დაფიქრებულხართ ოდესმე, თეძოებს შორის რამხელა დაშორება გაქვთ? ამერიკელი მოზარდებისთვის, თურმე, ძალიან მნიშვნელოვანია, რადგან თვლიან, რომ სილამაზის ყველაზე ცხელ-ცხელი პარამეტრია. ფსიქოლოგები და იმ გოგონების მშობლები, რომლებიც სარკეში დღედაღამ თავიანთ თეძოებს აკვირდებიან, შეშფოთებულები არიან ახალი ტენდენციის გამო.
თუ ადრე ბიუთი-ფორუმებზე მოხდენილი ფეხების ეტალონად ცნობილი ფორმულა "4 ფანჯარა" ითვლებოდა, ახლა უფრო და უფრო მეტი გოგონა (ჯერჯერობით მხოლოდ ამერიკაში) თეძოს ზედა ნაწილში იზომავს ნაპრალს. რა თქმა უნდა, გაზომვით საქმე არ მთავრდება.
ბევრი მათგანი უმკაცრეს დიეტაზე ჯდება იმისათვის, რომ სასურველ ეფექტს მიაღწიოს. პრობლემა კი იმაში მდგომარეობს, რომ მიღებული შედეგი ხშირად გათანგულ სახესთან, ჩავარდნილ ლოყებთან და კახექსიურად გამხდარ კიდურებთან მოდის კომპლექსში.
იმის გათვალისწინებით, რომ ყველა ადამიანს სხვადასხვა აღნაგობა აქვს, ბევრს ეს "ფანჯრები" ბუნებით დახურული აქვს. თუმცა, ეს ფაქტი ცოტას თუ შეაჩერებს. ამერიკაში არსებობს მთელი საიტი, სადაც გოგონები ერთმანეთს უზიარებენ რჩევებს, როგორ მიუახლოვდნენ ოცნების პარამეტრებს.
ყველაზე სამწუხარო კი ის არის, რომ ცოტა მოზარდი თუ უფიქრდება, რით შეიძლება დამთავრდეს მათი ეს ახირება. ბევრ გოგონას ანორექსიის საწყისი ეტაპი აღენიშნება. მშობლები, მასწავლებლები, ფსიქოლოგები თავს იმტვრევენ, რომ როგორმე შეაჩერონ ეს ახალი მანია და ამ ყველაფერში მოდელების პარამეტრებს ადანაშაულებენ. ჟურნალები და ტელეგადაცემები რომ არა, სადაც უნაკლო ვარსკვლავებსა და მოდელებს აჩვენებენ, ყველა მშვიდად იქნებოდა – თვლიან ისინი.
სიმართლის მარცვალი ამაში, რა თქმა უნდა, არის, თუმცა არანაირი "ფანჯარა" და "სარკმელი" არ უნდა გახდეს იდეაფიქსი ადამიანისთვის, ვისაც მხრებზე თავი ადგას...
თქვენ რას ფიქრობთ ამ თემასთან დაკავშირებით?
წყარო
თეძოებს შორის "ფანჯარა": სილამაზის ახალი პარამეტრი თუ ბიუთიმანია
⏱️ 1 წთ.
👁️ 12 927
100%