არაჟანი, ორი სუფრის კოვზი „დაჩა“, ერთი სუფრის კოვზი სოდა, ერთი სუფრის კოვზი შაქარი და ნახევარი ჩაის კოვზი მარილი. სოდას ჩაყრით მაწონში, ამოფუვდება და ჩაასხამთ თასში. დაუმატებთ დანარჩენ ინგრედიენტებს, კარგად აურევთ ერთმანეთში და შეაზელთ ფქვილს, იმდენს რომ გამოვიდეს ფაფუკი ცომი. ცომი, გამოცხობამდე, უმჯობესია რამდენიმე საათით მაცივარში შეინახოთ. ამ მეთოდით მოზელილი ცომი მინიმუმ ერთი კვირა ინახება. მთავარია, ზეთი მოასხათ ზემოდან, რომ არ დასკდეს.
– ხაჭაპურის გულში ყველის გარდა რამე ინგრედიენტს უმატებ?
– ცნობილი ლეგენდაა, ერთ-ერთ სოფელში ხაჭაპურის მცხობელი ძალიან ცნობილი ქალი ცხოვრობდა და ყველა ღონისძიებაზე, ჭირი იყო თუ ლხინი მას აცხობინებდნენ. ძალიან რომ მოხუცდა, უთხრეს, თან ნუ წაიღებ საიდულმოს, რეცეპტი გაგვიმხილეო. ცომში ყველი ჩადეთ ბევრიო, ამოღერღა ძლივს მომაკვდავმა (იცინის). ყველის არჩევა უნდოდა იცოდეთ. სხვათა შორის, ყველიც კი ამომიყვანია იმერეთში. ყველი უნდა იყოს მშრალი, გაწურვა არ უნდა სჭირდებოდეს. შეგიძლიათ გახეხილ ყველს დაუმატოთ ცხიმი და ერთი კვერცხი. სულ ეს არის ხაჭაპურის მთელი საიდუმლოება. თუ ცოტა სულგუნსაც დაუმატებთ, მოკბეჩის დროს ხაჭაპურის შიგთავსი გაიწელება.
– ვიცი, რომ კარგი სალათების მომზადება იცი…
– ახლახან ძალიან სასარგებლო სალათი გამოვიგონე. ყველანაირი მწვანილი შეგიძლიათ გამოიყენით ნიახურის გარდა. გარეცხავთ, დაჭრით და აურევთ მოხარშულ ბრინჯში, დაუმატებთ ცოცხალ ხახვს, პილპილს, მარის და ცოტა მაიონეზს. ვინც დიეტაზეა და კალორიებს ითვლის, მაიონეზის გარეშე მიირთვას… კიდევ გასწავლით ერთ სალათს. ერთმანეთში აურევთ დახეულ მწვანე სალათის ფოთლებს, ერთ დაჭრილ პომიდორს, ერთ დაჭრილ კირტს, ცოტა მწვანე ხახვს, უმ ქამა სოკოს. ზემოდან გადაასხამთ სოუსს, რომელიც შემდეგნაირად მზადდება. ერთმანეთში აურევთ: ორი სუფრის კოვზ ზეთს, ერთ სუფრის კოვზ მაიონეზს, ორი სუფრის კოვზ წყალს, მესამედ ჩაის კოვზ მარილს, ნახევარ ჩაის კოვზ შაქარს, მესამედ ჩაის კოვზ მდოგვს და სუფრაზე გატანის წინ გადაასხამთ სალათს. ძალიან პიკანტური გემო აქვს.
– მთელი ცხოვრება ებრძვი წონას…
– ჩემი წონა დაკავშირებულია სტრესებთან. ძალიან ემოციური ადამიანი ვარ, როცა რაღაცაზე ვნერვიულობ, თავისთავად ვსუქდები, ყველანაირი კვების გარეშე. ჩემმა მეგობრებმა იციან, როდესაც ვხვდები, ე.ი. წყნარი ცხოვრება მაქვს.
– ამ ხნის განმავლობაში, ალბათ, არაერთი დიეტა დაგიცავს, რომელიმე ეფექტური დიეტა გვასწავლე ჩვენც.
