თითქმის 9 თვიანი ლოდინის ბოლო პერიოდი მეტად მომქანცველია. უკვე ყოველ წუთს ველით პატარას და თუ ის იგვიანებს, ეს მოლოდინი კიდევ უფრო გაუსაძლისი ხდება და მოთმინებაც გვღალატობს. სხვათაშორის, დაძაბული ემოციური ფონი მშობიარობის მოახლოების ერთ-ერთი ნიშანია, მაგრამ მოდით მივყვეთ თანმიმდევრობით და გავეცნოთ მშობიარობის მოახლოების მაცნეებს.
მშობიარობა უეცრად არ იწყება და მისთვის მზადებას ჩვენი ორგანიზმი რამდენიმე კვირით ადრე იწყებს. თუმცა, ეს სამზადისი და მისი ყველა ნიშანი ჩვენთვის ყოველთვის შესამჩნევი არ არის. ყველა ორსულისთვის ეს პროცესი ინდივიდუალურია, მაგრამ ქალი ბუნებრივად მსგავს ეტაპებს გადის მშობიარობის დასაწყისში. მაშ გავეცნოთ მშობიარობის მოახლოების ნიშნებს.
თქვენი სხეული შესაძლოა შესივდეს, შეშუპდეს. ეს სისხლის გაზრდილი მოცულობით ხდება. მშობიარობისას თქვენ შესაძლოა სისხლი დაკარგოთ და ამისათვის ორგანიზმი წინასწარ ემზადება და სისხლს იმარაგებს თქვენს ქსოვილებში;
შესაძლოა მკერდიდან გამოჟონოს ყვითელი ფერის სქელმა სითხემ, ეს თქვენი პატარას პირველი საკვებია, რომელიც მეტად საასრგებლო ნივთიერებებით არის გაჯერებული და მას პირველ დღეებში ესაჭიროება;
შესაძლოა დაგეწყოთ წელის ტკივილი, ხერხემლის ქვედა ნაწილში, რომელსაც თან ახლავს მენსტრუაციის წინა ტკივილების მსგავსი შეგრძნებები;
შესაძლოა იგრძნოთ საშვილოსნოს გახშირებული შეკუმშვა, რომელიც ასევე უფრო ხანგრძლივი ხდება – ე.წ. მოვლითი ტკივილები;
ასევე ქალების ნაწილი გრძნობს საცობის ჩამოვარდნის მომენტს. ეს გასქელებული ლოწოვანი მასის, ნაცრისფერი ფერის საცობია, რომელიც თქვენი საშვილოსნოს ყელს იცავდა ამ ხნის განმავლობაში. მისი ჩამოვარდნა მიანიშნებს, რომ ყელის გახსნა დაწყებულია, თუმცა ეს რამდენიმე კვირით ადრეც შესაძლოა მოხდეს.
საშვილოსნოს ყელის გახსნის კიდევ ერთი ნიშანი არის სისხლნარევი გამონადენი, რომელიც შესაძლოა საცვალზე შენიშნოთ;
მშობიარობის დაწყებაზე მიანიშნებს სანაყოფე წყლების დაღვრაც. სასწრაფოდ დაუკავშირდით ექიმს, თუ წყლები დაღვარეთ;
შესაძლოა აღგენიშნოთ ჭარბი გამონადენი საშოდან;
მშობიარობის დაწყებამდე შესაძლოა მსუბუქი დიარეა (კუჭის აშლილობა) დაგეწყოთ. ამ გზით ორგანიზმი ათავისუფლებს სწორ ნაზლავს და ემზადება მშობიარობისთვის.
ალბათ გსმენიათ მუცლის დაწევის შესახებ. თუ ეს თქვები პირველი ორსულობაა, მუცელი მშბიარობის დაწყებამდე დაახლოებით ერთი კვირით ადრე დაგეწევათ. მეორე და მომდევნო ორსულობისას კი ეს შუალედი გაცილებით ხანმოკლე ხდება, და შესაძლოა რამდენიმე საათიც კი იყოს. მუცლის დაწევისას იგრძნობთ, რომ სუნთქვა გაგიადვილდათ და ასევე მეტი საკვების მიღებაც შეგიძლიათ. თუმცა გიჭირთ სიარული, რადგან თქვენი პატარას თავი უკვე თქვენს მენჯებშია მოქცეული.
როგორც ზემოთ ავღნიშნეთ ამ სიმპტომებს თან ახლავს დაძაბული ემოციური ფონი, რაც გარკვეულ წილად თქვენი შინაგანი შფოთვით არის გამოწვეული. ასევე, შესაძლოა გაგიჩნდეთ შინაგანი მოუსვენრობა, სახლის დალაგების აუხსნელი სურვილი. დაუკვირდით თქვენს შეგრძნებებს!
მოვლითი ტკივილები მშობიარობის დასაწყისის ყველაზე საიმედო ინდიკატორია. როდესაც ისინი რეგულარული ხდება, დაახლოებით 4 წუთიანი ინტერვალებით და 1 წუთს მაინც გრძელდება, ნიშნავს რომ პროცესი დაწყებულია და ძალიან მალე მშობიარობის პირველი ეტაპი აქტიურ ფაზაში გადავა. ამიტომაც დროა შეეხმიანოთ თქვენს ექიმს და აუხსნათ თქვენი მდგომარეობა, მისგან მიიღოთ ზუსტი ინსტრუქციები;
ყველა ამ ზემოთ ჩამოთვლილი ნიშნის აღმოჩენა ჯერ კიდევ არ ნიშნავს, რომ მშობიარობა სწრაფად დაიწყება, ამიტომ მოერიდეთ პანიკას. დაუკავშირდით თქვენს ექიმს და მიიღეთ მისგან კონსულტაცია, თუ როდის მიხვიდეთ სამშობიაროში. თუ დრო გაქვთ ეცადეთ დამშვიდდეთ და ეს დროს თქვენს თავთან მუშაობისთვის გამოიყენოთ. ჩვენ გირჩევთ:
მიიღოთ ცხელი შხაპი ან აბაზანა, ეს ტკივილებს შეგიმსუბუქებთ;
ჭამოთ საჭმელი თუ ამის სურვილი გაქვთ;
სცადოთ სუნთქვისა და რელაქსაციის ტექნიკების გამოყენება და დააკვირდეთ, როგორ მოქმედებას ახდენენ ისინი თქვენს მოვლით ტკივილებზე და სხვა შეგრძნებებზე;
ნახეთ საყვარელი ფილმი, ან მოუსმინეთ მუსიკას, გააკეთეთ ის რაც გამშვიდებთ. სამშობიაროში წასვლამდე კი ერთხელაც დარწმუნდით, რომ მზად ხართ და ყველა ნივთი თან გაქვთ და თამამად გაეშურეთ!
წყარო: http://babyinfo.ge/
მშობიარობის დაწყების ნიშნები
⏱️ 1 წთ.
👁️ 10 241
100%