“მოტყუება არ გაბედო!” - ვუჯავრდებით ხოლმე ბავშვს და იქვე, მისი თანდასწრებით, ქმარს ვთხოვთ, თქვას, თითქოს შინ არ ვართ. მარტივი მიზეზით: ტელეფონით დაქალთან ლაპარაკი გვეზარება. ბავშვიც იბნევა, ვერ ხვდება, რა არის ტყუილი და ვის რისი უფლება აქვს.
ბევრს გვაქვს გონებაში ჩარჩენილი უაპელაციო განცხადება, “არასდროს ვიტყუები”, “მე არ ვიტყუები და არც სხვას მივცემ ტყუილის უფლებას”, “არ ვიცი ტყუილის თქმა”, ”არ მეხერხება ტყუილი” და ა.შ. მაგრამ ამ დროს სიცრუეს გამუდმებით ვეჯახებით, თავადაც ვცრუობთ, სხვის სიცრუესაც ვისმენთ, თანაც ისე, რომ ამას არანაირ მნიშვნელობას არ ვანიჭებთ.
ტყუილების სტატისტიკა
დიდ ბრიტანეთში საინტერესო გამოკითხვა ჩაატარეს – რამდენად ხშირად ატყუებენ ადამიანები ერთმანეთს და რა საბაბით. შედეგმა გამოავლინა, რომ საშუალოდ, ადამიანი დღეში 4-ჯერ იტყუება. თანაც მამაკაცები უფრო ხშირად ტყუიან (5-ჯერ დღეში), ვიდრე ქალები (3-ჯერ დღეში). გასაოცარი სტატისტიკაა, ბევრს აღაშფოთებს ალბათ. თუ ეს რაციონალიზმით, გაწონასწორებლობით ცნობილ და მორალისტ ბრიტანელებს ახასიათებთ, სხვები რაღას იზამენ.
არადა ყველაფერი ძალიან მარტოვად და ბუნებრივად ხდება. იმისთვის, რომ ადამიანს ტყუილის თქმა აიძულო, ხანდახან მოკითხვაც კი კმარა. პასუხი: კარგადა ვარ, არა მიშავს, ყველაფერი ნორმალურადააო, -ამბობენ ჩვენი ახლობლები და ვამბობთ ჩვენს და ეს ხშირად ტყუილია.
მეორე ადგილი ტყუილებში დაიკავა ფრაზამ: “მოხარული ვარ შენი ნახვის”. ამას მოსდევს: “უკაცრავად, ფული არა მაქვს თან”, “დაგირეკავ”, “უკაცრავად, ვერ გავიგონე, რომ რეკავდი”. ასევე, ფრაზები, “ძალიან კარგად გამოიყურები ამ კაბაში”, “ეს ძალიან გიხდება” და ა.შ. – ჩვეულებრივ არ არის ხოლმე მართალი და ამიტომაც დაიკავა მერვე ადგილი ტყუილთა ნუსხაში.
გარდა ამისა, 20 ყველაზე გავრცელებულ ცრუ ფრაზას შორის შემდეგი გამონათქვამები აღმოჩნდა: “რა თქმა უნდა, მიყვარხარ”, “მობილური დამიჯდა”, “მაგვიანდება, საცობში ვარ”, “მობილური არ იჭერდა”, “შეცდომით ჩამიწერია შენი ნომერი”, “სწორედ ისაა, რაზეც ყოველთვის ვოცნებობდი”.
თუმცა, როგორც იმ კომპანიის წარმომადგენლები თვლიან, რომელიც ამ უჩვეულო გამოკითხვას ატარებდა, განსაკუთრებული კრიმინალი ასეთ ტყუილში არ არის. ყველაზე ხშირად ადამიანები იმისთვის იტყუებიან, რომ მეორე ადამიანს არ აწყენინონ.