– ყველაზე ეფექტური დიეტა არის რეჟიმი. დღეში ერთხელ კი არ უნდა ჭამო, უნდა მოიცალო საკუთარი თავისთვის და დღეში ოთხჯერ მაინც მიირთვა საჭმელი, პატარა ულუფებით. ეს არის მთავარი. ცომი, ტკბილი და მარილი შეზღუდეთ.
– ვისაც ძალიან სწრაფად, რამდენიმე დღეში უნდა გახდომა?
– ამის საუკეთესო საშუალებაც ვიცი, ოღონდ მერე ძალიან მალე ინაზღაურებ დაკლებულ კილოგრამებს. ერთ ქილა მაწონში გახსნით ერთ ჩაის კოვზ ხსნად ყავას და ერთ ჩაის კოვზ თაფლს. კარგად აურევთ და მთელი დღის განმავლობაში ამით იკვებებით. გააგრძელებთ იმდენი დღე, რამდენიც შეგიძლიათ. ერთ დღეში ერთ კილოგრამს იკლებ. საკუთარ თავზე მაქვს გამოცდილი. ძალიან ეფექტურია, მაგრამ კიდევ ერთხელ ვიმეორებ, მალევე გასუქდები, თუ დამთავრებისთანავე ჭამას დაიწყებ.
– დილის საუზმეზე ყველაზე სწრაფად რა მოვამზადოთ?
– ძალიან იოლად მოამზადებ საუზმეს, თუ სახლში გაქვს ლავაში. გაშალეთ ლავაში და გაახვიეთ მასში რაც გინდათ. მაგალითად, ერთად შემწვარი და შემდეგ გაგრილებული ყველი და კვერცხი. ლავაშს მოუკარით გვერდები და ტაფაში ცხიმის გარეშე მაღალ ცეცხლზე მობრაწეთ ორივე მხიდან.
– ვიცი, რომ ვეგეტარიანელი ხარ, ამის გამო ხშირად თევზეულით იგონებ ახალ-ახალ კერძებს. გაგვანდე ჩვენც…
– გასწავლით თევზს სოუსით. თევზის ფილეს ამოავლებთ საფანელში გარეულ სვანურ მარილში და შეწვავთ. ცალკე მოვამზადებთ სოუსს. ერთ ქილა კეჩუპს დაუმატებთ ორ ქილა წყალს და ერთი სავსე სუფრის კოვზ ფქვილს. რომ წამოდუღდება დაუმატებთ, შავ პილპილს, მარილს და ორი სუფრის კოვზ მაიონეზს. ხელმეორედ წამოდუღდება და გამორთავთ. ცალკე მზად გაქვთ მრგვლად დაჭრილი ცოცხალი ხახვი. სუფრაზე გატანის წინ თეფშზე ფენებად აწყობთ: შემწვარ თევზს, გადაასხამთ სოუსს, დააყრით ხახვს, მერე ისევ თევზი, სოუსი, ხახვი, სანამ არ გამოგელევათ. მერწმუნეთ, უგემრიელესია.
– რაიმე გემრიელი დესერტის რეცეპრიც გვასწავლე…
– გასწავლით დესერტს ბანანითა და ნიგვზით. აიღეთ სამი ბანანი, დაჭერით და დაუმატეთ ერთმანეთში არეული ნახევარი ჭიქა გატარებული ნიგოზი, სამი სუფრის კოვზი შაქარი და ვანილი. ზემოდან მოასხით მინანქარი, რომელიც შემდეგნაირად მზადდება. ერთმანეთში აურიეთ სამი სუფრის კოვზი კაკაო, სამი სუფრის კოვზი შაქარი, ერთი სუფრის კოვზი ცხიმი, სამი სუფრის კოვზი წყალი, ვანილი და დადგით დაბალ ცეცხლზე. წამოდუღდება თუ არა მზად არის.
ნინო მჭედლიშვილი
წყარო: primetimenews.ge
როგორ მოვამზადოთ ხაჭაპური სწრაფად – გემრიელი კერძების რეცეპტები თამრიკო ჭოხონელიძისგან
⏱️ 1 წთ.
👁️ 29 152
100%