ქალურობის აპოთეოზი, მამაკაცის მსახურებისა და ამავე დროს მასზე ძალაუფლების მქონე სიმბოლო, ქალი ყვავილი, იგივე გეიშა, ალბათ სწორედ ისეთ იდუმალ ქვეყნაში უნდა შობილიყო, როგორიც იაპონიაა...
იაპონური სიტყვა „გეისა“ ორი იეროგლიფისგან - „გეი“ - ხელოვნება და „სა“ - ადამიანი - შესდგება. გეიშობის წარმოშობის ორი ვერსია არსებობს: პირველის მიმდევრები მიიჩნევენ, რომ გეიშას ინსტიტუტის დამაარსებელი ორი საქმიანი ქალბატონი იყო, რომელთაც ფულისა და დიდების მოხვეჭა მაღალი წარმომავლობის სამურაებისთვის უცნაური წარმოდგენების მოწყობით გადაწყვიტეს. ერთხელ, ერთ წვეულებაზე იაპონელი მეომრების ტრადიციულ სამოსში გამოწყობილმა ქალბატონებმა, მოულოდნელად ყველას თვალწინ ცეკვა დაიწყეს.
ამ საქციელმა დამსწრე საზოგადოებაში ისეთი მოწონება დაიმსახურა, რომ მას შემდეგ ამ ქალბატონების გარეშე არც ერთი ღონისძიება არ იმართებოდა. მეორე ვერსიის თანახმად, პირველი გეიშები ძლიერი სქესის წარმომადგენლები იყვნენ, თუმცა, დროთა განმავლობაში, მათ ადგილი გრაციოზულ ქალბატონებს დაუთმეს, რომლებიც სინაზისა და მომხიბვლელობის სიმბოლოებად იქცნენ.
მოხიბვლის ხელოვნება
რაიონებს, სადაც გეიშები ცხოვრობდნენ „ყვავილების ქუჩებს“ - ხანამატებს უწოდებდნენ. დროთა განმავლობაში ხანამატის მცხოვრებლებს „ქალი-ყვავილები“ შეარქვეს. გეიშებს ზედამხედველი ჰყავდათ, რომელსაც ოკა-სანი ერქვა. მოსწავლე გეიშებს ამ სახელის ტარების უფლება არ ჰქონდათ და მაიკოებად იწოდებოდნენ. მაიკოს გეიშად გადაქცევას ქალწულობის დაკარგვა ახლდა, რომლის ყიდვაც განსაკუთრებულ კლიენტებს შეეძლოთ, რომლებიც მაიკოს ქალიშვილობაში დიდ თანხას გადაიხდიდნენ. რაც მეტ ფულს ჩამოვიდოდა მყიდველი „უბიწო ყვავილის მოსაწყვეტად“ მით მეტი იყო იმის შანსი, რომ ეს გოგონა მაღალანაზღაურებად და მოთხოვნად გეიშად გადაქცეულიყო.
იმის მიუხედავად, რომ გეიშები კლიენტებს უდიდეს და ყველანაირ სიამოვნებას ანიჭებდნენ, მათი მეძავებთან გაიგივება შეცდომაა. იაპონიაში ქალებს ოდითგანვე სამ კატეგორიად ჰყოფდნენ - ცოლი ოჯახური ცხოვრებისა და გვარის გაგრძელებისთვის არსებობდა, ხორციელი სიამოვნებების დასაკმაყოფილებლად - მეძავი, იგივე ოირანი, ხოლო სულიერი ნეტარებისთვის - გეიშა. თუმცა ეს იმას არ ნიშნავს, რომ ურთიერთობა მხოლოდ „სულიერებით“ შემოიფარგლებოდა, გეიშას ხშირად კლიენტისთვის ხორციელი სიამოვნების მინიჭებაც შეეძლო.
