შოკოლადი მსოფლიოში ყველაზე პოპულარული დესერტია, რომელსაც ბევრი განსაკუთრებულ მნიშვნელობას ანიჭებს. უამრავი ადამიანისთვის დეპრესიის უებარი მკურნალია, სხვებისთვის — დიეტაზე უარის თქმის მთავარი მიზეზი; ზოგი ღმერთების ტკბილეულს უწოდებს, ზოგი კი ნარკოტიკის ერთ-ერთი სახეობადაც მოიხსენიებს. მოკლედ, უამრავი დასახელებითა და თვისებით შემკობილ მის უტკბილესობა შოკოლადს წარმოგიდგენთ!
შეუძლებელია, დააგემოვნო შოკოლადი და ვერ იგრძნო, როგორ იხსნება გონება, როგორ უმჯობესდება განწყობა და როგორ მატულობს ენერგია. სწორედ ამიტომაა, რომ ხშირად, ტვინისთვის ერთგვარი სტიმულის მისაწოდებლად, ამ დესერტს გამოცდების წინ ან სწავლისა თუ მუშაობის პერიოდში მიირთმევენ ხოლმე.
ყოველდღიურად ამ ტკბილეულისათვის 7 მილიარდ დოლარზე მეტი იხარჯება! ეს უკვე ყველაფერზე მეტყველებს. "შოკოლადოფილია" განსაკუთრებულ ძალას შემოდგომის ბოლოს იკრებს ხოლმე. ამინდებისა და განწყობის გაუარესებასთან ერთად, უფრო მეტი ენდორფინი ხდება საჭირო. ბედნიერების ჰორმონს კი ყველაზე უხვად შოკოლადში იპოვით!
გემოვნების საკითხი აქაც აქტუალურია: ზოგი შავ და მწარე შოკოლადს ამჯობინებს, ზოგი — რძიანს და ზოგიც — თეთრს. OK! თითოეული მათგანის შესახებ მოგითხრობთ და ყველა სახეობის სასარგებლო თუ მავნე თვისებებს თქვენთან ერთად გაარკვევს.
შავი შოკოლადი სრესილი კაკაოს, კაკაოს ზეთისა და შაქრის პუდრის გამოყენებით მზადდება. ეს სახეობა დანარჩენებზე უფრო ჯანსაღია, ვინაიდან რაიმე კრემს ან რძეს არ შეიცავს და, ამასთან ერთად, მასში შაქრის მინიმალური დოზაა. ექიმები ამბობენ, რომ შავი შოკოლადი ბევრი სასარგებლო თვისებით ბოსტნეულსაც კი სჯობს და ვაშლისა და იოგურტის მარგებლობას უტოლდება. მწარე შოკოლადში შედის ანტიოქსიდანტები, А, С და Е ვიტამინები, თუთია, რკინა, კალცი და კალიუმი. ეს კომპონენტები ხელს უწყობს თმის ძირებისა და ფრჩხილების გამაგრებას. მთავარი ინგრედიენტი კაკაო კი მდიდარია ფლავანოლით, რაც არტერიული წნევის, ინსულტის, ინფარქტისა და დიაბეტის რისკებს მინიმუმამდე ამცირებს. გარდა ამისა, სწორედ ეს ნუგბარი უნდა მიირთვან მათ, ვისაც ბევრი მუშაობა და ფიქრი უწევთ — შავი შოკოლადი ტვინში სისხლის მიმოქცევას საგრძნობლად აუმჯობესებს. უკვე ბევრმა კვლევამ დაადგინა, რომ "შოკოჰოლიკები" თავს გაცილებით უფრო მხნედ და ენერგიულად გრძნობენ, ვიდრე ისინი, ვინც ამ ტკბილეულს არ მიირთმევენ. თანაც, რატომ უნდა თქვათ უარი დესერტზე, რომლის 30 გრამი მხოლოდ 138 კალორიას შეიცავს?!