ამასთანავე, ყოველი მეხუთე მამაკაცი, რომელიც გამოკითხვაში მონაწილეობდა, უფრო ხშირად ცოლსა და საყვარელ ქალს ატყუებს, რომ მეგობრებთან ერთად გაძვრეს ბარში ან მშვიდად უყუროს ფეხბურთს. ყოველი მეოთხე ამხელს, რომ თავის პარტნიორს ატყუებს, როცა ამბობს, თითქოს ამა თუ იმ მორთულობაში შესანიშნავად გამოიყურება.
რაც შეეხებათ ქალებს, ისინი ტყუილს შეძენილი ტანსაცმლის ფასების გამო ამბობენ (გამოკითხულთა 44%) ან იმ სასმელის რაოდენობას მალავენ, რომელიც დააგემოვნეს (30%).
საერთოდ, გამოკითხულთა მესამედი წონის გამო ტყუის, მესამედზე ცოტა ნაკლები — თავისი სპორტული გატაცების თაობაზე, ხოლო მეოთხედს ურჩევნია დამალოს თავისი ფინანსური მდგომარეობის დეტალები.
მაშ, რა უნდა ვქნათ?
გამოდის, რომ ვიტყუებით დაუფიქრებლად, არც დანაშაულის გრძნობა გვაქვს და არც სინდისის ქენჯნა. მაშ, რატომღა გვტკივა გული, როცა თავს მოტყუებულად ვგრძნობთ?
როგორც ჩანს, ყველა ადამიანს აქვს იმ მომენტებისა და სიტუაციების ნუსხა, რომლებიც მას სიმართლის ცოდნა ურჩევნია. ნუთუ ეს იმას ნიშნავს, რომ რაც მნიშვნელოვანია, იქ სიმართლე გვჭირდება და თუ მნიშვნელოვანი არ არის, ფარისევლობაც შეიძლება?
ყველა ადამიანი ხომ სხვადასხვანაირია, გამოდის, თითოეულს თავისი ნუსხა ექნება. როგორღა უნდა მოიქცე მაშინ, როცა საუკეთესო განზრახვით, გულშემატკივრობით თქვი ტყუილი, თანამოსაუბრისთვის კი სწორედ ახლა სასიცოცხლოდ მნიშვნელოვანია სიმართლის გაგონება?
ითვლება, რომ არსებობს თეთრი ტყუილი, მარგებელი ტყუილი, ტყუილი სიბრალულის გამო, სიკეთის გამო და ა.შ. ვინ მოთვლის იმის გამამართლებელ საბუთს, რომ სიმართლის თქმა არ გეხერხება?! მაშ, რა უნდა ქნა – მოიტყუო თუ არა?
იქნებ, ყოველი შემთხვევა სინდისს უნდა დაუტოვო განსასჯელად, ანუ განსაზღვრო, რისი გაგონება სურს და სჭირდება თქვენგან ადამიანს - მწარე და გულწრფელი სიტყვების თუ მხარდაჭერის იმედის მომცემი სიტყვების?
- თუ სიმართლეს აირჩევთ, ძალიან მნიშვნელოვანია სიმართლის კარგად თქმის უნარი, ეს კარგად თქმა ისეთ თქმას ნიშნავს, როცა ადამიანს გულს არ ტკენ, ჭრილობებს არ აყენებ. თავად კი მსგავსი სიმართლის მოსმენის უნარი უნდა გქონდეთ.
ბავშვებთან? - ბავშვებთან კი სჯობს სამართლიანად, პატიოსნად და თანმიმდევრულად მოიქცეთ. პატარებს ჯერ არ შეუძლიათ უფროსების სამყაროში გარკვევა, მოქნილობას მოკლებულნი არიან და “ნახევარტონებს” ვერ გრძნობენ. ბავშვისთვის თავგზის აბნევა ძალიან ადვილია, შედეგს კი თავადვე მოვიმკით.
მასალა მოამზადა სოფო გულიაშვილმა
წყარო: eva.ge
სიცრუე თუ დიპლომატია
⏱️ 1 წთ.
👁️ 2 746
100%