ასეთ შემთხვევაშიც კი ხორციელი სიახლოვე, მრავალფეროვანი და რთული რიტუალის ნაწილად გადაიქცეოდა. „ჩემსა და ჩვეულებრივ მეძავს შორის ის განსხვავებაა, რომ ყველაზე ძვირად ღირებული მეძავისგან კლიენტი სიამოვნებას მხოლოდ ლოგინში იღებს, მე კი ისეთი მოძრაობები შემასწავლეს, რომელიც ჩემ მიერ შესრულებულ ჩვეულებრივ ცეკვაში ვლინდება და კლიენტს უზომო სიამოვნებას ანიჭებს“, - ამბობდა ცნობილი გეიშა საკავა ესი.
სილამაზის ხელოვნება
გეიშების ოქროს ხანად XIX საუკუნის 60-იანი წლები და XX საუკუნის დასაწყისი ითვლება. სწორედ იმ დროს შემუშავდა ქალი-ყვავილების განვითარების რთული სისტემა, რომელიც მათთვის ლიტერატურის, ხატვის, მუსიკისა და უბრალოდ მომხიბლაობის შესწავლას გულისხმობდა.
გეიშებს სუფთა კანი უნდა ჰქონოდა, ყოველგვარი ლაქების, ნაწიბურებისა და ცელულიტების გარეშე ამისთვის ისინი ნაირგვარ ნიღბებს იყენებდნენ, რომლებიც ძირითადად ბუნებრივი ზეთების, ზღვის მარილისა და თიხისგან მზადდებოდა.
თვალები გეიშების მთავარი იარაღი იყო, სიბრძნით სავსე თვალები ყურადღებას იქცევდა. ოთახში შესვლისას ქალ-ყვავილს თვალები დახრილი ჰქონდა, რითაც თვალზე წასმული წითელი ან შავი კონტურის დემონსტრირებას ახდენდა.
ტუჩები კი პოეტების თაყვანისცემის სიმბოლო იყო, იაპონელი მწერლები გეიშას ტუჩებს ყვავილების ფურცლებსა და მწიფე ყურძენს ადარებდნენ. ქალბატონები ტუჩებზე მკვეთრ წითელ საცხს ისვამდნენ, რომელიც ვარდის, შროშანისა და ცხოველური ზეთებისგან იყო დამზადებული. დამწყები გეიშები, მაიკოები, მხოლოდ ტუჩის ცენტრალურ ნაწილს იღებავდნენ, ტუჩებისთვის მეტი ბრწყინვალების მისაცემად, გეიშები თბილ კარამელს იყენებდნენ.
საუკუნეების განმავლობაში იაპონელი ქალბატონები თმას იზრდიდნენ. გრძელი თმით მათ ელეგანტური და რთული ვარცხნილობების გაკეთება შეეძლოთ. იმ დროს იაპონელ პარიკმახერთან წასვლა ნამდვილი წამების ტოლფასი იყო, თუ პარიკმახერი თმაში ქერტლს აღმოაჩენდა, მას ფრჩხილებით ამოფხეკდა, რაც საკმაოდ მტკივნეული პროცესი იყო...
გეიშას ხელები მუდამ მოვლილი უნდა ჰქონოდა, ამისთვის ისინი ხელის მტევნებზე მასაჟს რეგულარულად იკეთებდნენ და მათ სხვადასხვა კოსმეტიკური საშუალებით ირბილებდნენ...
იაპონიაში განქორწინება გაცილებით იშვიათია, ვიდრე დასავლეთში. შესაძლოა ამის მიზეზი ისიც იყოს, რომ იაპონელი ქალი ქმრის ყველა კაპრიზის დაკმაყოფილების ნაცვლად, სიამოვნებით გადაულოცავს თავის მეორე ნახევარს გეიშას. ასე ხომ ცხოვრება გაცილებით მოსახერხებელია...
წყარო: etanews.ge
იაპონური ოჯახების სიმტკიცე გეიშების დამსახურება ყოფილა
⏱️ 1 წთ.
👁️ 1 344
100%