კუჭნაწლავზე გაკეთებული ოპერაციის შემდეგ მალე მომჯობინებას ხელს უწყობს ჩვეულებრივი საღეჭი რეზინი. საღეჭი რეზინის დადებითი თვისებების შესახებ ინგლისის დორსეტის საგრაფოში მდებარე კლინიკის ერთ-ერთმა თანამშრომელმა განაცხადა, რომელმაც დაკვირვება 67 პაციენტზე აწარმოა.
მედდა გარიეტ რაიტის მტკიცებით, ის პაციენტები, რომელთაც კუჭის ოპერაცია გადაიტანეს და დროდადრო საღეჭ რეზინს ღეჭავდნენ, საავადმყოფოდან სახლში გაცილებით ადრე ეწერებოდნენ, ვიდრე ისინი, რომელთაც საერთოდ არ დაუღეჭავთ.
გარიეტი კვლევის მონაწილეებს საღეჭი რეზინის ღეჭვის უფლებას დილით, შუადღეს და საღამოს 30 წუთის განმავლობაში აძლევს. შედეგებმა მოლოდინს გადააჭარბა: კუჭნაწლავის ფუნქცია გაცილებით მალე იწყებს აღდგენას, რადგან საღეჭი რეზინი კუჭ-ნაწლავის ტრაქტის ჰორმონის წარმოქმნას მნიშვნელოვნად უწყობს ხელს.
„ის პაციენტები, რომელთაც ტრადიციული მეთოდით მკურნალობენ, საავადმყოფოს ოპერაციიდან 5 დღის შემდეგ ტოვებენ, ხოლო მათ, ვინც საღეჭ რეზინს ღეჭავს, მკურნალობის 3 დღეც კი ჰყოფნის. ამიტომ, ამიერიდან ღეჭვას ყველა ჩვენს პაციენტს ვურჩევთ და იმედი გვაქვს, რომ ახლო მომავალში მას სხვა კლინიკებიც დანერგავენ“, - განაცხადა იდეის ავტორმა.
წყარო: etanews.ge
ბრიტანელ პაციენტებს საღეჭი რეზინით მკურნალობენ
⏱️ 1 წთ.
👁️ 1 366
100%