რაც შეეხება რძიან შოკოლადს, ის ოდნავ განსხვავებული შემადგენლობისაა და მეტ შაქარს შეიცავს. სანამ დანიელ პიტერი მყარ ფილებს შექმნიდა, რძიანი დესერტი მხოლოდ თხევადი სახით არსებობდა და სხვადასხვა კაფეში იყიდებოდა. პირველი ობიექტი, რომლის მენიუშიც ცხელი შოკოლადი შეიტანეს, 1657 წელს ლონდონში გაიხსნა. თავდაპირველად, დესერტს მხოლოდ მდიდარი ოჯახები მიირთმევდნენ, ძალიან მალე კი რძიანი შოკოლადი ყველასათვის საყვარელ, მაგრამ კალორიულ ნუგბარად იქცა. სარგებლიანობის მხრივ, შავ შოკოლადს ნამდვილად ჩამოუვარდება, თუმცა, მთელი თავისი ავლადიდებით, ის მაინც შოკოლადია!
ერთგული მოყვარულები თეთრ შოკოლადსაც ჰყავს. თუმცა, ბევრი ადამიანი მიიჩნევს, რომ ეს ტკბილეული არასწორ სახელს ატარებს და მას ნამდვილ შოკოლადთან, რომლის მთავარი ინგრედიენტი კაკაოა, საერთო არაფერი აქვს. ეს უკანასკნელი თეთრ ნუგბარში "წამლადაც" კი არ შეგხვდებათ. მასში მხოლოდ შაქარი, რძე და კაკაოს კარაქია. სწორედ ამიტომაა, რომ თეთრი შოკოლადის მოყვარულებს საყვარელი ნუგბარის კბილებით დაცვა ხშირად უწევთ!
თუ რომელიმე სახეობის მოყვარულთა რიცხვს თქვენც მიეკუთვნებით, მაშინ OK!-ის რჩევები აუცილებლად გამოგადგებათ:
— სასარგებლოა მხოლოდ ნამდვილი შოკოლადი! ხარისხიანი შოკოლადი არავითარ შემთხვევაში არ უნდა გეკრობოდეთ კბილებზე და ადვილად არ უნდა დნებოდეს. გარდა ამისა, ნამდვილია შოკოლადი, რომელიც დამზადებულია არა კაკაოს ფხვნილისგან, არამედ სრესილი კაკაოსგან, რომელსაც ხშირად კაკაოს ლიქიორადაც მოიხსენიებენ.
— ძირითადად, შოკოლადის შენახვის ვადა 1-დან 10 თვემდე მერყეობს, სასურველი ტემპერატურა კი 16-21°-ია. ზედმეტი სითბო ან სიცივე კაკაოს ზეთის ზედაპირზე გამოსვლასა და შოკოლადის გათეთრებას იწვევს, რაც, სინამდვილეში, მავნე სულაც არ არის. უბრალოდ, არასასიამოვნო შესახედი და დასაგემოვნებელია.
— გახსოვდეთ, რომ შოკოლადი, რომელიც შეიცავს რომელიმე სხვა ცხიმს და არა კაკაოს ზეთს, დაბალი ხარისხისაა და, შესაბამისად, მისი შეძენა არასასურველია. როგორც მიხვდით, საყვარელი ტკბილეულის ყიდვამდე მისი შემადგენლობის წაკითხვა და გააზრება ერთ-ერთი აუცილებელი პირობაა!
— ამ ნუგბარის მირთმევა დიეტის დროსაც შეიძლება. უმჯობესია, თუ არჩევანს შავ, მწარე შოკოლადზე შეაჩერებთ. გახსოვდეთ, დღეში 30 გრამის დაგემოვნება თქვენს ორგანიზმსა და განწყობაზე მხოლოდ დადებითად აისახება!
— უმჯობესია, თუ შოკოლადს დილის საათებში მიირთმევთ. ამ დროს ჩვენს ორგანიზმში მეტაბოლიზმის სწრაფი პროცესები მიმდინარეობს.
დაბოლოს, შოკოლადი ე.წ. ბედნიერების ჰორმონების ნამდვილი საბადოა! ასე რომ, ნუ ეტყვით უარს საკუთარ თავს და ყოველდღიურად განებივრდით ერთი ფილა ბედნიერებით!
ავტორი: ელენე მარგალიტაშვილი
okmagazine.ge
მწარე შოკოლადის ტკბილი თვისებები
⏱️ 1 წთ.
👁️ 1 359
100%